పహల్గాం ఉగ్రదాడిని తీవ్రంగా ఖండించిన రిలయన్స్ అధినేత ముకేశ్ అంబానీ
national | Suryaa Desk | Published : Thu, Apr 24, 2025, 08:01 PM
జమ్మూకశ్మీర్లోని పహల్గాం వద్ద ఇటీవల జరిగిన ఉగ్రవాద దాడి ఘటనపై రిలయన్స్ ఇండస్ట్రీస్ ఛైర్మన్, మేనేజింగ్ డైరెక్టర్ ముకేశ్ అంబానీ తీవ్ర దిగ్భ్రాంతి వ్యక్తం చేశారు. ఈ పాశవిక చర్యను ఆయన తీవ్రంగా ఖండించారు. ఉగ్రవాదుల దాడిలో అమాయక ప్రజలు ప్రాణాలు కోల్పోవడం పట్ల విచారం వ్యక్తం చేస్తూ, మృతుల కుటుంబాలకు తన ప్రగాఢ సానుభూతిని తెలియజేశారు.ఈ దుర్ఘటనలో గాయపడిన వారు త్వరగా కోలుకోవాలని ముకేశ్ అంబానీ ఆకాంక్షించారు. అంతేకాకుండా, ఈ దాడిలో గాయపడిన వారికి అండగా నిలుస్తూ కీలక ప్రకటన చేశారు. క్షతగాత్రులకు అవసరమైన అత్యున్నత వైద్య సేవలను ముంబైలోని రిలయన్స్ ఫౌండేషన్కు చెందిన సర్ హరికిషన్ దాస్ నరోత్తమ్ రిలయన్స్ ఫౌండేషన్ హాస్పిటల్లో పూర్తిగా ఉచితంగా అందిస్తామని ఆయన హామీ ఇచ్చారు.ఉగ్రవాదం అనేది మానవాళికి పెను ముప్పు అని, అది ఏ రూపంలో ఉన్నా సహించరాదని అంబానీ స్పష్టం చేశారు. ఇలాంటి అమానవీయ చర్యలకు పాల్పడే వారిని ఉపేక్షించకూడదని అన్నారు. ఉగ్రవాదాన్ని సమూలంగా నిర్మూలించేందుకు భారత ప్రభుత్వం, ప్రధానమంత్రి నరేంద్ర మోదీ చేస్తున్న కృషికి రిలయన్స్ ఇండస్ట్రీస్ ఎల్లప్పుడూ అండగా ఉంటుందని ఆయన ఒక ప్రకటనలో పేర్కొన్నారు. దేశ భద్రతకు సంబంధించిన విషయాల్లో ప్రభుత్వానికి తమ పూర్తి మద్దతు కొనసాగుతుందని ముకేశ్ అంబానీ వెల్లడించారు.
|
|