100 శాతం,,,బోనస్‌పై టీసీఎస్ కీలక ప్రకటన

ప్రస్తుతం అంతర్జాతీయంగా నెలకొన్న ఆర్థిక అనిశ్చితులు, ముఖ్యంగా అమెరికా-చైనా మధ్య కొనసాగుతున్న వాణిజ్య యుద్ధం అనేక రంగాలపై ప్రభావం చూపుతోంది. ఈ పరిస్థితుల్లో ఐటీ కంపెనీల లాభాలపై కూడా ఒత్తిడి కనిపిస్తోంది. అయినప్పటికీ, దేశీయ ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్) తమ ఉద్యోగులకు వేరియబుల్ పే విషయంలో సానుకూల ప్రకటన చేసింది. క్యూ4 త్రైమాసిక ఫలితాలను ప్రకటించిన టీసీఎస్ స్వల్పంగా లాభాల్ని తగ్గించుకుంది. అయినప్పటికీ.. 70 శాతం మంది ఉద్యోగులకు వారి పూర్తి అర్హత కలిగిన వేరియబుల్ పే చెల్లిస్తామని వెల్లడించినట్లు తెలుస్తోంది. ఇది కొంత నిరాశపరిచిన వేతనాల పెంపు వాయిదా నిర్ణయం తర్వాత ఐటీ ఉద్యోగులకు కాస్త ఊరటనిచ్చే అంశం. మిగతా వారికి బిజినెస్ యూనిట్ పెర్ఫామెన్స్ ఆధారంగా చెల్లించనున్నట్లు తెలిపింది.

టీసీఎస్ తీసుకున్న ఈ నిర్ణయం నేపథ్యంలో, ఇతర ప్రధాన ఐటీ కంపెనీలైన ఇన్ఫోసిస్, హెచ్‌సీఎల్ టెక్నాలజీస్, విప్రో వంటి వాటి వేరియబుల్ పే విధానాలపై సర్వత్రా ఆసక్తి నెలకొంది. ఈ అనిశ్చిత ఆర్థిక పరిస్థితుల్లో ఈ కంపెనీలు తమ ఉద్యోగులకు వేరియబుల్ పే విషయంలో ఎలాంటి నిర్ణయాలు తీసుకుంటాయో చూడాలి.

గత త్రైమాసికాల టీసీఎస్ వేరియబుల్ పే వివరాలు పరిశీలిస్తే, అంతకుముందు త్రైమాసికాల్లో కంపెనీ ఎక్కువ మంది ఉద్యోగులకు 100 శాతం వేరియబుల్ పే చెల్లించిన సందర్భాలు ఉన్నాయి. 2024-25 ఆర్థిక సంవత్సరం క్యూ2, క్యూ3లో వేరియబుల్ పేను జూనియర్లకు భారీగా అందించినా.. సీనియర్ స్థాయి ఉద్యోగులకు చాలా తక్కువ వేసిందని తెలిసింది. ఇక అంతకుముందు Q1లో చాలా మందికి 100 శాతం వేరియబుల్ పే చెల్లించారు.

ఇతర ఐటీ కంపెనీల విషయానికి వస్తే, ఇన్ఫోసిస్ గత ఆర్థిక సంవత్సరంలో క్యూ3లో సగటున 60 శాతం వేరియబుల్ పే చెల్లించింది. ఇది అంతకుముందు క్వార్టర్‌లో చెల్లించిన 73 శాతం కంటే తక్కువ. హెచ్‌సీఎల్ టెక్నాలజీస్ విషయానికి వస్తే గతంలో కంపెనీ 85% మంది ఉద్యోగులకు వేరియబుల్ పే పూర్తి స్థాయిలో చెల్లించింది. ఈ విధానంలో పెద్దగా మార్పులు ఉండకపోవచ్చని అంచనా వేస్తున్నారు. విప్రో కూడా సగటున 85 శాతం కంటే ఎక్కువ మంది ఉద్యోగులకు వేరియబుల్ పే పూర్తి స్థాయిలో చెల్లించింది.

మొత్తంగా చూస్తే, ప్రధాన ఐటీ కంపెనీల వేరియబుల్ పే విధానాలు ఆయా కంపెనీల ఆర్థిక పనితీరు, మార్కెట్ పరిస్థితులు, వారి స్వంత విధానాలపై ఆధారపడి ఉన్నాయి. టీసీఎస్ వేతనాల పెంపును వాయిదా వేయడం, వేరియబుల్ పే కొంత తగ్గించడం ప్రస్తుత ఆర్థిక ఒత్తిడిని సూచిస్తోంది. ఇతర కంపెనీల క్యూ4 ఫలితాలు వెలువడిన తర్వాత మరింత స్పష్టత వచ్చే అవకాశం ఉంది.