ట్రంప్‌ మనవరాలిని పెళ్లాడేందుకు వచ్చా

ఈమధ్య కాలంలో అగ్రరాజ్యం అమెరికా అధ్యక్షుడు డొనాల్డ్ ట్రంప్‌పై హత్యాయత్న ఘటనలు ఎక్కువవుతుండగా.. తాజాగా ఆయన నివాసం మార్ ఎ లాగో గోడ దూకేందుకు ఓ యువకుడు యత్నించాడు. విషయం గుర్తించిన అధికారులు వెంటనే అతడిని అదుపులోకి తీసుకున్నారు. భారీ భద్రత నడుమ వ్యక్తిని జైలుకు తరలించారు. ఆపై ఎందుకు గోడ దూకావంటూ విచారించగా.. యువకుడు విస్తుపోయే విషయాలు చెప్పాడు. తాను ట్రంప్ మనవరాలిని పెళ్లాడలనుకుంటున్నట్లు వివరించారు. ఆ విషయాన్ని ట్రంప్‌నకు చెప్పేందుకే గోడ దూకబోయానంటూ వెల్లడించాడు. ఇది విన్న పోలీసులు షాక్ అయ్యారు. వెంటనే విషయాన్ని అధ్యక్షుడికి తెలిపారు.

అమెరికా అధ్యక్షుడు డొనాల్డ్ ట్రంప్ అధికారిక నివాసం మార్ ఎ లాగో వద్ద అత్యంత కట్టుదిట్టమైన భద్రత ఉంటుంది. అయితే అనేక మంది సందర్శకులు, జనాలు ఈ ఇంటిని చూడాలని కలలు కంటారు. కానీ వీరెవరికీ అక్కడకి ప్రవేశం లేదు. ముఖ్యంగా ఈమధ్య కాలంలో ట్రంప్‌పై హత్యాయత్న ఘటనలు ఎక్కువ కాగా.. పోలీసులు సైతం అక్కడ భద్రతను పెంచారు. 24 గంటల్లూ కాపలా కాస్తున్నారు. ఈ స్థాయిలో భద్రత ఉన్నప్పటికీ.. మంగళవారం రోజు 23 ఏళ్ల వయసు కల్గిన ఆంథొని థామస్ అనే యవకుడు అర్ధరాత్రి 11 గంటల సమయంలో ట్రంప్ ఇంటి గోడ దూకేందుకు ప్రయత్నించాడు. అయితే వెంటనే విషయం గుర్తించిన సిబ్బంది అతడిని అదుపులోకి తీసుకున్నారు.

ఆపై పోలీస్ స్టేషన్‌కు తీసుకెళ్లి ఆంథొని థామస్‌ను విచారించారు. ఈ సందర్భంగానే అతడు గోడ ఎందుకు దూకాడో చెప్పి షాక్ ఇచ్చాడు. ముఖ్యంగా తాను ట్రంప్‌నకు ఒక శుభవార్త చెప్పడానికే ఆ ఇంటికి వచ్చానని.. అనుమతి లేకపోవడం వల్ల గోడ దూకేందుకు యత్నించానని అన్నాడు. ఆయన మనవరాలు 18 ఏళ్ల కై ట్రంప్‌ను తాను పెళ్లి చేసుకోవాలని అనుకుుంటున్నానని థామస్ పేర్కొన్నాడు. ఇది విన్న పోలీసులు షాక్ అయ్యారు. అయితే ఈ సమయంలో ట్రంప్ వాషింగ్టన్‌లో ఉండగా.. ఏం చేయాలో పాలుపోక పోలీసులు వెంటనే విషయాన్ని ట్రంప్‌నకు తెలియజేశారు. అలాగే ఆంథొని థామస్‌ను పామ్ బీచ్‌లోని జైలుకు పంపించారు.

అయితే థామస్ ఇలా చేయడం ఇదే తొలిసారి కాదని.. గతంలోనూ ఇలా గోడ దూకే ప్రయత్నం చేశాడని పామ్ బీచ్ పోలీసులు వెల్లడించారు. 2024 డిసెంబర్ నెలలో ఆ ఘటన జరగ్గా.. అతడిని అరెస్ట్ చేసినట్లు పేర్కొన్నారు. మరోవైపు ట్రంప్ మనవరాలు, డొనాల్డ్ ట్రంప్ జూనియర్, వెనస్సా ట్రంప్ దంపతుల కుమార్తె అయిన కై మాడిసన్ ట్రంప్.. సోషల్ మీడియా ఇన్ ఫ్లూయెన్సర్‌గా ప్రసిద్ధి చెందారు. అలాగే ఈమెకు గోల్ఫ్ అంటే చాలా ఇష్టం.