మహారాష్ట్ర పర్యటనలో సీజేఐ జస్టిస్ గవాయ్‌కు ప్రోటోకాల్ లోపాలు

భారత ప్రధాన న్యాయమూర్తి  జస్టిస్ బి.ఆర్. గవాయ్ తన సొంత రాష్ట్రమైన మహారాష్ట్ర పర్యటనలో ప్రోటోకాల్ లోపాలను సున్నితంగా ప్రస్తావిస్తూనే, కార్యనిర్వాహక వర్గంపై పరోక్ష విమర్శలు చేశారు. న్యాయమూర్తులు ఎవరైనా ప్రోటోకాల్‌ను ఉల్లంఘించి ఉంటే, సుప్రీంకోర్టుకు ప్రత్యేక అధికారాలను కల్పించే ఆర్టికల్ 142 గురించి చర్చలు మొదలయ్యేవని ఆయన వ్యాఖ్యానించారు. ఈ పరిణామం న్యాయవ్యవస్థ అతిక్రమణలపై జరుగుతున్న చర్చల నేపథ్యంలో ప్రాధాన్యతను సంతరించుకుంది.ఇటీవలే దేశ అత్యున్నత న్యాయస్థాన పీఠాన్ని అధిరోహించిన జస్టిస్ గవాయ్, ఈ పదవిని చేపట్టిన రెండో దళిత వ్యక్తిగా నిలిచారు. ముంబైలో మహారాష్ట్ర, గోవా బార్ కౌన్సిల్ ఏర్పాటు చేసిన సన్మాన కార్యక్రమానికి హాజరైన అనంతరం, ఆయన బాబాసాహెబ్ అంబేడ్కర్ స్మారక స్థలం చైత్యభూమిని సందర్శించారు. సన్మాన కార్యక్రమంలో ప్రసంగిస్తూ, ముగ్గురు కీలక అధికారులు మహారాష్ట్ర ప్రభుత్వ ప్రధాన కార్యదర్శి, డైరెక్టర్ జనరల్ ఆఫ్ పోలీస్ (డీజీపీ), ముంబై పోలీస్ కమిషనర్ గైర్హాజరు కావడంపై జస్టిస్ గవాయ్ తన అసంతృప్తిని వ్యక్తం చేశారు."ప్రజాస్వామ్యానికి మూడు మూలస్తంభాలైన న్యాయవ్యవస్థ, శాసనవ్యవస్థ, కార్యనిర్వాహక వ్యవస్థ సమానమైనవి. ప్రతి రాజ్యాంగబద్ధ సంస్థ ఇతర సంస్థలకు పరస్పరం గౌరవం ఇవ్వాలి, తీసుకోవాలి. మహారాష్ట్రకు చెందిన వ్యక్తి భారత ప్రధాన న్యాయమూర్తి అయి, తొలిసారి రాష్ట్రాన్ని సందర్శించినప్పుడు, మహారాష్ట్ర ప్రభుత్వ ప్రధాన కార్యదర్శి, డీజీపీ లేదా ముంబై పోలీస్ కమిషనర్ హాజరుకావడం సముచితమని భావించకపోతే, వారు ఆత్మపరిశీలన చేసుకోవాలి. ప్రోటోకాల్స్ కొత్తవి కావు, ఇది ఒక రాజ్యాంగ సంస్థ మరో సంస్థకు ఇచ్చే గౌరవానికి సంబంధించిన విషయం" అని జస్టిస్ గవాయ్ అన్నారు."ఒక రాజ్యాంగ సంస్థ అధిపతి రాష్ట్రాన్ని తొలిసారి సందర్శించినప్పుడు, వారికి లభించే ఆదరణ విషయంలో పునరాలోచించుకోవాలి. మాలో  ఎవరైనా ఇలా చేసి ఉంటే, ఆర్టికల్ 142 గురించి చర్చలు తలెత్తేవి. ఇవి చిన్న విషయాలుగా అనిపించవచ్చు, కానీ ప్రజలకు వీటి గురించి తెలియజేయాలి," అని ఆయన పేర్కొన్నారు.సీజేఐ ఈ వ్యాఖ్యలు చేసిన అనంతరం చైత్యభూమికి వెళ్లగా, అప్పటికే విషయం తెలుసుకున్న మహారాష్ట్ర ప్రభుత్వ ప్రధాన కార్యదర్శి సుజాతా సౌనిక్, డీజీపీ రష్మీ శుక్లా, ముంబై పోలీస్ కమిషనర్ దేవెన్ భారతీ అక్కడ ఆయనకు స్వాగతం పలికారు. ప్రోటోకాల్ లోపంపై చేసిన వ్యాఖ్యల గురించి చైత్యభూమి వద్ద విలేకరులు అడిగినప్పుడు, తాను ప్రోటోకాల్స్ గురించి పెద్దగా పట్టించుకోనని, కేవలం జరిగిన విషయాన్ని మాత్రమే చెప్పానని జస్టిస్ గవాయ్ బదులిచ్చారు