రోజూ ఉదయం ఫ్రూట్ వాటర్ తాగితే చాలు,,,ఎంత లావుగా ఉన్నా తగ్గొచ్చు

పైనాపిల్. ఈ పండు పేరు చెబుతుంటూనే నోరూరిపోతుంది. కట్ చేయడానికి కాస్త ఇబ్బందిగానే అనిపించినా టేస్ట్ మాత్రం అందరికీ నచ్చేస్తుంది. ఇందులో ఫైబర్ పుష్కలంగా ఉంటుంది. సులువుగా జీర్ణమవడంతో పాటు శక్తినీ అందిస్తుంది. అయితే ఇలా ముక్కలు తింటేనే కాదు. పైనాపిల్ తో తయారు చేసుకోగలిగే ఓ డ్రింక్ తోనూ ఎన్నో ప్రయోజనాలుంటాయి. న్యూట్రిషనిస్ట్ లు దీన్ని రీఫ్రెషింగ్ డ్రింక్ అని చెబుతుంటారు. అంతగా శరీరానికి ఎనర్జీని ఇస్తాయి పైనాపిల్ వాటర్. జీర్ణ వ్యవస్థను మెరుగుపరచడం నుంచి మొత్తంగా రోగ నిరోధక శక్తి పెంచడం వరకూ ఎన్నో లాభాలున్నాయి.

ఫిట్ నెస్ కోసం, బరువు తగ్గడానికి ప్రయత్నిస్తున్న వాళ్లు క్రమం తప్పకుండా తాగితే ఆరోగ్యంతో పాటు చర్మం కూడా అందంగా మెరిసిపోతుంది. వేసవిలో ఈ పైనాపిల్ వాటర్ తాగడం వల్ల బాడీ హైడ్రేట్ అవుతుంది. పైనాపిల్ లో కేలరీలు తక్కువగా ఉంటాయి కాబట్టి సులువుగా జీర్ణమైపోతుంది. అయితే..ఈ పైనాపిల్ వాటర్ ని తయారు చేయడానికి పెద్దగా శ్రమ పడాల్సిన అవసరం కూడా లేదు. కేవలం ఓ పది నిముషాలు కేటాయిస్తే చాలు. చాలా సులువుగా దీన్ని తయారు చేసుకోవచ్చు.

టేస్టీ వాటర్

​వేసవి కాబట్టి ఎక్కువ నీళ్లు తీసుకోక తప్పదు. బాడీ హైడ్రేటెడ్ గా ఉండాలంటే నీళ్లు తాగాల్సిందే. అయితే ఇలా ఊరికే రుచీ పచీ లేని నీళ్లు ఏం తాగుతాం అనుకునే వాళ్లకి ఈ పైనాపిల్ వాటర్ మంచి ఆప్షన్. నిజానికి మన శరీరంలో వాటర్ కంటెంట్ ఎక్కువగా ఉంటుంది. సరైన మోతాదులో నీళ్లు తీసుకుంటేనే మెటబాలిజం సరిగ్గా ఉంటుంది. ఇక కేలరీలు, షుగర్ తక్కువగా ఉన్న పైనాపిల్ వాటర్ తీసుకుంటే ఇంకా మంచిది. చక్కెర ఎక్కువగా వేసిన జ్యూస్ లు, కూల్ డ్రింక్స్, సోడాలు తాగే బదులు ఈ వాటర్ తాగితే ఎంతో ఆరోగ్యకరం. ఫిట్ నెస్ రొటీన్ లో భాగంగా పైనాపిల్ వాటర్ తాగితే చాలా తొందరగా ఫలితాలు చూడొచ్చు.

ఎలా తయారు చేసుకోవాలి

​పైనాపిల్ వాటర్ తయారీకి రెండు పద్ధతులున్నాయి. అందులో మొదటిది చెప్పుకుందాం. ముందుగా తాజా పైనాపిల్ తీసుకోవాలి. పైన పొట్టు కట్ చేసి పండుని చిన్న చిన్న ముక్కలుగా కట్ చేసుకోవాలి. అయితే పైనాపిల్ పై ఉండే ఆకులను ముందుగా తుంచి చూడాలి. అవి సులువుగా విడిపోయాయంటే ఆ పండు తినేందుకు రెడీగా ఉందని అర్థం. అలాంటి పండునే సెలెక్ట్ చేసుకుని కట్ చేయాలి. ఓ పెద్ద గ్లాస్ లో నీళ్లు పోసి అందులో ఈ ముక్కలు వేయాలి. చాలా సేపటి వరకూ వాటిని అందులోనే ఉంచాలి. ఎంత ఎక్కువ సేపు నీళ్లలో ఉంటే అంత ప్రయోజనాలుంటాయి. పైగా ఇలా ఎక్కువ సమయం ఉంచడం వల్ల పైనాపిల్ లోని ఫ్లేవర్ అంతా నీళ్లకు బాగా పడుతుంది.

