రోజూ మలవిసర్జన సాఫీగా జరగాలంటే ఏం చేయాలో తెలుసా

మలబద్ధకం వల్ల ఎన్నో సమస్యలు ఎదుర్కొనే ప్రమాదం ఉంది. కడుపు ఉబ్బరం, పొట్ట నొప్పి, పుల్లటి తేన్పులు, వికారం వంటి సమస్యలు రావచ్చు. బిజీ లైఫ్ స్టైల్, కాలుష్యం, ఎలా పడితే అలా తినడం, చెడు అలవాట్ల కారణంగా చాలా మంది రకరకాల అనారోగ్య సమస్యలు ఎదుర్కొంటున్నారు. అయితే, ఎక్కువ మంది ఎదుర్కొంటున్న సమస్య మలబద్ధకం. మలం విసర్జించేటప్పుడు నొప్పితో పాటు తీవ్ర ఇబ్బందులు ఉంటే దానిని మలబద్ధకం అంటారు. మలబద్ధక సమస్య ఉన్నవారికి.. మోషన్ సరిగ్గా అవ్వదు. మల విసర్జన చాలా కష్టంగా ఉంటుంది. ఈ సమస్యతో బాధపడేవారు వారానికి ఒకటి రెండు సార్లు మాత్రమే మల విసర్జనకి వెళ్తారు. వింటర్ సీజన్‌లో అయితే మలబద్ధక సమస్య మరీ ఎక్కువగా ఉంటుంది. ఇలాంటి వాళ్లు తీవ్రనొప్పితో బాధపడుతుంటారు.

ఈ సమస్య ఉన్నవారికి మలం చాలా గట్టిగా ఉంటుంది. కడుపు సరిగ్గా క్లీన్ అవ్వదు. మలబద్ధకం వల్ల ఎన్నో సమస్యలు ఎదుర్కొనే ప్రమాదం ఉంది. కడుపు ఉబ్బరం, పొట్ట నొప్పి, పుల్లటి తేన్పులు, వికారం వంటి సమస్యలు రావచ్చు. మలబద్ధకం సమస్యను అధిగమించడానికి చాలా మంది మెడిసిన్ వాడతారు. అయితే, తిండి అలవాట్ల కారణంగా ఫలితం ఉండటం లేదు. అయితే జీవనశైలి, ఆహారపు అలవాట్లలో కొన్ని మార్పులు చేసుకుంటే మలబద్ధక సమస్య నుంచి రిలీఫ్ వస్తుందంటున్నారు నిపుణులు. ప్రతి రోజూ మలవిసర్జన సాఫీగా సాగాలంటే ఎలాంటి మార్పులు చేసుకోవాలి, ఎలాంటి ఆహారం తినాలో తెలుసుకుందాం.

మలబద్ధకానికి కారణాలు

* ఏది పడితే అది తినడం

* ఫైబర్ ఫుడ్ తీసుకోకపోవడం

* తగినంత నీరు తాగకపోవడం

* వ్యాయామానికి దూరంగా ఉండటం

* చెడు అలవాట్లు (మద్యపానం, ధూమపానం)

* మలబద్ధకం తగ్గి మలవిసర్జన సాఫీగా జరగాలంటే ఏం ఫాలో అవ్వాలో ఇక్కడ తెలుసుకుందాం.

