ఐటీఆర్ ఫైలింగ్ గడువు పొడిగింపు.. కొత్త తేదీ ఇదే

ఆదాయపు పన్ను చెల్లింపుదారులకు శుభవార్త. 2024-25 ఆర్థిక సంవత్సరానికి సంబంధించి (అసెస్‌మెంట్ ఇయర్ 2025-26) ఆదాయపు పన్ను రిటర్న్‌లు దాఖలు చేయడానికి చివరి తేదీని పొడిగిస్తూ ఆదాయపు పన్ను శాఖ కీలక నిర్ణయం తీసుకుంది. సాధారణంగా జులై 31, 2025న ముగియాల్సిన గడువును, ఇప్పుడు సెప్టెంబర్ 15, 2025 వరకు పొడిగించారు. ఈ నిర్ణయంతో పన్ను చెల్లింపుదారులు, ముఖ్యంగా జీతం పొందే ఉద్యోగులు ఊపిరి పీల్చుకోవచ్చు.

గడువు పొడిగింపునకు కారణాలేంటి?

ఐటీఆర్ ఫారమ్‌లలో మార్పులు: అసెస్‌మెంట్ ఇయర్ 2025-26 కోసం నోటిఫై చేసిన ఐటీఆర్ ఫారమ్‌లలో గణనీయమైన మార్పులు జరిగాయి. వీటి ఉద్దేశం కంప్లయెన్స్ సులభతరం చేయడం, పారదర్శకతను పెంచడం, సరైన వివరాలు ఇచ్చేలా ప్రోత్సహించడం. ఈ మార్పుల కారణంగా సిస్టమ్ డెవలప్‌మెంట్, ఇంటిగ్రేషన్, సంబంధిత యుటిలిటీల టెస్టింగ్ కోసం అదనపు సమయం అవసరం.

యుటిలిటీల ఆలస్యం: ఆదాయపు పన్ను రిటర్న్‌లను దాఖలు చేయడానికి అవసరమైన యుటిలిటీలను (సాఫ్ట్‌వేర్ టూల్స్) ఆదాయపు పన్ను శాఖ ఇంకా విడుదల చేయలేదు. యుటిలిటీలు సిద్ధం కానందున, పన్ను చెల్లింపుదారులు రిటర్న్‌లను ఫైల్ చేయలేకపోతున్నారు.

టీడీఎస్ క్రెడిట్ రిఫ్లెక్షన్స్: మే 31, 2025 నాటికి దాఖలు చేయాల్సిన టీడీఎస్ స్టేట్‌మెంట్‌ల నుంచి వచ్చే క్రెడిట్‌లు జూన్ మొదటి వారంలో కనిపించడం ప్రారంభిస్తాయని భావిస్తున్నారు. ఈ క్రెడిట్‌లు సరిగ్గా కనిపించకపోతే, రిటర్న్‌లు ఫైల్ చేయడానికి తగినంత సమయం లభించదు.

ఈ కారణాలన్నింటినీ పరిగణనలోకి తీసుకుని, పన్ను చెల్లింపుదారులకు సున్నితమైన, కచ్చితమైన ఫైలింగ్ అనుభవాన్ని అందించడానికి గడువును పొడిగించాలని సీబీడీటీ నిర్ణయించింది. ఈ మేరకు త్వరలో అధికారిక నోటిఫికేషన్ విడుదల చేయనున్నట్లు 'ఎక్స్' (గతంలో ట్విట్టర్) పోస్ట్‌లో ఆదాయపు పన్ను శాఖ ప్రకటించింది.

జీతం పొందే ఉద్యోగులకు ప్రయోజనం:

సాధారణంగా జులై 31న ముగిసే ఐటీఆర్ ఫైలింగ్ గడువు జీతం పొందే ఉద్యోగులతో సహా ఆడిట్ అవసరం లేని పన్ను చెల్లింపుదారులందరికీ వర్తిస్తుంది. ఈ గడువు పొడిగింపుతో, వారికి తమ ఆదాయపు పన్ను రిటర్న్‌లను దాఖలు చేయడానికి అదనంగా 46 రోజులు లభించాయి. ఇది వారికి అన్ని వివరాలను సరిచూసుకోవడానికి, సరైన పన్ను రిటర్న్‌ను సమర్పించడానికి తగినంత సమయాన్ని అందిస్తుంది. ఒకవేళ గడువు తేదీలోగా ఐటీఆర్ దాఖలు చేయకపోతే, రూ. 5 వేల వరకు జరిమానా పడుతుందని గుర్తుంచుకోవాలి. ఈ గడువు పొడిగింపుతో, చాలా మంది పన్ను చెల్లింపుదారులు జరిమానాల నుంచి తప్పించుకోగలరు.