యునిసెఫ్‌తో ప్రభుత్వం ఒప్పందం.. 2 లక్షల మంది ఏపీ యువతకు

ఆంధ్రప్రదేశ్‌ యువతకు శుభవార్త. యువతలోని నైపుణ్యాలను అభివృద్ధి చేయాలనే లక్ష్యంతో ఆంధ్రప్రదేశ్ ప్రభుత్వం కీలక ఒప్పందం చేసుకుంది. యువతలో నైపుణ్యాభివృద్ధి, సాధికారతకు యునిసెఫ్‌తో ఏపీ ప్రభుత్వం ఒప్పందం చేసుకుంది. 2 లక్షల మంది విద్యార్థులకు వ్యాపార నైపుణ్యాలను పెంపొందించడమే లక్ష్యంగా ఆంధ్రప్రదేశ్ ప్రభుత్వం యునిసెఫ్ మధ్య అవగాహన ఒప్పందం కుదిరింది. ఏపీ ఐటీ శాఖ మంత్రి నారా లోకేష్ సమక్షంలో యునిసెఫ్ ఏపీ నైపుణ్యాభివృద్ధి సంస్థ ఎంవోయూ కుదిరింది. ఉండవల్లిలోని నారా లోకేష్ నివాసంలో జరిగిన కార్యక్రమంలో ఏపీఎస్ఎస్‌డీసీ, యునిసెఫ్ ప్రతినిధులు ఎంవోయూపై సంతకాలు చేశారు.

ఈ ఒప్పందం ప్రకారం ఆంధ్రప్రదేశ్ ప్రభుత్వం, యూనిసెఫ్ కలిసి మూడు యువశక్తి అభివృద్ధి కార్యక్రమాలను ప్రారంభించనున్నాయి. యునిసెఫ్, ఏపీ నైపుణ్యాభివృద్ధి సంస్థ పరస్పర సహకారంతో యూత్ ఫర్ సోషల్ ఇంపాక్ట్ , యూత్ హబ్, పాస్‌పోర్ట్ టు ఎర్నింగ్ కార్యక్రమాలను అమలు చేయనున్నాయి. ఏపీ ప్రభుత్వం ప్రతి ఇంటికో వ్యాపారవేత్తను తయారుచేయాలని లక్ష్యంగా సాగుతోంది. ఈ లక్ష్యసాధనలో యునిసెఫ్ ఒప్పందం కీలకంగా మారుతుందని అధికారులు చెప్తున్నారు. యువతలో నూతన ఆవిష్కరణలు, ఇంక్లూజన్, స్థిర జీవనోపాధి అవకాశాలను ఈ కార్యక్రమాలు పెంపొందించనున్నాయి.

యూత్ ఫర్ సోషల్ ఇంపాక్ట్ కార్యక్రమం ద్వారా డిగ్రీ, ఇంజనీరింగ్, పాలిటెక్నిక్ చదువుతున్న సుమారు 2 లక్షల మంది యువతలో వ్యాపార నైపుణ్యాలను పెంపొందిస్తారు. అలాగే యూనిసెఫ్ గ్లోబల్ UPSHIFT ఫ్రేమ్‌వర్క్ ద్వారా ప్రాబ్లమ్ సాల్వింగ్ స్కిల్స్ పెంచుకునే విషయంలో శిక్షణ ఇవ్వనున్నారు. ఇక యూత్ హబ్ అనేది.. ఆంధ్రప్రదేశ్ నైపుణ్యం పోర్టల్‌తో అనుసంధానించిన మల్టీలాంగ్వేజ్ డిజిటల్ వేదిక. ఈ వేదిక ద్వారా యువతకు ఉద్యోగాలు, నైపుణ్యాభివృద్ధి, వాలంటీర్‌షిప్ అవకాశాలను కల్పిస్తారు.

పాస్‌పోర్ట్ టు ఎర్నింగ్ కార్యక్రమం ద్వారా 15 నుంచి 29 ఏళ్ల మధ్య వయసు కలిగిన యువతకు ఉచితంగా అంతర్జాతీయ స్థాయి డిజిటల్, ప్రొఫెషనల్ నైపుణ్య శిక్షణను అందించనున్నారు. మంత్రి నారా లోకేష్ నివాసంలో జరిగిన ఈ కార్యక్రమంలో ఏపీ నైపుణ్యాభివృద్ధి, శిక్షణ విభాగం కార్యదర్శి కోన శశిధర్, ఏపీ స్టేట్ స్కిల్ డెవలప్‌మెంట్ కార్పోరేషన్ ఎండీ గణేష్ కుమార్, యునిసెఫ్ ప్రతినిధులు పాల్గొన్నారు.