విమానం నడుపుతూ పర్యాటక దేశంలో ల్యాండైన థాయ్ రాజు, రాణి

దేశాధినేతల పర్యటనలంటే భారీ భద్రత మధ్య, విస్తృతమైన ఏర్పాట్లు చేస్తారు. అతిథి మర్యాదల్లో భాగంగా ఏ లోటు రాకుండా జాగ్రత్తగా చూసుకుంటారు. అటు అతిథి కానీ, ఇటు ఆతిథ్య దేశం కానీ చాలా జాగ్రత్తగా షెడ్యూల్ దగ్గర నుంచి అరేంజ్‌మెంట్స్ వరకు క్షుణ్ణంగా పరిశీలించుకుంటారు. కానీ, థాయ్‌లాండ్ రాజు మహా వజ్రలాంగ్‌కోర్న్‌ మాత్రం ఇవేవీ లేకుండానే.. ఏం చక్కా భూటాన్‌కు వెళ్లారు. అది కూడా తాను ప్రయాణించే విమానాన్ని తానే నడుపుకుంటూ చేరుకున్నారు. కో పైలట్‌గా తన సతీమణి సుతీద వ్యవహరించారు.

ఒకప్పుడు సామాన్యులైతే భార్యను సైకిల్ మీద ఎక్కించుకొని తిప్పడం చాలా సంతోషపడేవారు. తర్వాత బైక్, ఇంకాస్త స్థోమత ఉన్నవాళ్లు కార్లల్లో, స్థితిమంతులైతే విలాసవంతమైన వాహనాల్లో తిప్పుతారు. ఇల్లాలి సంతోషం కోసం విమానాల్లో విహరించే భర్తలు కూడా ఉంటారు. కానీ, ఈ రాజైతే ఏకంగా సతీమణిని పక్కన కూర్చొబెట్టుకొని ఆకాశంలో విహరిస్తూ అధికారికంగా విదేశీ పర్యటనకు వెళ్లారు. ఇప్పుడు ఈ వీడియో సోషల్ మీడియాలో చక్కర్లు కొడుతోంది.

భూటాన్ రాజు ఆతిథ్యం మేరకు థాయ్‌లాండ్ రాజు మహా వజ్రలాంగ్‌కోర్న్‌ తన రాజకుటుంబానికి చెందిన బోయింగ్ 737-800 విమానాన్ని నడుపుకుంటూ బయలుదేరారు. రాణి సుతీదతో కలిసి ప్రపంచంలోనే అత్యంత క్లిష్టమైన ఎయిర్‌పోర్టులలో ఒకటైన.. భూటాన్‌లోని ‘పారో అంతర్జాతీయ విమానాశ్రయం’లో సురక్షితంగా, అత్యంత చాకచక్యంగా విమానాన్ని దింపారు.

భూటాన్‌లో అధికారికంగా మొదటిసారి పర్యటనకు వెళ్లిన థాయ్ రాజకుటుంబానికి ఆ దేశ రాజకుటుంబం తరఫున ఘనంగా స్వాగం లభించింది. భూటాన్‌లో ఏప్రిల్ 25 నుంచి 28వరకు నాలుగు రోజుల పర్యటనలో పలు అధికారిక కార్యక్రమాల్లో పాల్గొన్న అనంతరం , తిరిగి థాయిలాండ్‌కు బయల్దేరారు రాజ దంపతులు. అప్పుడు కూడా రాజు మహా వజ్రలాంగ్‌కోర్న్‌ స్వయంగా విమానం నడిపారు.

2019లో థాయిలాండ్ రాజుగా మహా వజ్రలాంగ్‌కోర్న్‌ బాధ్యతలు స్వీకరించారు. అంతకుముందు ఆయన రాయల్ థాయ్ ఆర్మీలో కెరీర్ ఆఫీసర్‌గా పనిచేసేవారు. ఎఫ్-5, ఎఫ్-16 యుద్ధ విమానాలతో పాటు బోయింగ్ 737-400 వంటి విమానాలను నడపడంలో ఆయన శిక్షణ తీసుకున్నారు. విమానం నడిపేందుకు అధికారికంగా లైసెన్స్ కూడా తీసుకున్నారు. తనకు ఉన్న ఈ అనుభవంతోనే రాజు స్వయంగా విమానం నడిపారు. క్లిష్టమైన పారో విమానాశ్రయంలో విజయవంతంగా విమానాన్ని ల్యాండ్ చేయడం పట్ల విమానయాన రంగ నిపుణులతో పాటు సాధారణ ప్రజలు సైతం ప్రశంసలు కురిపిస్తున్నారు.