ఆరు వేల పరుగులు.. ఫస్ట్ ముంబై ఇండియన్స్ ప్లేయర్‌గా హిట్‌మ్యాన్

పీఎల్‌లో రోహిత్ శర్మ అరుదైన రికార్డ్ నెలకొల్పాడు. జైపూర్ వేదికగా రాజస్థాన్ రాయల్స్‌తో జరుగుతున్న మ్యాచ్‌లో ఈ ఘనత సాధించాడు. ఐపీఎల్ హిస్టరీలో తొలి ముంబై ఇండియన్స్ ప్లేయర్‌గా హిట్‌మ్యాన్ నిలిచాడు. ఇప్పటి వరకు ఏ ముంబై ఇండియన్స్ ప్లేయర్‌కు ఈ ఘనత దక్కకపోవడం విశేషం.

ఐపీఎల్ 2025లో భాగంగా జైపూర్‌లో జరుగుతున్న మ్యాచ్‌‌లో టాస్ గెలిచిన రాజస్థాన్ రాయల్స్ కెప్టెన్ రియాన్ పరాగ్ బౌలింగ్ ఎంచుకున్నాడు. బ్యాటింగ్‌కి వచ్చిన ముంబై ఇండియన్స్ జట్టు మొదటి పది ఓవర్లలో ఎలాంటి వికెట్ కోల్పోకుండా అద్భుతంగా రాణించింది. ఈ మ్యాచ్‌లో ఓపెనర్ రోహిత్ శర్మ ముంబై ఇండియన్స్ తరఫున ఐపీఎల్‌లో ఆరు వేల పరుగులను నమోదు చేశాడు. ముంబై ఇండియన్స్ తరఫున ఈ ఘనత సాధించిన తొలి క్రికెటర్‌గా రోహిత్ శర్మ నిలిచాడు.

డక్కన్ ఛార్జెస్‌తో ఐపీఎల్‌లో అడుగుపెట్టిన రోహిత్ శర్మ ఆ తర్వాత ముంబై ఇండియన్స్‌లోకి వెళ్లాడు. ముంబై ఇండియన్స్ తరఫున ఆటగాడిగా ఆడుతూ కెప్టెన్‌గా బాధ్యతలు స్వీకరించాడు. రోహిత్ కెప్టెన్సీలో ముంబై ఇండియన్స్ ఐదు ఐపీఎల్ ట్రోఫీలు సాధించింది. ఓవరాల్‌గా ఐపీఎల్‌లో 6905 పరుగులు చేయగా.. వాటిల్లో ఆరు వేలకు పైగా పరుగులు ముంబై ఇండియన్స్ తరఫునే చేయడం విశేషం. ఐపీఎల్ కెరీర్‌లో రోహిత్ శర్మ 267 మ్యాచ్‌లు ఆడాడు. 109 హైయెస్ట్‌తో ఐపీఎల్‌లో రెండు సెంచరీలు నమోదు చేశాడు. రెండు సెంచరీలు, 46 హాఫ్ సెంచరీలతో 6905 పరుగులు నమోదు చేశాడు.

జైపూర్ వేదికగా రాజస్థాన్ రాయల్స్‌తో జరుగుతున్న మ్యాచ్‌లో రోహిత్ శర్మ హాఫ్ సెంచరీ నమోదు చేశాడు. 31 బంతుల్లోనే రోహిత్ యాభై పరుగులు చేశాడు. నిదానంగా ఇన్నింగ్స్‌ను ఆరంభించిన హిట్ మ్యాన్ అనవసరపు షాట్లకు వెళ్లకుండా ఇన్నింగ్స్‌ను ముందుకు తీసుకెళ్లాడు. రోహిత్ శర్మ తన హాఫ్ సెంచరీలో ఒక్క సిక్సర్ కూడా నమోదు చేయకపోవడం విశేషం. ఈ మ్యాచ్‌లో తొమ్మిది ఫోర్లతో 31 బంతుల్లో హాఫ్ సెంచరీ నమోదు చేశాడు. ర్యాన్ రికెల్టన్, రోహిత్ శర్మ తొలి వికెట్‌కు 116 పరుగులు జోడించారు. ఈ మ్యాచ్‌లో 35 బంతులు ఆడిన రోహిత్ 53 పరుగులు చేసి అవుటయ్యాడు.