సుప్రీంకోర్టు న్యాయమూర్తుల ఆస్తి వివరాలు.. ఎవరెవరికి ఎన్ని వేల కోట్లు

న్యాయ వ్యవస్థలో పారదర్శకతను పెంపొందించే చర్యల్లో భాగంగా జడ్జీల వివరాలును.. భారత అత్యున్నత న్యాయస్థానం సోమవారం వెల్లడించిన విషయం అందరికీ తెలిసిందే. అయితే మొత్తంగా సుప్రీం కోర్టులో 31 మంది న్యాయమూర్తులు ఉండగా.. వారిలో 21 మంది ఆస్తుల వివరాలను అధికారిక వెబ్‌సైట్‌లో ఉంచింది. ఈ విషయం తెలిసినప్పటి నుంచి ప్రజలంతా ఎవరి ఆస్తులు ఎంతో తెలుసుకునేందుకు ఆసక్తి కనబరుస్తున్నారు. ముఖ్యంగా ప్రస్తుత సీజేఐ జస్టిస్ సంజీవ్ ఖన్నా, తదుపరి సీజేఐ జస్టిస్ గవాయ్‌లకు ఎంత మొత్తంలో ఆస్తులు ఉన్నాయో ప్రత్యేకంగా తెలుసుకుంటున్నారు. అలాంటి వారి కోసమే వీరి ఆస్తులు వివరాల గురించి అందిస్తున్నాం. ఇంకెందుకు ఆలస్యం ఓ లుక్కేయండి.

ప్రస్తుత సీజేఐ జస్టిస్ సంజీవ్ ఖన్నా ఆస్తులు..

సుప్రీం కోర్టులో మొత్తంగా 31 మంది న్యాయమూర్తులు ఉండగా.. కేవలం 21 మంది ఆస్తుల వివరాలను మాత్రమే న్యాయస్థానం అధికారిక వెబ్‌సైట్‌లో ఉంచింది. వాటి ప్రకారం.. సుప్రీం కోర్టు ప్రధాన న్యాయమూర్తి సంజీవ్ ఖన్నాకు రూ.55.75 లక్షల ఫిక్స్డ్ డిపాజిట్, రూ.14,000 విలువైన షేర్లు, పబ్లిక్ ప్రావిడెంట్ ఫండ్‌లో రూ.1.06 కోట్లు, రూ.1.2 కోట్ల జనరల్ ప్రావిడెంట్ ఫండ్, రూ.29,625 ఎల్ఐసీ మనీ బ్యాక్ పాలసీ వార్షిక ప్రీమియంలు ఉన్నాయి. అలాగే స్థిరాస్తుల వద్దకు వస్తే దక్షిణ ఢిల్లీలో ఫ్లాట్, కాన్వెల్త్ గేమ్స్ విలేజ్‌లో 2,446 చదరపు అడుగుల విస్తీర్ణంలో ఓ అపార్ట్‌మెంట్, హిమాచల్ ప్రదేశ్‌లోని డల్హౌసీలో ఇల్లు కూడా ఉంది. ఇక చరాస్తుల విషయానికి వస్తే 250 గ్రాముల బంగారం, 2 కిలోల వెండి, మారుతి స్విఫ్ట్ కారు ఉన్నాయి.

తదుపరి సీజేఐ జస్టిస్ గవాయ్ ఆస్తులు..

మే 15వ తేదీన నెక్స్ట్ సీజేఐగా బాధ్యతలు చేపట్టబోతున్న జస్టిస్ బి.ఆర్ గవాయ్‌కు బ్యాంకులో రూ.19.63 లక్షల నగదు, రూ.5.25 లక్షల విలువైన బంగారు ఆభరణాలు ఉన్నాయి. అలాగే మహారాష్ట్రలోని అమరావతిలో తన తండ్రి నుంచి వారసత్వంగా వచ్చిన ఇల్లు, ముంబయిలోని బాంద్రా, ఢిల్లీలోని డిఫెన్స్ కాలనీల్లో అపార్ట్‌మెంట్‌లు, వ్యవసాయ భూములు ఉన్నాయి. అంతేకాకుండా ఆయన సతీమణి వద్ద రూ.29.70 లక్షల విలువైన ఆభరణాలు, రూ.61,320 నగదు డిపాజిట్ ఉన్నాయి.

జస్టిస్ సూర్యకాంత్ ఆస్తులు..

జస్టిస్ గవాయ్ తర్వాత నవంబర్ 24వ తేదీన భారత ప్రధాన న్యాయమూర్తిగా బాధ్యతలు స్వీకరించబోతున్న జస్టిస్ సూర్యకాంత్‌కు చండీగఢ్‌లో ఒక ఇల్లు, పంచకులలో 13 ఎకరాల వ్యవసాయ భూమి, గురుగ్రామ్‌లో ఇంటి స్థలం, రూ.4.11 కోట్ల విలువైన స్థిర డిపాజిట్లు, 100 గ్రాముల విలువైన బంగారు ఆభరణాలు, మూడు లగ్జరీ వాచీలు ఉన్నాయి. ఇలా వీరివి మాత్రమే కాకుండా మరో 18 మంది జడ్జీల ఆస్తుల వివరాలు కూడా వెబ్‌సైట్‌లో ఉన్నాయి. కావాలంటే ఓసారి వెళ్లి చూసేయండి.

అసలు ఈ ఆస్తుల వివరాలను సుప్రీం కోర్టు అందరికీ తెలిసేలా పెట్టడానికి చాలానే కారణాలు ఉన్నాయి. ముఖ్యంగా ఇటీవలే జస్టిస్ యశ్వంత్ వర్మ అధికారిక నివాసంలో భారీ మొత్తంలో నగదు లభ్యం అయిదంటూ ఆరోపణలు రాగా.. న్యాయవ్యవస్థ విశ్వసనీయతపై అనుమాలు చెలరేగాయి. ఈక్రమంలోనే న్యాయమూర్తులు ఈ నిర్ణయం తీసుకోవడంతో.. ప్రజలంతా హర్షం వ్యక్తం చేస్తున్నారు.