ఫ్లోరిడా వర్సిటీలో భీకర కాల్పులు.. ఇద్దరు మృతి.. క్యాంపస్ లాక్‌డౌన్

అమెరికాలో మరోసారి తుపాకీ కల్చర్ బుసలుకొట్టింది. ఫ్లోరిడా స్టేట్ యూనివర్సిటీలో దుండుగులు కాల్పులకు పాల్పడ్డారు. ఈ ఘటనలో ఇద్దరు ప్రాణాలు కోల్పోగా.. మరో ఐదుగురు గాయపడ్డారని, వీరిలో ఒకరి పరిస్థితి విషమంగా ఉందని ఆసుపత్రి వర్గాలు తెలిపాయి. తలహాసీ నగరంలోని ఫ్లోరిడా స్టేట్ యూనివర్సిటీలో గురువారం చోటుచేసుకున్న ఈ ఘటన అనంతరం మొత్తం క్యాంపస్‌ను లాక్‌డౌన్ చేశారు. విద్యార్థులను గదుల్లో నుంచి బయటకు రావొద్దని హెచ్చరించారు. స్థానిక మీడియా కథనాల ప్రకారం.. కాల్పులకు పాల్పడిన ఆగంతుకుడ్ని పోలీసులు అరెస్ట్ చేసినట్లు పేర్కొన్నారు. అతడ్ని ఫోనిక్స్ ఇక్నేర్‌ అనే వ్యక్తిగా గుర్తించారు. కానీ, పూర్తి వివరాలు వెల్లడించలేదు. మరొకరు గన్ ఫైరింగ్‌లో పాల్గొన్నారా? అన్న విషయాన్ని కూడా అధికారులు ధ్రువీకరించలేదు.

అప్పటి వరకూ ప్రశాంతంగా ఉన్న క్యాంపస్‌లో ఒక్కసారిగా కాల్పులు శబ్దానికి భయంతో పరుగులు తీశారు. స్థానిక మీడియాతో వేన్ అనే విద్యార్ధి మాట్లాడుతూ. ‘కాల్పుల శబ్దానికి భయపడి విద్యార్థులు అంతా పరుగులు తీయడం ప్రారంభించారు.. సుమారు నిమిషం తర్వాత, మేము 8 నుంచి 10 గన్ షాట్స్ విన్నాం.. గాయపడిన ఓ వ్యక్తిని నేను చూశాను.. కాల్పులు జరగడం ఎంతో వింతగా అనిపించింది. ముందు ప్రశాంతంగా ఉంది ఒక్కసారిగా అస్తవ్యస్తంగా మారిపోయింది’ అని అన్నాడు.

ఫ్లోరిడా స్టేట్ యూనివర్సిటీలో 40,000 మందికి పైగా విద్యార్థులు ఉన్నారు. వారంతా తమ తమ గదుల్లో నుంచి బయటకు రావద్దని యూనివర్సిటీ హెచ్చరించింది. క్యాంపస్ పరిసరాల్లో తుపాకితో ఉన్న ఓ వ్యక్తిని గుర్తించినట్టు యూనివర్సిటీ సోషల్ మీడియాలో పేర్కొంది. "పోలీసులు సంఘటనా స్థలంలో ఉన్నారు.. గదుల్లో నుంచి బయటకు రావద్దు.. తలుపులు, కిటికీలకు దూరంగా ఉండండి. రక్షణ చర్యలు తీసుకోవడానికి సిద్ధంగా ఉండండి’ అని సూచనలు చేసింది.

గాయపడినవారికి చికిత్స కొనసాగుతోందని తలహాసీ మెమోరియల్ హాస్పిటల్ ప్రకటించింది. ‘ఆరుగురు బాధితులు ఆసుపత్రిలో చేరగా.. ఒకరి పరిస్థితి విషమంగా ఉంది.. . మిగతావారు తీవ్రంగానే గాయపడ్డారు’ అని ఆసుపత్రి ప్రతినిధి ఏఎఫ్‌పీకు తెలిపారు. శామ్ స్వార్జ్ అనే విద్యార్ధి మాట్లాడుతూ.. ఘటన సమయంలో తాను స్టూడెంట్ యూనియన్ బేస్‌మెంట్‌లో ఉన్నానని, అందరూ భయంతో అరుస్తూ పరుగులు తీశారని, సుమారు 10 గన్ షాట్స్ వినిపించాయని వివరించాడు.

తాను సహా 8 మంది ఒక ప్రాజెక్ట్‌పై పనిచేస్తుండగా హాల్‌లో డస్ట్ బిన్లు, ప్లైవుడ్‌‌ను తలుపులకు అడ్డుగా పెట్టి లోపలి కూర్చొన్నామని చెప్పారు. విద్యార్థులు చేతులు పైకి పైకి ఎత్తుతూ భవనాల నుంచి బయటకి వస్తున్న వీడియోలు సోషల్ మీడియాలో వైరల్ అవుతున్నాయి. కాగా, అమెరికాలో కాల్పులు తరచుగా జరుగుతుంటాయి. ఆయుధాలు కలిగి ఉండటం రాజ్యాంగ హక్కు కావడంతో ఆయుధ నియంత్రణ చర్యలు తీసుకోవడం కష్టమవుతోంది. దీనిపై ప్రజల నుంచి తీవ్ర వ్యతిరేకత వ్యక్తమవుతున్నప్పటికీ రాజకీయ వ్యవస్థ ఇప్పటికీ స్పందించడంలో విఫలమవుతోంది. ఈ ఏడాదిలో ఇప్పటి వరకూ 81 కాల్పుల ఘటనలు అక్కడ చోటుచేసుకున్నాయి.