వెంటిలేటర్‌లో ఉన్న ఎయిర్ హోస్టెస్‌పై అత్యాచారం

ఒంటరిగా మహిళ కనిపిస్తే చాలు.. మృగాళ్లు రెచ్చిపోతున్నారు. కామంతో కన్నుమిన్ను కానకుండా.. చిన్న పెద్ద అనే తేడా లేకుండా లైంగిక దాడులకు తెగబడుతోన్న ఘటనలు నిత్యకృత్యంగా మారిపోయాయి. తాజాగా, అనారోగ్యంతో ఆసుపత్రిలో వెంటిలేటర్‌పై చికిత్స పొందుతున్న ఓ ఎయిర్‌హోస్టెస్‌పై కామాంధులు అత్యాచారానికి పాల్పడ్డారు. మానవత్వానికి మాయనిమచ్చలాంటి ఈ ఘటన ఢిల్లీ సమీపంలోని గురుగ్రామ్‌లోని ఓ ప్రైవేట్ ఆసుపత్రిలో చోటుచేసుకుంది. ఏప్రిల్ 6న జరిగిన ఈ ఘటనపై బాధితురాలి ఫిర్యాదు మేరకు పోలీసులు కేసు నమోదుచేశారు. పోలీసుల కథనం ప్రకారం.. బాధితురాలు ఆరోగ్యం బాగుండక ఆమె భర్త ఆసుపత్రిలో చేర్పించారు. ఈ సమయంలో ఆమెపై కామాంధుడు లైంగిక దాడికి తెగబడ్డాడు. ఆసుపత్రి నుంచి డిశ్చార్జ్ అయిన తర్వాత ఏప్రిల్ 13న ఆమె తన భర్తకు ఈ ఘటన గురించి తెలియజేయడంతో వెంటనే అతను పోలీసులకు సమాచారం ఇచ్చాడు.

బాధితురాలి (46) ఫిర్యాదు మేరకు గురుగ్రామ్ సదర్ పోలీస్ స్టేషన్‌లో కేసు నమోదు అయింది. ప్రస్తుతం పోలీసులు ఈ వ్యవహారంపై దర్యాప్తు జరుపుతున్నారు. ఫిర్యాదులో పేర్కొన్న ప్రకారం... సంస్థ తరఫున శిక్షణ కోసం బాధితురాలు గురుగ్రామ్‌కు వచ్చారు. ఈ సమయంలో ప్రమాదవశాత్తూ నీళ్లలో మునిగి గాయపడటంతో ఓ ప్రైవేట్ ఆసుపత్రిలో చేర్పించారు. తర్వాత, ఏప్రిల్ 5న మరో ప్రైవేట్ ఆసుపత్రికి ఆమెను తరలించి చికిత్స అందించారు. ఏప్రిల్ 6న వెంటిలేటర్‌పై ఉన్న సమయంలో కొంత మంది ఆసుపత్రి సిబ్బంది లైంగిక దాడికి పాల్పడ్డారని ఆమె ఆరోపించారు.

దాడి సమయంలో స్పృహలో లేకపోవడంతో మాట్లాడలేకపోయిన ఆమె భయపడిపోయారు. ఆ సమయంలో అక్కడ ఇద్దరు నర్సులు కూడా ఉన్నారని తెలిపారు. కోలుకున్న ఆమె డిశ్చార్జ్ అయిన అనంతరం తన భర్తకు విషయం చెప్పడంతో అతడె 112 నంబర్‌కు ఫోన్ చేసి పోలీసులకు సమాచారం ఇచ్చారు. అనంతరం లాయర్ సమక్షంలో కూడా ఫిర్యాదు చేశారు.

గురుగ్రామ్ పోలీస్ అధికారి సందీప్ కుమార్ మాట్లాడుతూ.. ‘బాధితురాలి ఫిర్యాదు మేరకు కేసు నమోదు చేసి, ఘటన జరిగిన ఆసుపత్రిలోని డ్యూటీ చార్ట్‌ను పరిశీలించడంతో పాటు, సీసీటీవీ ఫుటేజ్‌ను కూడా విశ్లేషిస్తున్నాం’ అని తెలిపారు. నిందితుడ్ని గుర్తించేందుకు చర్యలు తీసుకుంటున్నామని, బాధితురాలి స్టేట్మెంట్‌ను మేజిస్ట్రేట్ ఎదుట నమోదు చేశామని చెప్పారు. త్వరలో నిందితుడిని గుర్తించి అరెస్ట్ చేస్తామని ఆయన వెల్లడించారు.

కాగా,, ఆసుపత్రి యాజమాన్యం ఈ ఘటనపై ఎలాంటి వ్యాఖ్యలు చేయడానికి నిరాకరించింది. ఆసుపత్రి భద్రతా సిబ్బందిని సంప్రదించగా, వారు కూడా ఈ సంఘటన గురించి తెలియదని చెప్పడం గమనార్హం.