ఇదేం వాతావరణం,,,ఇక్కడ ఎండలు.. అక్కడ వానలు

ఆంధ్రప్రదే‌శ్‌లో భిన్నమైన వాతావరణ పరిస్థితులు ఏర్పడుతున్నాయి. కొన్ని ప్రాంతాల్లో వర్షం పడుతుండగా.. మరికొన్ని ప్రాంతాల్లో సూర్యుడు ఉగ్రరూపం ప్రదర్శిస్తున్నాడు. దీంతో ఎండలు మండిపోతున్నాయి. ఉదయం నుంచే సూర్య ప్రతాపం కొనసాగుతోంది. ఉదయం 10 గంటల సమయానికే రోడ్ల మీదకు రావాలంటే జనం జంకుతున్న పరిస్థితులు ఏర్పడుతున్నాయి. ఉదయం నుంచి సాయంత్రం వరకూ ఎండ దంచికొడుతోంది. ఈ క్రమంలో ఏపీలో రికార్డు స్థాయి ఉష్ణోగ్రతలు నమోదవుతున్నాయి. దీంతో ప్రజలు అప్రమత్తంగా ఉండాలని ఏపీ విపత్తుల నిర్వహణ సంస్థ సూచించింది. గతేడాదితో పోల్చితే ఈ ఏడాది మే నెలలో అధిక ఉష్ణోగ్రతలు నమోదవుతున్నాయని తెలిపింది. సోమవారం పల్నాడు జిల్లా నరసరావుపేట మండలం కాకానిలో 43.7 డిగ్రీల గరిష్ట ఉష్ణోగ్రత నమోదైంది. అలాగే రాష్ట్రంలోని 17 జిల్లాల్లో 41 డిగ్రీలకు పైగా ఉష్ణోగ్రతలు నమోదైనట్లు ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ తెలిపారు,

మంగళవారం 21 మండలాల్లో తీవ్ర, 32 మండలాల్లో వడగాలులు ప్రభావం చూపే అవకాశం ఉందని ఏపీ విపత్తుల నిర్వహణ సంస్థ తెలిపింది. అల్లూరి సీతారామరాజు జిల్లాలోని 11 మండలాలు, విజయనగరం జిల్లాలోని 2 మండలాలు, కాకినాడ జిల్లాలో మూడు, తూర్పు గోదావరి జిల్లాలో ఒక మండలంలో తీవ్రవడగాలులు వీచే అవకాశం ఉందని ఏపీ విపత్తుల నిర్వహణ సంస్థ తెలిపింది. తీవ్రమైన ఎండ ప్రభావం, వడగాలుల నేపథ్యంలో ప్రజలు జాగ్రత్తగా ఉండాలని.. మధ్యాహ్న వేళల్లో వీలైనంత వరకూ బయటకు రాకుండా ఉండటం మంచిదని సూచించింది. మరోవైపు ఎండలతో పాటుగా కొన్ని జిల్లాలలో మంగళవారం వర్షం కూడా కురవనుంది. మంగళవారం రాయలసీమలో చెదురుమదురుగా పిడుగులతో కూడిన తేలికపాటి నుంచి మోస్తారు వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ అంచనా వేసింది.

మరోవైపు ఏపీ విపత్తుల నిర్వహణ సంస్థ ఆధ్వర్యంలో మంగళ, బుధవారాల్లో అత్యవసర పరిస్థితుల్లో ఎలా వ్యవహరించాలనే దానిపై మాక్ ఎక్సర్‌సైజ్ నిర్వహించనున్నారు. మంగళవారం విజయనగరం, ఏలూరు, ప్రకాశం, వైఎస్ఆర్ జిల్లాలలో.. బుధవారం పార్వతీపురం మన్యం, అనకాపల్లి, పశ్చిమ గోదావరి, గుంటూరు, పల్నాడు, నెల్లూరు, అన్నమయ్య , అనంతపురం జిల్లాలలో మాక్ ఎక్సర్‌సైజ్ నిర్వహించనున్నట్లు ఏపీ విపత్తుల నిర్వహణ సంస్థ తెలిపింది. కాకినాడ, చిత్తూరు జిల్లాలో శుక్రవారం మాక్ ఎక్సర్‌సైజ్ నిర్వహించనున్నట్లు ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ తెలిపారు.