దక్షిణ భారత రాజ్యాల చరిత్రకు తగిన ప్రాధాన్యం లేదని విమర్శ

భారతీయ పాఠశాలల్లో చరిత్రను బోధిస్తున్న తీరుపై, ముఖ్యంగా దక్షిణ భారత రాజ్యాల ఘన చరిత్రను విస్మరించడంపై ప్రముఖ నటుడు ఆర్. మాధవన్ తీవ్ర అసంతృప్తి వ్యక్తం చేశారు. దేశ ప్రాచీన చరిత్రలోని కీలక ఘట్టాలకు, ముఖ్యంగా దక్షిణాది సామ్రాజ్యాల అపారమైన వారసత్వానికి పాఠ్య పుస్తకాల్లో సరైన ప్రాధాన్యం లభించడం లేదని ఆయన ఆవేదన వ్యక్తం చేశారు. ఈ వ్యాఖ్యల వల్ల తనకు ఇబ్బందులు ఎదురుకావచ్చని తెలిసినా, ఈ విషయంపై మాట్లాడాల్సిన అవసరం ఉందని భావించి తన అభిప్రాయాలను నిర్మొహమాటంగా పంచుకున్నట్లు తెలిపారు.తాను పాఠశాలలో చరిత్ర చదివిన రోజులను గుర్తుచేసుకుంటూ, మాధవన్ ప్రస్తుత సిలబస్‌పై విమర్శనాత్మక దృష్టి సారించారు. "మొఘలుల గురించి ఎనిమిది అధ్యాయాలు, హరప్పా-మొహెంజొదారో నాగరికతలపై రెండు, బ్రిటిష్ పాలన-స్వాతంత్ర్య పోరాటంపై నాలుగు అధ్యాయాలు మనకు బోధించారు. కానీ చోళులు, పాండ్యులు, పల్లవులు, చేరులు వంటి మొత్తం దక్షిణ భారత రాజ్యాల చరిత్రను కేవలం ఒకే ఒక్క అధ్యాయానికి పరిమితం చేశారు" అని ఆయన అన్నారు. మొఘలులు, బ్రిటిషర్లు కలిపి సుమారు 800 ఏళ్లు భారతదేశాన్ని పరిపాలిస్తే, ఒక్క చోళ సామ్రాజ్యమే దాదాపు 2,400 సంవత్సరాల సుదీర్ఘ, వైభవోపేతమైన చరిత్రను కలిగి ఉందని మాధవన్ నొక్కి చెప్పారు.చోళుల అసాధారణ విజయాలను వివరిస్తూ వారు సముద్రయానం, నౌకా శక్తిలో ఆనాటి ప్రపంచానికే మార్గదర్శకులుగా నిలిచారు. వారి సుగంధ ద్రవ్యాల వాణిజ్య మార్గాలు రోమ్ వరకు విస్తరించాయి. అంతటి ఘన చరిత్ర కలిగిన వారి గురించి మన పాఠ్యపుస్తకాల్లో ఎంతవరకు ప్రస్తావించారు మన శక్తివంతమైన నౌకాదళాలతో ఆగ్నేయాసియాలోని అంగ్‌కోర్ వాట్ వరకు అద్భుతమైన ఆలయాలు నిర్మించిన విషయం ఎక్కడ ఉంది జైన, బౌద్ధ, హిందూ మతాల ప్రభావం చైనా వరకు విస్తరించింది. మన భాష ఎంతగా విస్తరించిందంటే, నేటికీ కొరియాలో ప్రజలు మాట్లాడే భాషలో సగం తమిళ పదాలుంటాయి. ఇంతటి గొప్ప చరిత్రను మనం కేవలం ఒకే అధ్యాయంలో ఎలా కుదించగలిగాం" అని మాధవన్ ఆవేదనతో ప్రశ్నించారు.ప్రపంచంలోనే అత్యంత ప్రాచీన భాషల్లో ఒకటైన తమిళానికి తగిన గుర్తింపు, ప్రాచుర్యం ఎందుకు లభించడం లేదని కూడా ఆయన నిలదీశారు. "ఇది ఎవరి కథనం ఎవరు ఈ సిలబస్‌ను రూపొందించారు ప్రపంచంలోనే అత్యంత పురాతన భాష అయిన తమిళం గురించి నేటికీ చాలా మందికి తెలియదు. మన ప్రాచీన సంస్కృతిలో నిక్షిప్తమై ఉన్న శాస్త్రీయ విజ్ఞానాన్ని ఈ రోజుల్లో అపహాస్యం చేస్తున్నారు" అని ఆయన అన్నారు.పాఠశాల పాఠ్యపుస్తకాల్లోని పలు చరిత్ర అధ్యాయాలను సవరించినందుకు నేషనల్ కౌన్సిల్ ఆఫ్ ఎడ్యుకేషనల్ రీసెర్చ్ అండ్ ట్రైనింగ్ విమర్శలు ఎదుర్కొంటున్న తరుణంలో మాధవన్ చేసిన ఈ వ్యాఖ్యలు ప్రాధాన్యతను సంతరించుకున్నాయి. వలసవాద కాలం నాటి చరిత్రను సైతం వక్రీకరిస్తున్నారని, జలియన్‌వాలా బాగ్ మారణకాండ వంటి ఘటనలను బ్రిటిష్ కోణంలో చిత్రీకరిస్తున్నారని ఆయన విమర్శించారు.