ఏఐయూడీఎఫ్ పార్టీకి చెందిన ఎమ్మెల్యే అమినుల్ ఇస్లాం అరెస్ట్

జమ్ముకశ్మీర్‌లోని పహల్గాంలో ఇటీవల జరిగిన ఉగ్రదాడి ఘటనలో పాకిస్థాన్‌ను సమర్థిస్తూ, రెచ్చగొట్టే విధంగా వ్యాఖ్యలు చేశారన్న ఆరోపణలపై ఏఐయూడీఎఫ్ పార్టీకి చెందిన ఎమ్మెల్యే అమినుల్ ఇస్లాంను అసోం పోలీసులు గురువారం అరెస్ట్ చేశారు. ఆయనపై దేశద్రోహం అభియోగాలు మోపారు.ఈ అరెస్టుకు అసోం ముఖ్యమంత్రి హిమంత బిశ్వశర్మ ఆదేశించారు. గౌహతిలో ఏర్పాటు చేసిన మీడియా సమావేశంలో ముఖ్యమంత్రి ఈ విషయాన్ని వెల్లడించారు."సంబంధిత ఎమ్మెల్యే పహల్గాం దాడి వ్యవహారంలో పాకిస్థాన్‌ను సమర్థించినట్లుగా ఉన్న ఒక వీడియోను మేము సమీక్షించాం. దీనిపై చర్యలు తీసుకోవాలని పోలీసులను ఆదేశించాను. ఆయనను అరెస్ట్ చేసినట్లు డీజీపీ ధృవీకరించారు" అని హిమంత బిశ్వశర్మ తెలిపారు. ధింగ్ నియోజకవర్గ శాసనసభ్యుడైన అమినుల్ ఇస్లాంను న్యాయస్థానం ముందు హాజరుపరుస్తామని, ఈ వ్యవహారాన్ని ప్రభుత్వం సరైన రీతిలో ముగిస్తుందని ఆయన స్పష్టం చేశారు.ఎమ్మెల్యే అమినుల్ ఇస్లాం చేసినట్లుగా చెబుతున్న వ్యాఖ్యలకు సంబంధించిన వీడియో క్లిప్ సోషల్ మీడియాలో విస్తృతంగా ప్రచారం కావడంతో ఈ వివాదం వెలుగులోకి వచ్చింది. ఈ వీడియో ఆధారంగా అసోం పోలీసులు సుమోటోగా కేసు నమోదు చేశారు. ఈ వీడియోలోని అంశాలు ప్రజల మధ్య అశాంతిని రేకెత్తించేలా, తప్పుడు సమాచారాన్ని వ్యాప్తి చేసేలా ఉన్నాయని అధికారులు భావిస్తున్నారు.ఈ అరెస్ట్‌పై అసోం పోలీసులు 'ఎక్స్' వేదికగా ఒక ప్రకటన విడుదల చేశారు. "ప్రజలను తప్పుదోవ పట్టించేలా, రెచ్చగొట్టేలా ధింగ్ ఎమ్మెల్యే అమినుల్ ఇస్లాం చేసిన ప్రకటన వైరల్ అయింది. ఇది ప్రతికూల పరిస్థితులకు దారితీసే అవకాశం ఉన్నందున, భారతీయ న్యాయ సంహిత (బీఎన్ఎస్లోని సెక్షన్లు 152/196/197(1)/113(3)/352/353 కింద నగావ్ పోలీస్ స్టేషన్‌లో కేసు (347/25) నమోదు చేయబడింది. దాని ప్రకారం ఆయనను అరెస్ట్ చేయడం జరిగింది" అని ఆ ప్రకటనలో పేర్కొన్నారు.