పార్లమెంట్ సభ్యుల వేతనాలు 24 శాతం పెంపు.. ఒక్కో ఎంపీ ఎంత జీతం

పార్లమెంట్ సభ్యులకు ప్రతీ నెలా అందే జీతాలు, పెన్షన్లను కేంద్ర ప్రభుత్వం పెంచుతున్నట్లు ప్రకటించింది. ముఖ్యంగా ద్రవ్యోల్బణ సూచీ ఆధారంగా ఎంపీల జీతాన్ని 24 శాతం మేర పెంచుతున్నట్లు పార్లమెంటరీ వ్యవహారాల మంత్రిత్వ శాఖ సోమవారం వెల్లడించింది. అలాగే సిట్టింగ్ సభ్యులు, మాజీ ఎంపీలు భత్యాలు, పెన్షన్లను కూడా పెంచుతున్నట్లు వివరించింది. అయితే ప్రస్తుతం ఎంపీలు ఎంత మొత్తంలో జీతభత్యాలు పొందుతున్నారు, ఇప్పుడు పెంచడంతో ఎంత మొత్తంలో అందుకోబోతున్నారో మనం ఇప్పుడు తెలుసుకుందాం.

పార్లమెంటరీ వ్యవహారాల మంత్రిత్వ శాఖ జారీ చేసిన నోటిఫికేషన్ ప్రకారం.. సిట్టింగ్ సభ్యులకు రోజువారీ భత్యాలను మరియు మాజీ సభ్యులకు ఐదు సంవత్సరాల్లో ప్రతీ ఏటా సేవకు పెన్షన్ మరియు అదనపు పెన్షన్‌ను కూడా పెంచారు. 1961 ఆదాయపు పన్ను చట్టంలో పేర్కొన్న వ్యయ ద్రవ్యోల్బణ సూచిక ఆధారంగా పార్లమెంట్ సభ్యుల జీతం, భత్యాలు మరియు పెన్షన్ చట్టం కింద మంజూరు చేసిన అధికారాలను వినియోగించుకుని జీతం పెరుగుదలను ప్రకటించారు.

 ఈ లెక్కన ఎంపీల నెలవారీ జీతం లక్ష రూపాయల నుంచి రూ.1.24,000కు పెరిగింది. అలాగే సిట్టింగ్ సభ్యుల దినసరి భత్యాన్ని రూ.2000 నుంచి రూ.2500కు పెంచారు. మాజీ పార్లమెంట్ సభ్యుల పెన్షన్ నెలకు 25,000 రూపాయల నుంచి రూ.31,000కు పెరిగింది. అలాగే 5 సంవత్సరాల పాటు ప్రతి సంవత్సరం సర్వీస్‌కు అదనపు పెన్షన్‌ను నెలకు 2000 రూపాయల నుంచి రూ.2500కు పెంచారు. అయితే ఈ పెరిగిన జీతాలను 2023 ఏప్రిల్ 1వ తేదీ నుంచి అమలు చేస్తున్నట్లు స్పష్టం చేశారు. రెండేళ్లకు ముందు నుంచే పెంచడంతో.. ఈ నెల అందరూ మరింత ఎక్కువ మొత్తంలో జీతాలను అందుకోబోతున్నారు.

ఇదిలా ఉండగా.. ఇటీవలే కర్ణాటక ప్రభుత్వం శాసన సభ్యుల జీతాలను 100 శాతం పెంచుతున్నట్లు ప్రకటించింది. దీంతో కర్ణాటక ముఖ్యమంత్రి సిద్ధరామయ్య జీతం నెలకు రూ.75,000 నుంచి రూ.1.5 లక్షలకు చేరుకుంది. అలాగే ఎమ్మెల్యేలు, ఎమ్మెల్సీలు సహా శాసన సభ్యుల జీతాలు నెలకు రూ.40,000 నుంచి రూ.80,000కి రెట్టింపు అవుతాయి. ఇవి మాత్రమే కాకుండా శాసన సభ్యుల నియోజకవర్గ భత్యం నెలకు రూ.60,000 నుంచి లక్ష రూపాయలకు పెరగబోతుంది. మంత్రుల ఇంటి అద్దె భత్యం నెలకు రూ.1.2 లక్షల నుంచి రూ.2 లక్షలకు పెరుగుతుంది. ఎమ్మెల్యేలు, ఎమ్మెల్సీలు చాలా కాలంగా చెల్లించాల్సిన జీతా సవరణ కోసం డిమాండ్ చేయగా.. ఈ బిల్లను రూపొందించినట్లు వర్గాల చెబుతున్నాయి.