ముంబైతో మ్యాచ్‌కు ముందు మౌనం వీడిన ధోనీ

ఇండియన్ ప్రీమియర్ లీగ్‌లో అత్యంత విజయవంతమైన జట్లలో చెన్నై సూపర్ కింగ్స్ ముందు వరుసలో ఉంటుంది. ముంబై ఇండియన్స్‌తో సంయుక్తంగా 5 టైటిళ్లతో అగ్రస్థానంలో ఉంది. అన్ని సార్లూ ఇక్కడ చెన్నై సారథి ధోనీనే. ఇప్పుడు అతడి వారసత్వాన్ని సారథిగా రుతురాజ్ గైక్వాడ్ ముందుకు తీసుకెళ్తున్నాడు. ధోనీ ఇప్పటికీ చెన్నై సూపర్ కింగ్స్ టీంలో ఉన్నప్పటికీ.. ఎప్పుడు రిటైర్మెంట్ ప్రకటిస్తాడో చెప్పలేని పరిస్థితి. ఇప్పుడు ధోనీ వయసు 43. తన వయసు సహచరులంతా ఎప్పుడో రిటైర్మెంట్ ప్రకటిస్తే.. ధోనీ కొనసాగుతూనే ఉన్నాడు. గాయాల బారిన పడినా కోలుకొని యువకుడిలా చెలరేగిపోవడం ధోనీ ప్రత్యేకత. ఏదేమైనా ప్రతి సీజన్‌కు ముందు కూడా ధోనీ ఐపీఎల్ రిటైర్మెంట్‌పై చర్చ నడుస్తూనే ఉంటుంది. భవిష్యత్తు గురించి చర్చలు నడుస్తూనే ఉంటాయి. ఈ క్రమంలోనే.. తాజాగా రిటైర్మెంట్‌పై తనే స్వయంగా క్లారిటీ ఇచ్చేశాడు.

చెన్నైలోని ఎంఏ చిదంబరం స్టేడియంలో ఇవాళ రాత్రి 7.30 గంటలకు ముంబైతో సీఎస్కే తలపడనుంది. ఈ మ్యాచ్‌కు రిటైర్మెంట్‌పై ధోనీ మౌనం వీడాడు. తాను కోరుకున్నంత కాలం చెన్నైకి ఆడతానని స్పష్టం చేశాడు. తాను వీల్ ఛైర్‌లో ఉన్నా సరే.. తనను లాక్కెళ్లిపోయి ఆడిపిస్తారంటూ సరదా వ్యాఖ్యలు చేశాడు.

'చెన్నై సూపర్ కింగ్స్ నా ఫ్రాంఛైజీ. నేను సీఎస్కేకు ఎంత కాలం ఆడాలనుకుంటున్నానో.. అంత వరకు ఆడతా. ఒకవేళ నేను వీల్ ఛైర్‌లో ఉన్నా కూడా నన్ను లాక్కెళ్లిపోతారు.' అని ధోనీ వ్యాఖ్యానించడం విశేషం. మరోవైపు ఈ మ్యాచ్‌కు ముందు సీఎస్కే కెప్టెన్ రుతురాజ్ గైక్వాడ్ కూడా ధోనీ రిటైర్మెంట్ వాదనను కొట్టిపారేశాడు. 43 ఏళ్ల వయసులోనూ ధోనీ జట్టుకు ఎంతో ఉపయోగకరంగా ఉంటున్నాడని.. ఈ ఐపీఎల్‌లోనూ కీలక ఇన్నింగ్స్‌లు ఆడతాడని ఆశాభావం వ్యక్తం చేశాడు. జట్టులో చాలా మంది కుర్రాళ్లు ఉన్నా.. వారెవరూ ధోనీలా బంతిని బలంగా కొట్టడానికి కష్టపడుతున్నారని అన్నాడు.

ఇక్కడ సచిన్ తెందుల్కర్‌ ఆటను ఉదహరిస్తూ ధోనీ గురించి మాట్లాడాడు రుతురాజ్. సచిన్ 50 ఏళ్ల వయసులోనూ ఇటీవల ఇంటర్నేషనల్ మాస్టర్స్ లీగ్‌లో అద్భుతంగా ఆడాడని.. ఇలాగే ధోనీ ఇంకా చాలా సంవత్సరాలు ఆడతాడని ఆశాభావం వ్యక్తం చేశాడు. దీంతో తలా ఫ్యాన్స్ ఫుల్ ఖుషీ అవుతున్నారు. తమ అభిమాన క్రికెటర్ ఆటను ఇంకొన్నాళ్లు చూడొచ్చని ఎగిరి గంతేస్తున్నారు. ధోనీ 2023 ఐపీఎల్ సమయంలో మోకాలి గాయంతో బాధపడ్డాడు. అప్పుడు బ్యాటింగ్ ఆర్డర్లో ఆఖర్లో వచ్చేవాడు. దీంతో అదే అతడికి చివరి సీజన్ అంతా భావించారు. అయితే శస్త్రచికిత్స చేయించుకున్న ధోనీ.. కిందటి సీజన్‌లో ఆడాడు. ఎక్కువగా ఇంపాక్ట్ ప్లేయర్‌గా దిగువ స్థానాల్లో బ్యాటింగ్‌కు దిగి సిక్సర్లతో అలరించాడు. ఇప్పటికీ పూర్తి ఫిట్‌నెస్‌తో ఉన్న ధోనీ.. ఈ ఐపీఎల్ మాత్రం పూర్తి స్థాయిలో మ్యాచ్‌కు అందుబాటులో ఉండాలని, ఉంటాడని అభిమానులు ఆశిస్తున్నారు.