ఐపీఎల్ నుంచి మ్యాక్స్‌వెల్ ఔట్.. పంజాబ్ కింగ్స్ బిగ్ అప్‌డేట్

ఐపీఎల్ 2025 నుంచి పంజాబ్ కింగ్స్ ఆల్‌రౌండర్ గ్లెన్ మ్యాక్స్‌వెల్ రూలుడ్ అవుట్ అయ్యాడు. గాయం కారణంగా మ్యాక్స్‌వెల్ ఐపీఎల్‌కు దూరమైనట్లు పంజాబ్ కింగ్స్ మేనేజ్‌మెంట్ అధికారికంగా వెల్లడించింది. ఈ సీజన్‌లో మ్యాక్స్‌వెల్ దారుణంగా విఫలమయ్యాడు. ఐపీఎల్ మెగా వేలంలో మ్యాక్‌వెల్‌ను పంజాబ్ కింగ్స్ రూ.4.2 కోట్లకు సొంతం చేసుకుంది. ఆరు ఇన్నింగ్స్‌లలో బ్యాటింగ్ చేసిన మ్యాక్సీ కేవలం 48 పరుగులు మాత్రమే చేశాడు. ప్లేయింగ్ 11లో మ్యాక్స్‌‌వెల్‌ను ఆడించడంపై తీవ్ర విమర్శలు కూడా వచ్చాయి.

గ్లెన్ మ్యాక్స్‌వెల్ ఐపీఎల్ నుంచి అర్ధంతరంగా బయటకు వెళ్లిపోయాడు. కొంతకాలంగా ఫామ్‌లేని కారణంగా సతమతమవుతున్న మ్యాక్స్‌వెల్ ఈ ఐపీఎల్‌లో తన మార్క్ చూయించలేకపోయాడు. ఫలితంగా ఎన్నో విమర్శలు ఎదుర్కొన్న అనంతరం గాయం కారణంతో పంజాబ్ కింగ్స్ జట్టు నుంచి ఐపీఎల్‌కు దూరమయ్యాడు. ఈ విషయాన్ని పంజాబ్ కింగ్స్ ఫ్రాంఛైజీ అధికారికంగా ప్రకటించింది.

"ఐపీఎల్ 2025 సీజన్ నుంచి గ్లెన్ మ్యాక్స్‌వెల్ రూలుడ్ ఔట్ అయ్యాడు. ఈ సీజన్‌లో ఇంకొన్ని మ్యాచ్‌లు మిగిలుండగానే వేలికి గాయం కావడంతో సీజన్‌ నుంచి బయటకు వెళ్లా్ల్సి వచ్చింది. అతను త్వరగా కోలుకోవాలని మేము కోరుకుంటున్నాము" అని పంజాబ్ కింగ్స్ తన అధికారిక సోషల్ మీడియా అకౌంట్లలో పోస్ట్ చేసింది.

ఐపీఎల్ మెగా వేలంలో రూ.4.2 కోట్ల ధరకు మ్యాక్స్‌వెల్‌ను పంజాబ్ కింగ్స్ సొంతం చేసుకుంది. ఐపీఎల్ 2024లో అంతగా రాణించకపోవడంతో రాయల్ ఛాలెంజర్స్ బెంగళూరు ఫ్రాంచైజీ మెగా వేలంలో బయటకు వదిలేసింది. అయితే ఐపీఎల్ 2025లో ఇరగదీస్తాడనుకున్న మ్యాక్సీ అదే పేలవ ప్రదర్శన చేశాడు. ఆల్‌రౌండర్ అయిన మ్యాక్స్‌వెల్ బౌలింగ్‌లో ఫర్వాలేదు అనిపించినా బ్యాటింగ్‌లో మాత్రం నిరుత్సాహపరిచాడు.

ఈ సీజన్‌లో పంజాబ్ కింగ్స్ తరఫున ఏడు మ్యాచ్‌లు ఆడిన మ్యాక్స్‌వెల్ ఆరు మ్యాచ్‌లలో బ్యాటింగ్‌కి దిగాడు. ఆరు ఇన్నింగ్స్‌లలో కలిపి కేవలం 48 పరుగులు మాత్రమే చేశాడు. అందులో అత్యధికంగా చేసిన పరుగులు 30. మ్యాక్స్‌వెల్ ఆఖరి ఆరు ఇన్నింగ్స్‌ల స్కోర్ పరిశీలిస్తే 0 (1), 30 (20), 1 (2), 3 (7), 7 (10), 7 (8)గా ఉన్నాయి.

కోల్‌కతా నైట్ రైడర్స్‌తో ఈడెన్ గార్డెన్స్ వేదికగా జరిగిన మ్యాచ్‌లో 8 బంతులు ఆడి కేవలం 7 పరుగులు చేశాడు. దాంతో వరుసగా విఫలమవుతున్నప్పటికీ మ్యాక్స్‌వెల్‌కి ప్లేయింగ్ 11లో చోటు కల్పించడంపై విమర్శలు ఎక్కువయ్యాయి. పంజాబ్ హెడ్ కోచ్ పాంటింగ్ కావాలనే ఆడిస్తున్నాడని నెట్టింట విమర్శలు వచ్చాయి. చెపాక్ వేదికగా చెన్నై సూపర్ కింగ్స్‌తో జరిగిన మ్యాచ్‌లో వేలికి గాయమైందంటూ మ్యాక్స్‌వెల్‌కి ప్లేయింగ్ 11లో చోటు కల్పించలేదు. రానున్న మ్యాచ్‌లలో కూడా మ్యాక్సీని పక్కనబెట్టే అవకాశాలు ఉండటంతో గాయం పేరు చెప్పి ఐపీఎల్ 2025 నుంచే వైదొలిగినట్టుంది.