చెన్నై సూపర్ కింగ్స్ జట్టులోకి బేబీ ఏబీ డివిలియర్స్

చెన్నై సూపర్ కింగ్స్ అభిమానులకు ఇది అదిరిపోయే న్యూస్ అని చెప్పొచ్చు. వీక్ బ్యాటింగ్ లైనప్‌తో భారీ స్కోర్స్ ఛేజ్ చేయలేక సీఎస్కే ఇంతకాలం చతికిలపడిపోయింది. ఇకపై బ్యాటింగ్ వీక్‌గా ఉందనే బాధ లేదు జట్టులోకి బేబీ ఏబీడీ ఎంట్రీ ఇస్తున్నాడు. ఈ సౌతాఫ్రికా ఆటగాడు త్వరలోనే సీఎస్కే స్క్వాడ్‌లో జాయిన్ అవ్వనున్నాడు. ఈ విషయాన్ని చెన్నై సూపర్ కింగ్స్ అధికారికంగా ప్రకటించింది.

సౌతాఫ్రికా విధ్వంసకర ఆటగాడు బేబీ ఏబీ డివిలియర్స్‌గా పిలిచే డెవాల్డ్ బ్రెవిస్ త్వరలోనే చెన్నై సూపర్ కింగ్స్‌లో అడుగుపెట్టనున్నాడు. సీఎస్కే ఆటగాడు గుర్‌జపనీత్ సింగ్ గాయం కారణంగా ఈ ఐపీఎల్‌కు దూరమయ్యాడు. దాంతో గుర్‌జపనీత్ స్థానాన్ని డెవాల్డ్ బ్రెవిస్‌తో భర్తీ చేస్తున్నట్లు సీఎస్కే మేనేజ్‌‌మెంట్ తన సోషల్ మీడియాలో అధికారికంగా పోస్ట్ చేసింది.

ముంబై ఇండియన్స్ ఫ్రాంఛైజీతో డెవాల్డ్ బ్రెవిస్ ఐపీఎల్‌లో అడుగుపెట్టాడు. ఐపీఎల్ 2022 మెగా వేలంలో డెవాల్డ్ బ్రెవీస్‌ను ముంబై ఇండియన్స్ సొంతం చేసుకుంది. ఐపీఎల్ 2024 వరకు ముంబైలోనే కొనసాగిన బ్రెవిస్‌ను ఐపీఎల్ 2025కి ముందు ఆ ఫ్రాంఛైజీ బయటకు వదిలేసింది. అయితే మెగా వేలంలో ఎవ్వరూ కొనుగోలు చేయకపోవడంతో అన్‌సోల్డ్ ప్లేయర్‌గా మిగిలిపోయాడు.

తొలుత బ్రెవిస్‌ను ఢిల్లీ క్యాపిటల్స్ రీ ప్లేస్ చేస్తుందని అందరూ అనుకున్నప్పటికీ అది కుదర్లేదు. ఇంగ్లండ్ ఆటగాడు హ్యారీ బ్రూక్‌ను ఈ మెగా వేలంలో ఢిల్లీ క్యాపిటల్స్ సొంతం చేసుకుంది. అయితే, బ్రూక్ అనూహ్యంగా ఐపీఎల్ నుంచి వైదొలగడంతో అతని స్థానాన్ని బ్రెవీస్‌తో ఫిల్ చేయాలని అనుకున్నారు. కానీ అది ఎందుకో సాధ్యపడలేదు.

ఐపీఎల్ 2025 మెగా వేలానికి రూ.75 లక్షలతో వచ్చిన బ్రెవిస్‌ను ఏ ఫ్రాంఛైజీ కొనుగోలు చేసేందుకు ఇష్టపడలేదు. దాంతో అన్‌సోల్డ్‌గా మిగిలిపోయాడు. అయితే ఈ 21 ఏళ్ల బ్యాటింగ్ డైనమైట్ ఐపీఎల్ మెగా వేలం తర్వాత జరిగిన సౌతాఫ్రికా టీ20లో అదరగొట్టాడు. ఎంఐ కేప్‌టౌన్ తరఫున 12 మ్యాచ్‌లు ఆడిన బ్రెవిస్ 184.17 స్ట్రయిక్‌రేట్‌తో 291 పరుగులు చేశాడు.

రుతురాజ్ గైక్వాడ్ దూరంతో వీక్‌గా ఉన్న చెన్నై సూపర్ కింగ్స్ అనూహ్యంగా డెవాల్డ్ బ్రెవిస్‌ను జట్టులోకి తీసుకుంది. ఇప్పుడిప్పుడే పుంజుకుంటున్న సీఎస్కేకు బ్రెవిస్ రాక మరింత మేలు చేకూర్చే అవకాశం ఉంది. ఏడు మ్యాచ్‌లు ఆడిన సీఎస్కే రెండు గెలిచి ఐదు ఓడింది. ఐపీఎల్ 2025 ప్లే ఆఫ్స్‌కు సీఎస్కే చేరాలంటే మిగతా ఏడు మ్యాచ్‌లలో కనీసం ఆరైనా గెలవాల్సి ఉంటుంది. బ్రెవిస్ రాకతో సీఎస్కే మ్యాచ్ ఫలితాల్లో ఏమైనా మార్పులు జరుగుతాయేమో చూడాలి మరి.