ఐపీఎల్ 2025లో,,,సాయి సుదర్శన్ మరో రికార్డు బద్దలు!

ఐపీఎల్ 2025లో గుజరాత్ టైటాన్స్ ఓపెనర్ సాయి సుదర్శన్ హవా కొనసాగుతోంది. అంచనాలు లేకుండా బరిలోకి దిగిన ఈ ప్లేయర్.. సంచలన ప్రదర్శనతో ఈ టోర్నీలో అదరగొడుతున్నాడు. ముఖ్యంగా గుజరాత్ టైటాన్స్‌కు మెరుపు శుభారంభాన్ని అందించడంలో తన వంతు పాత్రను పోషిస్తున్నాడు. ఆరెంజ్ క్యాప్ రేసులో అదరగొడుతున్న ఈ ప్లేయర్.. ఐపీఎల్ 2025లో 500 పరుగుల మార్కును దాటిన తొలి బ్యాటర్‌గా రికార్డు సృష్టించాడు. శుక్రవారం గుజరాత్ టైటాన్స్ సన్‌రైజర్స్ హైదరాబాద్‌తో మ్యాచ్‌లో అతడు ఈ ఫీట్ సాధించాడు. అంతేకాకుండా ఐపీఎల్‌లో 1500 రన్స్‌ను కూడా పూర్తి చేసుకున్నాడు.

ఈ టోర్నీ తొలి మ్యాచ్‌లో 41 బంతుల్లో 74 రన్స్ చేసిన సుదర్శన్.. ఐపీఎల్ 2025 ఎడిషన్‌ను ఘనంగా ఆరంభించాడు. ఆ తర్వాత ముంబై ఇండియన్స్‌పై (41 బంతుల్లో 63 రన్స్‌), ఆర్సీబీపై (36 బంతుల్లో 49 రన్స్‌), సన్‌రైజర్స్ హైదరాబాద్‌పై (9 బంతుల్లో 5 రన్స్‌), రాజస్థాన్ రాయల్స్‌పై (53 బంతుల్లో 82 రన్స్‌), లక్నో సూపర్ జెయింట్స్ (37 బంతుల్లో 56 రన్స్‌), ఢిల్లీ క్యాపిటల్స్‌ (21 బంతుల్లో 36 రన్స్‌), కోల్‌కతా నైట్ రైడర్స్ (36 బంతుల్లో 52 రన్స్‌), రాజస్థాన్ రాయల్స్ (30 బంతుల్లో 39 రన్స్‌) తాజాగా సన్‌రైజర్స్ హైదరాబాద్‌తో మ్యాచ్‌లో 23 బంతుల్లో 48 రన్స్ చేసి సత్తాచాటాడు.

దీంతో ఐపీఎల్ 2025లో సూర్యకుమార్ యాదవ్‌ (475 రన్స్‌)ను అధిగమించి మరోసారి ఆరెంజ్‌ క్యాప్ దక్కించుకున్నాడు. ఈ మ్యాచ్‌లో సుదర్శన్‌తో పాటు మరో ఓపెనర్ గిల్ కూడా రాణించడంతో గుజరాత్ టైటాన్స్ పవర్‌ ప్లే ముగిసే సరికి 82/0తో నిలిచింది. కాగా తన ప్రదర్శనతో అందరి దృష్టినీ ఆకర్షిస్తున్న సాయి సుదర్శన్.. టీమిండియాలో చోటే లక్ష్యంగా అడుగులు వేస్తున్నాడు. ఇప్పటికే రవిశాస్త్రి లాంటి మాజీలు.. అతడికి భారత జట్టులో చోటు కల్పించాలని కోరుతున్నారు. ఐపీఎల్ 2025లో మిగిలిన మ్యాచ్‌లలోనూ అతడు ఇదే జోరు కొనసాగిస్తే.. ఇంగ్లాండ్‌ టూర్‌ కోసం ఎంపికయ్యే అవకాశం ఉంది. ఇక ఈ మ్యాచ్‌లో టాస్ గెలిచిన సన్‌రైజర్స్ ఫస్టు బౌలింగ్ ఎంచుకుంది. శుభ్‌మన్ గిల్ (38 బంతుల్లో 76 రన్స్‌), జోస్ బట్లర్ (37 బంతుల్లో 64 రన్స్) రాణించడంతో గుజరాత్ టైటాన్స్.. నిర్ణీత 20 ఓవర్లలో 6 వికెట్ల నష్టానికి 224 పరుగులు చేసింది.