భారీగా పడిపోయిన క్రూడాయిల్ ధరలు,,,ప్రపంచ మార్కెట్‌పై అమెరికా సుంకాల ప్రభావం

అమెరికా అధ్యక్షుడు ట్రంప్ విధించిన ప్రతీకార సుంకాలు వివిధ దేశాల వాణిజ్యాన్ని తీవ్రంగా ప్రభావితం చేస్తున్నాయి. టారిఫ్‌ల దెబ్బకు ముడి చమురు ధరలు కూడా పతనమవుతున్నాయి. ఇది రష్యాకు పెద్ద సమస్యగా మారింది. చమురు, ఖనిజాల విక్రయాల ద్వారా వచ్చే ఆదాయంపైనే రష్యా ఎక్కువగా ఆధారపడుతోంది. చమురు ధరలు పడిపోవడంతో ఆ దేశం ఆర్థికంగా కష్టాల్లో పడే అవకాశం ఉంది. ట్రంప్ సుంకాల వల్ల బ్రెంట్ క్రూడ్ ఆయిల్ ధర బ్యారెల్‌కు 64 డాలర్లకు పడిపోయింది. టెక్సాస్ క్రూడ్ ఆయిల్ ధర 60 డాలర్లకు దిగొచ్చింది. రష్యాకు చెందిన ఉరల్స్ ఆయిల్ ధర కూడా బాగా తగ్గింది. శుక్రవారం బ్యారెల్ ధర 52 డాలర్లు ఉండగా, సోమవారానికి 50 డాలర్లకు చేరింది.

ఇరాన్‌తో అణు ఒప్పందం కుదరకపోతే ప్రమాదమని ట్రంప్ హెచ్చరించారు. రష్యా ప్రభుత్వానికి చమురు, గ్యాస్ అమ్మకాల ద్వారానే ఎక్కువ ఆదాయం సమకూరుతుంది. కానీ, ఆయిల్ ధరలు పడిపోవడంతో ఆదాయం గణనీయంగా తగ్గిపోయింది. మార్చి నెలలో రష్యాకు ఇంధన రంగం నుంచి వచ్చే ఆదాయం 17 శాతం తగ్గింది. ఏప్రిల్‌లో ఈ నష్టం మరింత పెరిగే అవకాశం ఉంది. దీంతో రష్యా ప్రభుత్వం జాగ్రత్త పడుతోంది.

చమురు ధరలు పడిపోవడం, రష్యా ఆర్థిక వ్యవస్థపై దాని ప్రభావం గురించి క్రెమ్లిన్ ప్రతినిధి దిమిత్రి పెస్కోవ్‌ స్పందిస్తూ.. ‘ఈ పరిణామాలు రష్యా ఆర్ధిక వ్యవస్థకు మంచిది కాదు. పరిస్థితులు బాగా లేవు.. మా అధికారులు వీటిని గమనిస్తున్నారు. ఆర్థికంగా వచ్చే నష్టాన్ని తగ్గించడానికి చర్యలు తీసుకుంటాం అని ఆయన చెప్పారు. ఆర్థిక వ్యవస్థను కాపాడుకోవడానికి ప్రయత్నాలు చేస్తున్నామనే సంకేతాలు ఇచ్చారు.

ట్రంప్ దెబ్బకు 72 గంటల్లో ప్రపంచ మార్కెట్లలో ట్రిలియన్ డాలర్ల నష్టం వాటిల్లింది. పెట్టుబడిదారులు ఆర్ధిక మాంద్యం గురించి తీవ్ర ఆందోళన చెందుతున్నారు. ఇంతలో అమెరికా అధ్యక్షుడు ట్రంప్ తన వైఖరిని సమర్థించుకుంటూ.. ‘చమురు ధరలు తగ్గాయి... ద్రవ్యోల్బణం ముప్పు లేదు’ అని అన్నారు. మాంద్యం గురించి ఆర్థికవేత్తల ఆందోళనలను కూడా ఆయన పూర్తిగా తిరస్కరించారు. అమెరికాను దోపిడీ చేసిన దేశాల నుంచి ఇప్పుడు వారానికి బిలియన్ డాలర్లు తిరిగి పొందుతున్నామని ఆయన అన్నారు.

అందరికంటే పెద్ద దోపిడీదారు చైనా అని ట్రంప్ మండిపడ్డారు. వారి మార్కెట్లు కుప్పకూలుతున్నప్పటికీ, దశాబ్దాలుగా హాస్యాస్పదంగా అధిక సుంకాలతో అమెరికాను దోపిడీ చేసిందని ఆరోపించారు. ప్రతీకారం తీర్చుకోవద్దన్న తన హెచ్చరికలను బేఖాతరు చేస్తూ 34% టారిఫ్‌లను వేసిందని మండిపడ్డారు.