కర్రెగుట్టల్లో కొనసాగుతోన్న 'ఆపరేషన్ కగార్'.. ల్యాండ్‌మైన్ పేలి జవాన్ మృతి

తెలంగాణ- ఛత్తీస్‌గఢ్ రాష్ట్రాల సరిహద్దు ప్రాంతమైన కర్రెగుట్టల్లో 'ఆపరేషన్ కగార్' కొనసాగుతోంది. మావోయిస్టులను పూర్తిగా మట్టుబెట్టటమే లక్ష్యంగా సాగుతున్న ఈ ఆపరేషన్ కగార్‌లో.. తీవ్ర విషాదం చోటుచేసుకుంది. మావోయిస్టులు వ్యూహాత్మకంగా అమర్చిన మందుపాతర (ల్యాండ్‌మైన్) పేలడంతో కోబ్రా బెటాలియన్‌కు చెందిన ఒక అసిస్టెంట్ కమాండెంట్ ప్రాణాలు కోల్పోయారు. ఈ ఘటన భద్రతా దళాలకు తీవ్రమైన ఎదురుదెబ్బగా పరిణమించింది.

అధికారుల వివరాల ప్రకారం.. నక్సల్స్ కోసం విస్తృతంగా గాలింపు చర్యలు చేపడుతున్న క్రమంలో.. 204 కోబ్రా బెటాలియన్‌కు చెందిన అసిస్టెంట్ కమాండెంట్ సాగర్ బొరడే కాలు.. ప్రమాదవశాత్తు మావోయిస్టులు అమర్చిన ల్యాండ్‌మైన్‌పై పడింది. కనురెప్పపాటు కాలంలో.. సంభవించిన భారీ పేలుడులో సాగర్ తీవ్రంగా గాయపడ్డారు. సహచర సిబ్బంది వెంటనే స్పందించి ఆయనను తరలించే ప్రయత్నం చేసినప్పటికీ.. తీవ్ర గాయాలతో సాగర్ బొరడే మృతి చెందారు.

ఈ ప్రాంతంలో మావోయిస్టులు పెద్ద సంఖ్యలో భూగర్భ బంకర్లను ఏర్పాటు చేసుకున్నారనే సమాచారం రావడంతో, వారిని మట్టుబెట్టే లక్ష్యంతో 'ఆపరేషన్ కగార్'‌ను కొనసాగిస్తున్నాయి కేంద్ర బలగాలు. ప్రతికూల భౌగోళిక పరిస్థితులు, మావోయిస్టుల వ్యూహాత్మక మందుపాతరల అమరిక భద్రతా దళాలకు పెను సవాలుగా మారుతున్నాయి. అయినప్పటికీ, సెంట్రల్ రిజర్వ్ పోలీస్ ఫోర్స్ (CRPF) దళాలు ప్రత్యేకంగా శిక్షణ పొందిన K9 (డాగ్ స్క్వాడ్), K3 బృందాల సహాయంతో కూంబింగ్ ఆపరేషన్‌ను మరింత ముమ్మరంగా కొనసాగిస్తున్నాయి. భూగర్భ బంకర్లను గుర్తించి నిర్వీర్యం చేసేందుకు భద్రతా దళాలు ప్రత్యేక వ్యూహాలతో ముందుకు సాగుతున్నాయి.

ఇదిలా ఉండగా.. ఇదే కర్రెగుట్టల ప్రాంతంలో నిన్న (మే 05న) భద్రతా దళాలకు, మావోయిస్టులకు మధ్య జరిగిన భీకర ఎదురు కాల్పుల్లో ఒక మహిళా మావోయిస్టు మరణించిన విషయం తెలిసిందే. వరుసగా చోటుచేసుకుంటున్న ఈ ఘటనలు తెలంగాణ- ఛత్తీస్‌గఢ్ సరిహద్దుల్లోని అటవీ ప్రాంతంలో నెలకొన్న ప్రమాదకరమైన పరిస్థితులను స్పష్టం చేస్తున్నాయి. ఈ నేపథ్యంలో, భద్రతా దళాలు మరింత అప్రమత్తంగా, జాగ్రత్తగా తమ ఆపరేషన్‌ను కొనసాగిస్తున్నాయి. అమర జవాన్ సాగర్ బొరడే త్యాగానికి భద్రతా దళాలు నివాళులర్పించాయి.