ఫైబర్ ఎక్కువ ఉండే ఆహారాలు తినండి

మలబద్ధక సమస్య తగ్గాలంటే ఫైబర్ రిచ్ ఫుడ్స్‌ను మీ డైట్‌లో భాగం చేసుకోవాలి. సాధారణంగా మనం ఫైబర్‌ను జీర్ణించుకోలేం. మన ఆహారంలోని ఫైబర్‌ పేగుల ద్వారా పెద్దపేగుల్లోకి వెళ్తుంది. మన పేగు ఆరోగ్యానికి తోడ్పడుతుంది. పీచు ఆరోగ్యానికి ఎంతో మేలు చేస్తుంది. ఇది కేవలం శాకాహారంతోనే లభిస్తుంది. ఇందులో రకరకాలు ఉండొచ్చు గానీ ప్రధానమైనవి నీటిలో కరిగేది, నీటిలో కరగనిది. ఫైబర్స్ గట్ మైక్రోబయోటాను మీడియేట్‌ చేస్తుంది, జీర్ణవ్యవస్థను ఆరోగ్యంగా ఉంచుతుంది. రోజూవారీ ప్రతిపాదించిన ఫైబర్‌ తీసుకోవడం వల్ల దీర్ఘకాలిక వ్యాధుల ప్రమాదాన్ని తగ్గిస్తుంది. బ్రౌన్‌ రైస్‌, క్వినోవా, హోల్‌ వీట్‌ పాస్తా, ఓట్‌ వంటి తృణధాన్యాల్లో ఫైబర్‌ సమృద్ధిగా ఉంటుంది. యాపిల్స్, నారింజ, బెర్రీలు, క్యారెట్లు, ఆకుకూరలు, బ్రకోలీలో ఫైబర్ అధికంగా ఉంటుంది. వాల్‌నట్, బాదం, చియా గింజలు, పిస్తాపప్పులు, అవిసె గింజలు, గుమ్మడి గింజల్లో ఫైబర్‌ అధికంగా ఉంటుంది. వీటిని మీ ఆహారంలో చేర్చుకోవడానికి ప్రయత్నించండి.

హైడ్రేషన్ కూడా ముఖ్యం

మనం ఆరోగ్యంగా, ఫిట్‌గా ఉండటానికి రోజూ తగినంత నీరు తాగడం తప్పనిసరి. నీరు మనల్ని హైడ్రేట్‌గా ఉంచి, శరీరంలోని మురికిని తొలగించడంలో సహాయపడుతుంది. తగినంత నీరు తాగడం వల్ల మలబద్ధకం నుంచి రిలీఫ్ లభిస్తుందని ఎక్స్‌పర్ట్స్ చెబుతున్నారు. సాధారణంగా ఆరోగ్యంగా ఉన్న వ్యక్తి రోజుకు రెండు నుంచి మూడు లీటర్ల నీరు తాగాలి. అంటే దాదాపు 8 నుంచి 10 గ్లాసుల నీరు అవసరం. ఉదయాన్నే నిద్రలేచిన వెంటనే 1 నుంచి 2 గ్లాసుల నీరు తాగడం మంచిది. కనీసం 2-3 గంటల వ్యవధిలో రెండు నుంచి మూడు గ్లాసుల నీరు తాగాలని నిపుణులు సిఫార్స్ చేస్తున్నారు.

ఒత్తిడి తగ్గించుకోవాలి

ఈ రోజుల్లో చాలా మంది వర్క్ లైఫ్‌స్టైల్ కారణంగా ఒత్తిడి, ఆందోళనతో సతమతమవుతున్నారు. ఒత్తిడి వల్ల జీర్ణసమస్యలు, మలబద్ధకం వస్తాయి. ఈ సమస్యలకు దూరంగా ఉండాలంటే ఒత్తిడి తగ్గించుకోండి. ఒత్తిడి తగ్గించుకోవడానికి వాకింగ్, యోగా, ధ్యానం వంటి వాటిని లైఫ్‌స్టైల్‌లో భాగం చేసుకోండి. కొన్ని యోగాసనాలు మలబద్ధకం నుంచి రిలీఫ్ అందిస్తాయి.

వ్యాయామం

ప్రస్తుత బిజీ లైఫ్‌స్టైల్ కారణంగా చాలా మంది వ్యాయామానికి దూరంగా ఉంటున్నారు. వ్యాయామానికి దూరంగా ఉండటం వల్ల అనేక ఆరోగ్య సమస్యలు కొని తెచ్చుకుంటున్నారు. అందుకే రెగ్యులర్ వ్యాయామం చేయాలి. రెగ్యులర్ వ్యాయామం వల్ల పేగు కదిలికలు సులభంగా ఉంటాయి. దీంతో, మలవిసర్జన సాఫీగా సాగుతుంది. వాకింగ్, రన్నింగ్, సైక్లింగ్, స్విమ్మింగ్ వంటి వ్యాయామాలను చేయండి. కనీసం రోజుకు ముప్పై నిమిషాల పాటు అయినా వాకింగ్ చేయండి. నడక అనేది ఎవరైనా సరే చేయగల బెస్ట్ ఆప్షన్.