బంగ్లాదేశ్ వెళ్తున్నారా,,, మరోసారి ఆలోచించండి.. తమ పౌరులకు అమెరికా హెచ్చరిక

బంగ్లాదేశ్‌లో చాలా కాలంగా తిరుగుబాటు దారులు ఆందోళనలు చేస్తూనే ఉన్నారు. గతేడాది ఆగస్టు నెలలోనే నిరసనలు తీవ్రం కాగా ఆ దేశ ప్రధాని షేక్ హసీనా తన పదివిని వదిలి ఇండియా పారిపోయి వచ్చారు. ఆ తర్వాత తాత్కాలిక ప్రభుత్వాధినేతగా మహమ్మద్ యూనస్ బాధ్యతలు చేపట్టారు. ఆపై పరిస్థితులను చక్కబరిచేందుకు చాలా గట్టిగానే కృషి చేశారు. అయినా ఆ దేశ పరిస్థితుల్లో పెద్దగా మార్పు రాలేదు. ఈ విషయాలను నేరుగా అంతర్జాతీయ మీడియా సంస్థలే చెబుతుండగా.. తాజాగా బంగ్లాదేశ్ వెళ్లాలనుకునే తమ దేశ పౌరులకు అమెరికా ట్రావెల్ అడ్వైజరీ హెచ్చరికలు జారీ చేసింది. ఆ దేశానికి వెళ్లాలనుకునే వారు మరోసారి ఆలోచించుకోవాలని సూచించింది. ఆ పూర్తి వివరాలు మీకోసం.

రిజర్వేషన్ల కోటా అంశంతో బంగ్లాదేశ్ రణరంగంగా మారింది. ముఖ్యంగా 2024 ఆగస్టు నెలలో నిరసనకారులు ప్రధాని ప్యాలెస్‌ను చుట్టుముట్టగా.. 15 ఏళ్ల పాలనకు ముగింపు పలికి షేక్ హసీనా ఆగస్టు 5వ తేదీన భారత దేశానికి పారిపోయి వచ్చారు. ప్రస్తుతం ఆమె ఇక్కడే ఆశ్రయం పొందుతుండగా.. ఆ తర్వాత నోబెల్ గ్రహీత ముహమ్మద్ యూనస్ తాత్కాలిక ప్రభుత్వాధినేతగా పదవీ బాధ్యతలు చేపట్టారు. ప్రస్తుతం ఆయనే బంగ్లాదేశ్ దేశాన్ని పాలిస్తున్నారు. అక్కడి పరిస్థితులను చక్కదిద్దేందుకు చాలా గట్టిగానే ప్రయత్నిస్తున్నారు. కానీ పూర్తి స్థాయిలో పరిస్థితులు చక్కదిద్ద లేకపోయారు.

ఇప్పటికీ పలు ప్రాంతాల్లో హింసాత్మక ఘటనలు చోటు చేసుకుంటూనే ఉన్నాయి. ఈ క్రమంలోనే తమ దేశానికి చెందిన.. బంగ్లాదేశ్ వెళ్లాలనుకుంటున్న పౌరులకు అమెరికా ట్రావెల్ అడ్వైజరీ జారీ చేసింది. దాదాపు సంవత్సర కాలంగా బంగ్లాదేశ్ అశాంతితో అట్టుడుకుతోందని చెప్పుకొచ్చింది. నేరాలు, ఉగ్రవాదం కూడా బాగా పెరిగాయని వివరించింది. ఆ దేశానికి వెళ్లాలనుకునే వారు.. ఒకటికి రెండు సార్లు బాగా ఆలోచించుకోవాలని సూచించింది. బంగ్లాదేశ్‌ను లెవెల్ 3 దేశంగా పరిగణిస్తున్నట్లు కూడా చెప్పుకొచ్చింది.

ముఖ్యంగా కగ్రాచారి, రంగమతి, బందర్భన్ కొండ ప్రాంతాలను లెవెల్ 4గా పరిగణిస్తున్నట్లు అమెరికా ట్రావెల్ అడ్వైజరీ తమ దేశ ప్రయాణికులకు వెల్లడించింది. ఆ ప్రాంతాలకు వీలైనంత వరకు వెళ్లకపోవడమే మేలని చెప్పింది. నేరాలు, దోపిడీ, తీవ్రవాదం, భద్రతా పరమైన సమస్యలు చాలా ఎక్కువగా ఉన్నాయని స్పష్టం చేసింది. కాబట్టి ఆ దేశానికి వెళ్లకండని ట్రంప్ ప్రభుత్వం హెచ్చరికలు జారీ చేసింది.