జైపూర్‌లో ముంబై ఇండియన్స్ క్లాస్ ఇన్నింగ్స్,,,రాజస్థాన్‌కు మళ్లీ భారీ టార్గెటే!

రాజస్థాన్ రాయల్స్‌పై ముంబై ఇండియన్స్ క్లాస్ ఇన్నింగ్స్‌తో 200కు పైగా పరుగులు సాధించారు. నిలకడగా ఆడిన ఆటగాళ్లు భారీ సిక్సర్లు బాదకుండానే భారీ స్కోర్ చేశారు. ఓపెనర్లు రోహిత్ శర్మ, ర్యాన్ రికెల్టన్ మొదటి పది ఓవర్లు క్రీజులో ఉన్నప్పటికీ ఓవర్‌కి పది చొప్పునే రన్ రేట్ మెయింటేన్ చేసుకుంటూ వచ్చారు. ఈ మ్యాచ్‌లో రోహిత్ శర్మ ఒక్క సిక్సర్ కూడా బాదకుండానే హాఫ్ సెంచరీ చేయడం విశేషం. ఆఖరి ఐదు ఓవర్లలో హార్దిక్-సూర్య కలిసి 71 పరుగులు బాదారు.

టాస్ గెలిచిన రాజస్థాన్ రాయల్స్ కెప్టెన్ రియాన్ పరాగ్ బౌలింగ్ ఎంచుకోగా, ముంబై ఇండియన్స్ ఫస్ట్ బ్యాటింగ్‌కి వచ్చింది. ఓపెనర్లు ర్యాన్ రికెల్టన్, రోహిత్ శర్మ ముంబైకి శుభారంభం అందించారు. వీరిద్దరూ తొలి వికెట్‌కు 116 పరుగుల భాగస్వామ్యం నెలకొల్పారు. ర్యాన్ రికెల్టన్ 38 బంతుల్లో ఏడు ఫోర్లు, మూడు సిక్సర్లతో 61 పరుగులు చేయగా, రోహిత్ శర్మ 36 బంతుల్లో తొమ్మిది ఫోర్లతో 53 పరుగులు చేశాడు.

ర్యాన్ రికెల్టన్, రోహిత్ శర్మ వెంటవెంటనే అవుటవడంతో ఆ తర్వాత క్రీజులోకి వచ్చిన సూర్యకుమార్ యాదవ్ స్కోర్ బోర్డును ముందుకు నడిపించారు. 12వ ఓవర్‌లో సూర్యకుమార్ యాదవ్ క్రీజులోకి రాగా, హార్దిక్ పాండ్యా 13వ ఓవర్‌లో బ్యాటింగ్‌కి వచ్చాడు. వీరిద్దరూ కలిసి మూడో వికెట్‌కు 94 పరుగుల భాగస్వామ్యం నెలకొల్పారు. సూర్యకుమార్ యాదవ్ 23 బంతుల్లో 4 ఫోర్లు, 3 సిక్సర్లతో 48 పరుగులు చేయగా, హార్దిక్ పాండ్యా 23 బంతుల్లో ఆరు ఫోర్లు, ఒక్క సిక్సర్‌తో 48 పరగుగులు చేశాడు. దాంతో ముంబై ఇండియన్స్ నిర్ణీత 20 ఓవర్లలో 2 వికెట్ల నష్టానికి 217 పరుగులు చేసింది. ఆఖరి ఐదు ఓవర్లలో ముంబై ఇండియన్స్ వికెట్ నష్టపోకుండా 71 పరుగులు చేసింది.

రాజస్థాన్ రాయల్స్ బౌలర్లలో మహీష్ తీక్షణ, రియాన్ పరాగ్ చెరొక వికెట్ తీసుకున్నారు. పిచ్ స్లోగా ఉండటంతో స్పిన్నర్లు రాణించినంతగా పేస్ బౌలర్లు వికెట్లు తీయలేకపోయారు. నేహాల్ మధ్వాల్ అద్భుతమైన యార్కర్లతో డెత్ ఓవర్లలో పెద్దగా పరుగులు రాకుండా కట్టడి చేశాడు. జోఫ్రా ఆర్చర్, ఫజల్ హక్ ఫరూఖీ, కుమార కార్తికేయ, తీక్షణ ఓవర్‌కి పదికి పైగా పరుగులు సమర్పించుకున్నారు.