మూడేళ్ల వియానా ,,,సల్లేఖన దీక్ష

ఆ పాప వయస్సు కేవలం మూడేళ్లు. పేరు వియానా. వారిది జైన మతం. జైన మతంలో సల్లేఖన దీక్ష అనేది ఒక ఆచారం ఉంటుంది. చావును ఆహ్వానించడమే ఈ దీక్ష. అలాంటి దీక్షను వియానా తల్లిదండ్రులు తీసుకున్నారు. చావును ఆహ్వానించే ఆ దీక్ష ఏంటో, ఆ పాప తల్లిదండ్రులు ఆ దీక్ష ఎందుకు తీసుకున్నారో ఇప్పుడు తెలుసుకుందాం.

మధ్యప్రదేశ్‌లో ఉండే పియూష్, వర్ష జైన్ వీరిద్దరూ ఐటీ ఉద్యోగులు. వీరికి వియానా అనే మూడేళ్ల పాప కూడా ఉంది. ఆ చిన్నారి గత కొంతకాలంగా బ్రెయిన్ ట్యూమర్‌తో బాధపడుతోంది. దీంతో ఆ మూడేళ్ల బాలిక జైన మత ఆచారమైన సంతార (సల్లేఖన దీక్ష)ను స్వీకరించి స్వచ్ఛందంగా ప్రాణ త్యాగం చేయించారు. వియానా జైన్ అనే చిన్నారి మార్చి 21న సంతార వ్రతం ద్వారా మరణించగా, ఇటీవలే జైన సమాజం బాలిక తల్లిదండ్రులను సత్కరించిన తర్వాత ఈ ఘటన వెలుగులోకి వచ్చింది.

బ్రెయిల్ ట్యూమర్‌తో బాధపడుతున్న వియానా జైన్‌కు తల్లిదండ్రులు తొలుత ఇండోర్‌లో చికిత్స చేయించారు. ఆ తర్వాత ముంబయిలో సర్జరీ చేయించారు. అయినా చిన్నారి ఆరోగ్యం కుదుటపడలేదు. అంతకంతకూ ఆరోగ్య పరిస్థితి దిగజారడం మొదలైంది. దీంతో వియానా జైన్ తల్లిదండ్రులు జైన ముని రాజేష్ మహరాజ్‌ను సంప్రదించారు. ఆయన చిన్నారి పరిస్థితిని చూసి సల్లేఖన వ్రతం చేయించమని సలహా ఇచ్చారు. అందుకు వియానా తల్లిదండ్రులు, కుటుంబసభ్యులు అంగీకరించారు. అయితే వియానా సల్లేఖన వ్రతం చేపట్టిన 10 నిమిషాల్లోనే ప్రాణాలు విడిచింది.

కాగా, ప్రపంచంలో అతి చిన్న వయస్సులో సల్లేఖన దీక్ష చేపట్టి ప్రాణ త్యాగం చేసిన వ్యక్తిగా వియానా జైన్ నిలిచింది. ఈ క్రమంలో ఆమె గోల్డెన్ బుక్ ఆఫ్ వరల్డ్ రికార్డ్స్‌లో చోటు సంపాదించుకుంది. ఏప్రిల్ 30వ తేదీన జైన సమాజం వియానా తల్లిదండ్రులను సత్కరించింది. దీంతో చిన్నారి సల్లేఖన వ్రతం విషయం బయటపడింది.

జైన మతంలో సల్లేఖన దీక్ష ఒక ఆచారంగా వస్తోంది. ఆహారం, నీరు వంటికి తాగకుండా ఉపవాసం ద్వారా స్వచ్ఛందంగా ప్రాణత్యాగం చేయడాన్నే సల్లేఖన దీక్ష అంటారు. సాధారణంగా వృద్ధాప్యం, తీవ్రమైన అనారోగ్య సమస్యలు ఉన్నవారు మత గురువు వద్ద ఈ దీక్షను తీసుకుంటారు. దీక్ష తీసుకున్న వ్యక్తి ఆహార పానీయాలను మానేస్తారు. సంతార ద్వారా వచ్చే మరణాన్ని సమాధి మరణం, శాంతియుత మరణం అని కూడా అంటారు. సాధారణంగా జైన సన్యాసులు ఎక్కువగా సల్లేఖన వ్రతాన్ని చేపట్టి ప్రాణాలను త్యజిస్తుంటారు.