చివర్లో మెరుపులు,,,,రాణించిన ఢిల్లీ బ్యాటర్లు

రాజస్థాన్ రాయల్స్‌తో జరిగిన మ్యాచ్‌లో ఢిల్లీ క్యాపిటల్స్ బ్యాటర్లు రాణించారు. ఈ మ్యాచ్‌లో టాస్ ఓడి బ్యాటింగ్‌కు దిగిన ఢిల్లీ క్యాపిటల్స్.. నిర్ణీత 20 ఓవర్లలో 5 వికెట్ల నష్టానికి 188 పరుగులు చేసింది. దీంతో రాజస్థాన్‌ ముందు భారీ లక్ష్యాన్ని నిలిపింది. ఢిల్లీ క్యాపిటల్స్‌లో 37 బంతుల్లో 49 రన్స్ చేసిన అభిషేక్ పోరెల్.. టాప్‌ స్కోరర్‌గా నిలిచాడు. జోఫ్రా ఆర్చర్ 2 వికెట్లు తీశాడు.

ఈ మ్యాచ్‌లో టాస్ గెలిచిన రాజస్థాన్ రాయల్స్ జట్టు ఫస్టు బౌలింగ్ ఎంచుకుంది. ఢిల్లీలోని అరుణ్ జైట్లీ క్రికెట్ స్టేడియంలో ఈ మ్యాచ్ జరుగుతోంది. గత మ్యాచ్‌లో అనూహ్యంగా హ్యాట్రిక్ రనౌట్‌లై ముంబై ఇండియన్స్ చేతిలో ఓడిపోవడంతో ఢిల్లీ ఈ సీజన్‌లో తొలి ఓటమిని నమోదు చేసింది. దీంతో ఈ మ్యాచ్‌లో ఎలాగైనా గెలవాలనే పట్టుదలతో బరిలోకి దిగింది. ఇక ఈ మ్యాచ్‌ కోసం రెండు జట్లూ కూడా తుది జట్టులో ఎలాంటి మార్పుల్లేకుండానే బరిలోకి దిగాయి.

టాస్ ఓడి బ్యాటింగ్‌కు దిగిన ఢిల్లీకి ఓపెనర్లు శుభారంభం అందించారు. అభిషేక్ పోరెల్ ఎటాకింగ్ గేమ్‌ ఆడటంతో ఆ జట్టు 2.2 ఓవర్లలోనే 34/0 పరుగులు చేసింది. అయితే అదే స్కోరు వద్ద జేక్ ఫ్రెజర్ మెక్‌ గుర్క్ (9), కరుణ్ నాయర్ (0) రనౌట్ అయ్యారు. ఆ తర్వాత వచ్చిన కేఎల్ రాహుల్ (32 బంతుల్లో 38 రన్స్‌) ధాటిగా బ్యాటింగ్ చేయలేకపోయాడు. దీంతో వికెట్లు చేతిలో ఉన్నా ఆ జట్టు స్కోరు బోర్డు ఆశించినంత వేగాన్ని అందుకోలేకపోయింది.

చివర్లో ట్రిస్టన్ స్టబ్స్ (18 బంతుల్లో 34 రన్స్ నాటౌట్‌), అక్షర్ పటేల్ (14 బంతుల్లో 34 రన్స్‌), అభిషేక్ పోరెల్ (37 బంతుల్లో 49 రన్స్‌) రాణించారు. దీంతో నిర్ణీత 20 ఓవర్లలో డీసీ.. 188/5 స్కోరు నమోదు చేసింది. గత మ్యాచ్‌లో సత్తాచాటిన కరుణ్ నాయర్ పరుగులేమీ చేయకుండానే రనౌట్ రూపంలో పెవిలియన్ చేరాడు. ఇక రాజస్థాన్ రాయల్స్ బౌలర్లలో జోఫ్రా ఆర్చర్ 2 వికెట్లు తీయగా.. మహీశ్ తీక్షణ, వానిందు హసరంగ ఒక్కో వికెట్ పడగొట్టారు.