'నితీష్‌కుమార్ రెడ్డి' అకౌంట్ ట్రోల్.. ముందు బ్యాటింగ్ నేర్చుకో అంటూ కౌంటర్లు

సన్‌రైజర్స్ హైదరాబాద్ ఆల్‌రౌండర్, తెలుగు తేజం నితీష్ కుమార్ రెడ్డికి కొత్త కష్టాలు వచ్చి పడ్డాయి. రాయల్ ఛాలెంజర్స్ బెంగళూరుతో మ్యాచ్ తర్వాత నితీష్ కుమార్ రెడ్డి పేరుతో ఉన్న ఎక్స్ ఖాతాలో ఓ పోస్ట్ దర్శనమిచ్చింది. ఆర్సీబీని ట్రోల్ చేస్తూ పెట్టిన ఆ పోస్ట్ కింద.. నితీష్ రెడ్డిని టార్గెట్ చేస్తూ కామెంట్స్ చేశారు. దాంతో నితీష్ కుమార్ రెడ్డికి పర్సనల్‌గా వరుసబెట్టి మెసెజ్‌లు రావడంతో మొత్తానికి క్లారిటీ ఇచ్చాడు.

లక్నో వేదికగా నిన్న రాత్రి రాయల్ ఛాలెంజర్స్ బెంగళూరు, సన్‌రైజర్స్ హైదరాబాద్ జట్లు తలపడ్డాయి. ఈ మ్యాచ్‌లో సన్‌రైజర్స్ చేతిలో ఆర్సీబీ ఓటమిపాలయింది. 15 ఓవర్ల వరకూ ఆర్సీబీ చేతిలో ఉన్న మ్యాచ్ ఆ తర్వాత ఒక్కసారిగా సన్‌రైజర్స్ చేతుల్లోకి మారింది. సన్‌రైజర్స్ హైదరాబాద్ 231 పరుగులు చేయగా, ఆర్సీబీ 189 పరుగులకే ఆలౌట్ అయింది.

మ్యాచ్ అనంతరం నితీష్‌కుమార్ రెడ్డి పేరుతో ఉన్న ఎక్స్ ఖాతాలో ఓ పోస్ట్ వెలిసింది. 'బెంగళూరు బిర్యానీ ఎలా ఉందీ?' అంటూ పోస్ట్ చేశారు. ఈ మ్యాచ్‌లో సన్‌రైజర్స్ గెలిచినప్పటికీ.. నితీష్ కుమార్ రెడ్డి దారుణంగా విఫలమయ్యాడు. అటు బ్యాటింగ్, ఇటు ఫీల్డింగ్‌లో వరెస్ట్ పర్ఫార్మెన్స్ చేశాడు. 7 బంతులు ఆడిన నితీష్ కేవలం 4 పరుగులే చేయగా.. ఫీల్డింగ్‌లో క్యాచ్‌లు మిస్ చేయడంతో పాటు బౌండరీలు కూడా వదిలేశాడు.

దాంతో నితీష్ కుమార్ రెడ్డి పేరుతో పోస్ట్ రాగానే.. నెటిజన్లు కౌంటర్ అటాక్ స్టార్ట్ చేశారు. అసలు ఆ ఫీల్డింగ్ ఏంట్రా నాయనా అని ఒకడంటే.. గట్టిగా వంద పరుగులైన కొట్టావా ముందెళ్లి బ్యాటింగ్ ప్రాక్టీస్ చేసుకో అంటూ ఇంకొకరు కామెంట్స్ చేశాడు. నీ ఆటకి నీ పోస్ట్‌లకి ఏమైనా సంబంధం ఉందా అంటూ మరొకరు ట్రోల్ చేశారు. ఫ్యాన్స్ అయితే అన్నా మనకెందుకు అన్నా ఇలాంటి పోస్టులు అంటూ కామెంట్లలో పెడుతున్నారు.

చిలికి చిలికి గాలివానగా మారడంతో నేరుగా నితీష్‌కుమార్ రెడ్డినే స్పందించాడు. అసలు అది తన అకౌంట్ కాదంటూ.. తన అఫీషియల్ ఎక్స్ ఖాతా నుంచి ఓ పెద్ద పోస్ట్ చేశాడు. తన పేరుతో ఉన్న ఫేక్ అకౌంట్లకి తనకు సంబంధం లేదని, అందరూ అర్థం చేసుకోవాలని మనవి చేశాడు. అదేవిధంగా ఫేక్ అకౌంట్‌కి రిపోర్ట్ చేయాలంటూ కోరాడు.

"హలో.. మై ఫ్యామిలీ! నా ఫొటోతో చాలా అకౌంట్లు ఉన్నాయంటూ నాకు చాలా మెసెజ్‌లు వస్తున్నాయి. నేను ఒకటైతే క్లారిటీ ఇవ్వాలని అనుకుంటున్నాను. ఇదొక్కటే నా ఒరిజినల్, నాకున్న ఏకైక అకౌంట్. దయచేసి నా ఫొటోతో ఉన్న వేర్వేరు అకౌంట్లను ఫాలో అవ్వొద్దు. ఈ అకౌంట్ కాకుండా నా పేరు మీద ఉన్న అకౌంట్లకు రిపోర్ట్ చేయండి" అంటూ నితీష్ కుమార్ రెడ్డి ఫ్యాన్స్‌కు విన్నవించాడు.