ఎలా తాగాలి

ఇలా ముక్కలు నానబెట్టిన ఈ నీళ్లను నేరుగా తాగొచ్చు. అయితే..కాస్తంత చల్లగా ఉండాలనుకుంటే ఐస్ యాడ్ చేసుకోవచ్చు. రోజూ పరిగడుపునే ఈ నీళ్లు తాగితే చాలా మంచిది. వీటిలో కార్బొహైడ్రేట్స్, సోడియం, ఫైబర్ అధికంగా ఉంటాయి. సోడియం ఉండడం వల్ల ఎక్కువ సమయం పాటు ఈ నీళ్లు శరీరంలోనే ఉంటాయి. అంత త్వరగా చెమ లేదా యూరిన్ ద్వారా బయటకు వెళ్లిపోవు. ఫలితంగా ఎక్కువ మొత్తంలో పోషకాలు అందేందుకు అవకాశముంటుంది.

ఇలా కూడా చేసుకోవచ్చు

పైనాపిల్ వాటర్ ని తయారు చేసుకోడానికి మరో పద్ధతి కూడా ఉంది. ఊరికే ముక్కలు కోసి నీళ్లలో వేయడం అనేది ఓ విధానం. అలా కాకుండా పైనాపిల్ ముక్కల్ని మిక్సీ పట్టాలి. ఇందులో ఫైబర్ ఎక్కువగా ఉండడం వల్ల పిప్పి వస్తుంది. ఆ పిప్పిని పూర్తిగా ఫిల్టర్ చేయాలి. అయితే..పండు ముక్కలతో పాటు నీళ్లు కూడా పోసి మిక్సీ పట్టాలి. మరీ జ్యూస్ లా కాకుండా కాస్తంత పల్చగా ఉండేలా చూసుకోవాలి. పిప్పిని వడబోసి ఈ నీళ్లను రోజూ తాగాలి. అయితే ఐస్ లేకుండా తాగితేనే మంచిది. ఒకవేళ చల్లగా కావాలనుకుంటే కుండలో ఉండే నీళ్లతో ఈ పైనాపిల్ వాటర్ తయారు చేసుకోవాలి.

ఎన్ని లాభాలంటే

పైనాపిల్ లో విటమిన్ సి అధికంగా ఉంటుంది. ఇది ఇమ్యూనిటీని పెంచుతుంది. గాయాలు త్వరగా మానిపోతాయి. పైగా ఈ విటమిన్ సి కారణంగా శరీరంలోని కణాలు డ్యామేజ్ కాకుండా ఉంటాయి. ఇక ఇందులోని మాంగనీస్ ఎముకలను బలంగా ఉంచుతుంది. ఫ్రాక్చర్స్ లాంటి ఇబ్బందులను తగ్గిస్తుంది. యాంటీ ఇన్ ఫ్లమేటరీ గుణాలుండడం వల్ల కీళ్ల నొప్పులు చాలా వరకూ తగ్గిపోతాయి.

పైనాపిల్ వాటర్ రెగ్యులర్ గా తాగడం వల్ల పొట్టలో డైజెస్టివ్ ఎంజైమ్స్ ఎక్కువగా విడుదలవుతాయి. ఇవి ఆహారాన్ని సులువుగా జీర్ణం చేస్తాయి. బాడీని హైడ్రేటెడ్ గా ఉంచడంతో పాటు బరువు తగ్గడంలోనూ తోడ్పడుతుంది. బాడీకి ఇది నేచురల్ డిటాక్స్ లా పని చేస్తుంది. లోపలి టాక్సిన్స్ ని బయటకు పంపేస్తుంది. ఎప్పుడైనా కడుపు నిండా భోజనం చేసినప్పుడు ఈ పైనాపిల్ వాటర్ తాగితే చాలా సులువుగా జీర్ణం అవుతుంది.