చెల్లితో పెళ్లి.. అక్కతో సంసారం.. . చివరికి

హైదరాబాద్‌కు చెందిన అనిల్‌కు సాహితి అనే యువతితో వివాహం జరిగింది. అయితే.. వీళ్లిద్దరి సంసారం మొదట్లో బాగానే నడిచినా.. ఆ తర్వాత ఎందుకో సాహితి మీద అనిల్ అంతగా ప్రేమ చూపించట్లేదు. ఈ క్రమంలో.. అనిల్ వ్యవహారంపై సాహితికి అనుమానం వచ్చింది. ఈ విషయంపై కాస్త దృష్టిపెట్టిన సాహితికి.. తన అక్కతోనే అనిల్‌కు వివాహేతర సంబంధం ఉందనే విషయం తెలిసింది. ఈ విషయంపై భార్యాభర్తల మధ్య తరచూ గొడవలు జరుగుతుండేవని తెలుస్తోంది. ఈ క్రమంలోనే అనిల్ సాహితిని హత్య చేశాడని ఆమె కుటుంబ సభ్యులు తీవ్రంగా ఆరోపిస్తున్నారు.

మొదట అనిల్ తన భార్య సాహితి గుండెపోటుతో హఠాత్తుగా మరణించిందని అందరికీ చెప్పాడు. కానీ.. సాహితి మృతదేహంపై స్పష్టమైన గాయాలు ఉండటంతో ఆమె కుటుంబ సభ్యులకు అనుమానం కలిగింది. ఇది హత్యేనని బలంగా నమ్మిన వారు వెంటనే స్థానిక పోలీస్ స్టేషన్‌లో కేసు నమోదు చేశారు.

సాహితి తల్లి తన ఆవేదనను వ్యక్తం చేస్తూ.. అనిల్ తన ఇద్దరు కూతుళ్లను మోసం చేశాడని కన్నీటి పర్యంతమయ్యారు. ఇద్దరు కూతుళ్లను కూడా అతను తీవ్రంగా హింసించాడని ఆమె ఆరోపించారు. పెద్ద కూతురును సైతం చంపేస్తానని అనిల్ బెదిరింపులకు పాల్పడినట్లు ఆమె తెలిపారు. ఎక్కడ ఉన్నా సరే చంపేస్తానని అతను హెచ్చరించాడని కూడా ఆమె చెప్పారు. గతంలో కూడా అనిల్ సాహితిని అనేకసార్లు వేధించాడని, ఒకసారి తాము సాహితిని ఇంటికి తీసుకువెళతామని చెప్పడంతో అతను అడ్డుపడి తన చేయి కోసుకున్నాడని ఆమె గుర్తు చేసుకున్నారు. చివరకు అనిల్ తన కూతురిని కొట్టి చంపి తమకు లేకుండా చేశాడంటూ ఆరోపించారు.

ఈ దారుణమైన ఘటనపై పోలీసులు కేసు నమోదు చేసుకుని లోతుగా విచారణ జరుపుతున్నారు. అనిల్‌ను అదుపులోకి తీసుకుని విచారిస్తున్నారు. ఈ ఘటన స్థానికంగా తీవ్ర కలకలం రేపింది.