సునీల్ గవాస్కర్ కి అండగా నిలిచిన వినోద్ కాంబ్లీ

భారత క్రికెట్ దిగ్గజం సునీల్ గవాస్కర్, మాజీ ఆటగాడు వినోద్ కాంబ్లీకి అండగా నిలిచారు. తీవ్ర ఆర్థిక ఇబ్బందులు, ఆరోగ్య సమస్యలతో పోరాడుతున్న కాంబ్లీ దీనస్థితిని చూసి చలించిన గవాస్కర్, తన 'చాంప్స్ ఫౌండేషన్' ద్వారా జీవితకాలం ఆర్థిక సహాయం అందించేందుకు ముందుకొచ్చారు.ఇటీవల ముంబైలోని వాంఖడే స్టేడియం 50వ వార్షికోత్సవ వేడుకల్లో గవాస్కర్, కాంబ్లీని కలిశారు. ఆ సమయంలో కాంబ్లీ నీరసించిన స్థితిలో కనిపించడంతో గవాస్కర్ తీవ్రంగా కలత చెందినట్లు సమాచారం. వెంటనే కాంబ్లీ వైద్యులను సంప్రదించిన గవాస్కర్, ఆయన ఆరోగ్య పరిస్థితి గురించి తెలుసుకున్నారు. అనంతరం, 2025 ఏప్రిల్ 1 నుంచి కాంబ్లీకి ప్రతినెలా రూ. 30,000 ఆర్థిక సహాయం, అలాగే వైద్య ఖర్చుల నిమిత్తం ప్రతి సంవత్సరం మరో రూ. 30,000 గ్రాంటును అందించాలని తన ఫౌండేషన్‌ను ఆదేశించారు.ఒకప్పుడు భారత జట్టులో కీలకమైన ఎడమచేతి వాటం బ్యాటర్‌గా వెలుగొందిన వినోద్ కాంబ్లీ, గత కొంతకాలంగా తీవ్ర ఆరోగ్య సమస్యలతో బాధపడుతున్నాడు. ఇటీవలే మూత్ర సంబంధిత ఇన్ఫెక్షన్లు, మెదడులో రక్తం గడ్డకట్టడం వంటి సమస్యలతో ఆసుపత్రిలో చేరాడు. రిటైర్మెంట్ తర్వాత ఆర్థికంగా నిలదొక్కుకోవడానికి కాంబ్లీ ఇబ్బంది పడుతున్నారు. బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (బీసీసీఐ) నుంచి వచ్చే పెన్షనే ఆయనకు ప్రధాన ఆదాయ వనరుగా ఉంది.1999లో గవాస్కర్ స్థాపించిన 'చాంప్స్ ఫౌండేషన్', అవసరంలో ఉన్న మాజీ అంతర్జాతీయ క్రీడాకారులకు నిరంతరం సహాయం అందిస్తోంది. కాంబ్లీకి సహాయం చేయడంపై గవాస్కర్ మాట్లాడుతూ, "అదృష్టం కలిసిరాని సమయంలో ఇబ్బందులు పడుతున్న కాంబ్లీ వంటి క్రికెటర్లను ఆదుకోవాలని 1983 ప్రపంచ కప్ విజేత జట్టు సభ్యులతో పాటు నేను కూడా భావిస్తున్నాను" అని తెలిపారు. కేవలం ఆర్థిక సహాయం అందించడమే కాకుండా, కాంబ్లీ మళ్లీ స్థిరపడటానికి తోడ్పడాలనేది తమ ఉద్దేశమని ఆయన పేర్కొన్నారు.1991 నుంచి 2000 వరకు భారత్ తరఫున 17 టెస్టులు, 104 వన్డేలు ఆడిన కాంబ్లీ, పలు రికార్డులు సృష్టించాడు. అయితే, గాయాలు, ఇతర కారణాల వల్ల అతడి కెరీర్ త్వరగా ముగిసింది. కష్టకాలంలో గవాస్కర్ అందించిన ఈ సహాయం తనకు 'ఆశాకిరణం' వంటిదని వినోద్ కాంబ్లీ కృతజ్ఞతలు తెలిపారు. రిటైర్మెంట్ తర్వాత క్రీడాకారులు ఎదుర్కొనే సవాళ్లను, వారికి అవసరమైన మద్దతు వ్యవస్థ ప్రాముఖ్యతను కాంబ్లీ ఉదంతం మరోసారి గుర్తుచేస్తోంది.