డ్రైనేజీలో వ్యాపారవేత్త భార్య శవం.. భర్తే చంపి.. కాల్వలో పడేసినట్టు గుర్తించిన పోలీసులు

డ్రైనేజీలో లభ్యమైన ఓ మహిళ మృతదేహం కేసులో ఆమె ముక్కుపుడక పోలీసులకు కీలక ఆధారాలను అందించింది. వ్యాపారవేత్త అయిన ఆమె భర్తే.. మహిళను హత్యచేసి. కాల్వలో పడేసి ఉంటాడని పోలీసులు అనుమానిస్తున్నారు. దాదాపు నెల రోజుల కిందట ఢిల్లీలోని జరిగిన హత్య కేసులో ఆమె భర్త వ్యాపారవేత్త అనిల్ కుమార్‌ను పోలీసులు అరెస్టు చేశారు. మార్చి 15న ఢిల్లీలోని ఒక కాలువలో రాయి, సిమెంట్ బస్తా కట్టి బెడ్‌షీట్‌లో చుట్టి ఉన్న మృతదేహం కనుగొన్నారు. ఆమె ముక్కుపుడక ఆధారంగా మహిళను గుర్తించారు. హత్య మిస్టరీని ఛేదించడంలో అది వారికి సహాయపడింది.

ఆ ముక్కుపుడక తీసుకుని.. ఢిల్లీలోని ఒక నగల దుకాణానికి వెళ్లిన పోలీసులు రికార్డులను పరిశీలించారు. దానిని ఢిల్లీకి చెందిన రియల్ ఎస్టేట్ వ్యాపారి అనిల్ కుమార్ కొనుగోలు చేసినట్టు గుర్తించారు. ఆ మహిళను అతడి భార్య 47 ఏళ్ల సీమా సింగ్‌గా తేలింది. దీంతో గురుగ్రామ్‌లో ఫామ్‌హౌస్‌లో ఉన్న కుమార్‌ను విచారించిన పోలీసులు.. ఆమె ఆచూకీ గురించి ఆరా తీశారు. తను బృందావన్‌కు వెళ్లిందని చెప్పడంతో ఫోన్ చేసి మాట్లాడాలని సూచించారు. ఆమె తన వెంట ఫోన్ తీసుకెళ్లలేదని అబద్దం చెప్పి తప్పించుకోవడంలో పోలీసులకు అనుమానం బలపడింది.

అక్కడ నుంచి ద్వారకాలోని కుమార్ ఆఫీసుకు వెళ్లి.. అక్కడ డైరీలో రాసి ఉన్న సీమా సింగ్ తల్లి మొబైల్ నంబరుకు ఫోన్ చేశారు. సీమా సోదరి బబిత ఫోన్ లిఫ్ట్ చేసి.. మార్చి 11 నుంచి తమతో ఆమె మాట్లాడలేదని, ఆమెకు ఏమైందోనని ఆందోళన వ్యక్తం చేసింది. అక్క గురించి అడిగితే జైపూర్‌లో ఉందని, ఆమె మాట్లాడే మానసిక స్థితిలో లేదని, ఆమె పరిస్థితి కుదుటపడినప్పుడు మాట్లాడిస్తానని తమతో చెప్పాడని తెలిపింది. చాలా రోజుల నుంచి తాము అడుగుతుంటే.. ఏదో ఒకటి చెప్పేవాడని, పోలీస్ స్టేషన్‌కు వెళ్లాలని అనుకున్నా.. కుమార్ మాటలు తమను వేచి ఉండేలా చేశాయని చెప్పారు.

ఏప్రిల్ 1న మృతదేహాన్ని గుర్తించడానికి కుటుంబాన్ని పోలీసులు పిలిపించగా.. వారు సీమాదిగా గుర్తించారు. మర్నాడు ఆమె పెద్ద కుమారుడు కూడా ఆ మృతదేహం తన తల్లిదని గుర్తించాడు. పోస్ట్-మార్టం నివేదికలో ఆమెను గొంతు నులిమి చంపారని వెల్లడయ్యింది. అనిల్ కుమార్, సీమా సింగ్‌ల వద్ద మాత్రమే ద్వారకాలోని ఇంటి తాళాలు ఉన్నాయని, అక్కడే ఆమెను హత్యచేసి ఉంటాడని భావిస్తున్నారు. ఈ జంటకు 20 ఏళ్ల కిందట వివాహం జరిగిందని తెలిపారు. ఈ ఘటనపై కేసు నమోదుచేసిన పోలీసులు.. కుమార్, అతడి అసిస్టెంట్ శివ్ శంకర్‌లను అరెస్టు చేశారు. అయితే, ఈ హత్యకు గల కారణాలు ఏంటి? అనేది ఇంకా తెలియాల్సి ఉంది.