ముందుకు వచ్చిన సముద్రం.. ఎందుకు ఇలా జరుగుతుందంటే

బంగాళాఖాతంలో ఏర్పడిన అల్పపీడనం వాయిగుండంగా మారింది. దీనికి తోడు నైరుతి రుతుపవనాల ప్రభావంతో ఆంధ్రప్రదేశ్‌లో పలు జిల్లాలలో భారీ వర్షాలు కురుస్తున్నాయి. మరోవైపు అల్పపీడన ద్రోణి ప్రభావంతో అంబేద్కర్ కోనసీమ జిల్లాలో సముద్రం ముందుకు వచ్చింది. డాక్టర్ అంబేద్కర్ కోనసీమ జిల్లా రాజోలులో సముద్రం ముందుకు వచ్చింది. దీంతో స్థానికులు ఆసక్తిగా గమనించారు. మరోవైపు కోనసీమ జిల్లాలోని అంతర్వేది, కేశనపల్లి, చింతలమోరి, కరవాక ప్రాంతాల్లోనూ సముద్రపు కెరటాలు ఉవ్వెత్తున ఎగసిపడుతున్నాయి. అల్పపీడన ద్రోణి ప్రభావం, సముద్రంలో ఆటు పోటు కారణంగా సముద్రపు నీరు ముందుకు వచ్చి రోడ్డుపైకి చేరింది. దీంతో స్థానికులు సెల్ఫీలతో ఆ ప్రాంతంలో సందడి చేశారు.

అల్పపీడనం సమయంలో సముద్రం ముందుకు వచ్చే విషయాన్ని స్టోర్మ్ సర్జ్‌గా పిలుస్తుంటారు. తీవ్ర అల్పపీడనం, తుపాను వంటి సమయాల్లో ఇలాంటి ఘటనలు జరుగుతూ ఉంటాయి. అల్పపీడనం ఉన్నప్పుడు సముద్రం ముందుకు రావడం లేదా సముద్ర మట్టం పెరగడం జరుగుతూ ఉంటుంది. సాధారణంగా, సముద్ర ఉపరితలంపై వాతావరణం పీడనం ఉంటుంది. ఈ పీడనం సముద్రపు నీటిని కిందకు నెట్టివేస్తూ ఉంటుంది. అయితే అల్పపీడనం ఏర్పడినప్పుడు, సముద్రంపై ఉన్న గాలి పీడనం తగ్గుతుంది. ఫలితంగా నీటిపై తక్కువ బరువు ఉంటుంది. కావున సముద్రపు నీరు పైకి లేస్తుంది. ఫలితంగా సముద్రపు నీరు ముందుకు వస్తుంది. దీనినే "ఇన్వర్టెడ్ బారోమీటర్ ఎఫెక్ట్" అని కూడా అంటారు.

ఇన్వర్టెడ్ బారోమీటర్ ఎఫెక్ట్ సమయంలో అల్పపీడనం కారణంగా.. సుమారు 1 మిల్లీబార్ పీడనం తగ్గితే, సముద్ర మట్టం 1 సెంటీమీటర్ వరకు పెరుగుతుంది. అలా పీడనం తగ్గి సముద్రం ముందుకు వచ్చే పరిస్థితులు ఏర్పడతాయి. ఇక తుపానుల సమయంలో బలమైన గాలులు వీస్తుంటాయి. ఈ గాలులు సముద్రపు ఉపరితలంపై ఒత్తిడిని కలిగించి, నీటిని తీరం వైపు నెడతాయి. దీనినే స్టోర్మ్ సర్జ్ అని పిలుస్తుంటారు. తీరం వెంబడి నీటి లోతు తక్కువగా ఉన్నప్పుడు ఈ ప్రభావం ఎక్కువగా ఉంటుంది.

అలాగే బలమైన ఈదురు గాలుల వల్ల పెద్ద అలలు ఏర్పడతాయి. ఈ అలలు తీరం వైపు వస్తున్నప్పుడు వాటి ఎత్తు పెరుగుతుంది, ఇది కూడా.. సముద్రం ముందుకు వచ్చినట్లు కనిపించడానికి కారణమవుతుంది. మరోవైపు నైరుతి రుతుపవనాల ప్రభావంతో కడపలో భారీ వర్షం కురిసింది. శుక్రవారం ఉదయం నుంచి ఆకాశం మేఘావృతమై ఉంది. అనంతరం భారీ వర్షం కురవటంతో.. వాహనదారులు, పాదచారులు ఇబ్బందులు పడ్డారు.