చితిపై పడుకుని మరీ,,,,చనిపోయిన తల్లి వెండి గాజుల కోసం కుమారుడి గొడవ

రాజస్థాన్‌లోని జైపూర్‌కు చెందిన భూరి దేవికి ఏడుగురు కుమారులు. ఆడ పిల్లలు పుట్టలేదు. అయితే ఆరుగురు సోదరులు ఒకే దగ్గర కలిసి ఉంటుండగా.. ఐదో కుమారుడు ఓం ప్రకాష్ మాత్రం వేరే గ్రామంలో ఉంటూ జీవనం సాగిస్తున్నాడు. ఆరుగురు అన్నదమ్ములతో ఇతడికి మూడేళ్లుగా ఆస్తి గొడవలు జరుగుతున్నాయి. ఎప్పుడూ ఏదో ఒక రకంగా, తల్లి అన్నతమ్ముళ్లలతో ఓం ప్రకాష్ వివాదం పెట్టుకునేవాడు. కానీ వేరే గ్రామంలో ఉంటుండగా.. వారు కూడా పెద్దగా పట్టించుకోవడం మానేశారు. అయితే వయసురీత్యా వచ్చే అనారోగ్య సమస్యలతో మే 3వ తేదీ మధ్యాహ్న సమయంలో భూరి దేవి ప్రాణాలు కోల్పోయారు.

దీంతో కుమారులు ఈ విషయాన్ని ఓం ప్రకాష్ సహా బంధువులు, స్థానికులు అందరికీ తెలియజేశారు. అమ్మ పక్కనే కూర్చుని కన్నీరు పెడుతూనే.. అంత్యక్రియలు అన్నీ సిద్ధం చేశారు. ఇంటి దగ్గర చేయాల్సిన అన్ని క్రియలు జరిపించి.. ఆమె చేతికి ఉన్న వెండి గాజులు తీసేశారు. వాటిని ఆమె పెద్ద కుమారుడు గిర్దారికి అప్పగించారు. దాన్ని గుర్తించిన ఓం ప్రకాష్.. వాటిని ఎలాగైనా దక్కించుకోవాలని అనుకున్నాడు. కానీ ఎలా అని బాగా ఆలోచించి మరీ ఓ ప్లాన్ వేశాడు. మిగతా సోదరులతో పాటే తల్లి మృతదేహాన్ని కాటి వరకు మోసుకెళ్లాడు. ఇక చితిపై పడుకో బెడతారనగా.. ఆగండి అంటూ గొడవ చేశాడు. నేరుగా వెళ్లి చితిపై పడుకున్నాడు.

అమ్మ చేతుల నుంచి తీసిన వెండి గాజులు ఇస్తేనే తాను చితి పైనుంచి లేస్తానని మెండికేశాడు. ఇవ్వనంటే తనను కూడా తల్లితోపాటే కాల్చేయాలని కోరాడు. బంధువులు, సోదరులు ఇస్తామని చెప్పినా అతడు వినలేదు. ఎంత లేపినా లేవలేదు. ఫలితంగా తల్లి మృతదేహాన్ని పక్కనే కింద పడుకోబెట్టారు. అప్పటికే ఇతడు రాద్దాంతం చేయబట్టి రెండు గంటలు పూర్తవుతుండగా.. పెద్ద కుమారుడు గిర్దారీ ఆ గాజులను తీసి ఓం ప్రకాష్‌కు ఇచ్చేశాడు. ఇక వెంటనే చితిపై నుంచి లేసిన అతడు తల్లి అంత్యక్రియలు నిర్వహించమని సోదరులకు పదే పదే చెప్పాడు. ఇంత దారుణంగాప్రవర్తించిన ఇతడిని చూసిన గ్రామస్థులు, సోదరులు ముక్కున వేలేసుకున్నారు. కలికాలం అంటే ఇదేనంటూ కామెంట్లు చేశారు.