పేరు మార్పుపై మైసూర్ పాక్ ఆవిష్కర్త మునిమనవడు కీలక వ్యాఖ్యలు

పహల్గామ్ ఉగ్రదాడి, ఆపరేషన్ సిందూర్‌తో దేశమంతా పాకిస్థాన్‌పై ఆగ్రహంతో రగిలిపోతోంది. జనంలో భావోద్వేగాలు తీవ్రంగా ఉన్నాయి. పాక్‌కు సాయం చేసిన దేశాలైన టర్కీ, అజర్‌బైజాన్‌‌లపై కూడా గుర్రుగా ఉన్నారు. ఆ దేశాల వస్తువుల బహిష్కరణ, ప్రయాణాలను బాయ్‌కాట్ చేస్తున్నారు. ఈ క్రమంలో రాజస్థాన్‌ రాజధాని జైపూర్‌లోని ఒక స్వీట్ షాపు మైసూర్ పాక్‌ను 'మైసూర్ శ్రీ'గా మార్చడం వైరల్ అయింది. దీనిపై మైసూర్ వడయార్ రాజకుటుంబానికి చెందిన రాయల్ కుక్ కకాసుర మడప్ప మునిమనవడు ఎస్.నటరాజ్ అభ్యంతరం తెలిపారు. తమ పూర్వీకులు తయారుచేసిన ఈ స్వీటు పేరును మార్చవద్దని ఆయన కోరారు.

పాకిస్థాన్‌పై కోపంతో జైపూర్‌కు చెందిన 'త్యోహార్ స్వీట్స్' యజమాని అంజలీ జైన్ తమ స్వీట్ల పేర్లను మార్చారు. మైసూర్ పాక్‌ను మైసూర్ శ్రీగా, మోతీ పాక్‌ను మోతీ శ్రీగా, ఆమ్ పాక్‌ను ఆమ్ శ్రీగా, గోండ్ పాక్‌ను గోండ్ శ్రీగా మార్చారు. స్వర్ణ భాషం పాక్, చాందీ భాషం పాక్‌లను కూడా స్వర్ణ శ్రీ, చాందీ శ్రీగా మార్చేశారు. పేర్లు మార్చడంపై నటరాజ్ మాట్లాడుతూ.. ‘దానిని మైసూర్ పాక్ అనే పిలవండి.. మన పూర్వీకులు అందించిన ఆవిష్కరణకు ఇంకో పేరు ఉండదు’ అని అన్నారు. కన్నడలో 'పాక్' అంటే చక్కెర లేదా బెల్లంతో చేసే పదార్థం అని అర్థం. దీనిని మైసూర్‌లో మొదట తయారు చేయడం వల్ల మైసూర్ పాక్ అని పేరు వచ్చింది. దీనికి వేరే పేరు పెట్టడం అనవసరం అని ఆయన అన్నారు. పహల్గామ్ ఉగ్రదాడికి ప్రతీకారంగా భారత్ ఆపరేషన్ సిందూర్ చేపట్టి పాకిస్థాన్, పీఓకేలోని ఉగ్రస్థావరాలను ధ్వంసం చేసింది. దీంతో భారత్, పాకిస్థాన్ సరిహద్దుల్లో ఉద్రిక్తతలు తీవ్రస్థాయికి చేరాయి.

అయితే, స్వీట్స్ షాపు యజమాని అంజలీ జైన్ మాట్లాడుతూ.. ‘దేశభక్తి అనేది కేవలం సరిహద్దుల్లో ఉంటే సరిపోదు. ప్రతి పౌరుడికి దేశంపై ప్రేమ ఉండాలి. అందుకే మేం ఈ నిర్ణయం తీసుకున్నాం’ అని చెప్పారు. 'పాక్' అనే పదానికి పాకిస్థాన్‌తో సంబంధం లేకపోయినా, ఆ పేరు వినడానికి ఆ దేశం పేరులా ఉండటంతో మార్చినట్లు ఆమె తెలిపారు. 'శ్రీ' అనే పదం శుభానికి సూచికగా పెట్టినట్లు పేర్కొన్నారు. దేశభక్తితో కొందరు తీసుకున్న ఈ నిర్ణయం చర్చనీయాంశంగా మారింది. కొందరు దీనిని సమర్థిస్తుంటే, మరికొందరు వ్యతిరేకిస్తున్నారు. పేర్లు మార్చడం వల్ల చరిత్రను మార్చలేమని విమర్శిస్తున్నారు. ఏది ఏమైనా, ఈ ఘటన దేశంలో చర్చకు దారితీసింది.

భాషా నిపుణుల వాదన

‘పాక్’ అనే పదానికి పర్షియన్ మూలాలున్నాయి. అది 'తినుబండారం' లేదా 'శుద్ధమైనది' అనే అర్థాలనిచ్చే పదం. హిందీ, కన్నడ భాషల్లో ఇది చక్కెర పాకంతో తయారు చేసిన పదార్థం అనే అర్థం. కాబట్టి, 'మైసూరు పాక్' అనే పేరు చారిత్రకంగా, భాషాపరంగా కూడా సరైందేనని అంటున్నారు.