అసిమ్ మునీర్ నా భార్యపై కక్షగట్టాడు.. ఇమ్రాన్ ఖాన్

పాకిస్థాన్ ఆర్మీ చీఫ్ జనరల్ అసిమ్ మునీర్‌పై ఆ దేశ మాజీ ప్రధాన మంత్రి, తెహ్రీక్ ఇ ఇన్సాఫ్ పార్టీ అధ్యక్షుడు ఇమ్రాన్ ఖాన్ సంచలన ఆరోపణలు చేశారు. మునీర్‌కు ప్రతీకార స్వభావం ఉందని, తన భార్య బుష్రా బీబీని కావాలనే ఇబ్బంది పెడుతున్నారని ఆయన ఆరోపించారు. తాను ప్రధానిగా ఉన్నప్పుడు ఇంటర్ సర్వీస్ ఇంటెలిజెన్స్ (ఐఎస్‌ఐ) చీఫ్పదవి నుంచి తొలగించినందుకే మునీర్ ఇలా చేస్తున్నారని ఖాన్ ఆరోపించారు. ప్రస్తుతం జైలులో ఉన్న ఖాన్, తన కుటుంబ సభ్యులను, పార్టీ కార్యకర్తలను కూడా అన్యాయంగా జైలులో పెట్టారని ఆవేదన వ్యక్తం చేశారు.

ప్రస్తుతం రావల్పిండిలోని ఆడియాలా జైలులో ఉన్నపాక్ మాజీ ప్రదాని ఇమ్రాన్ ఖాన్ మాట్లాడుతూ.. తాను ప్రధానిగా ఉన్నప్పుడు జనరల్ మునీర్‌ను ఐఎస్‌ఐ డైరెక్టర్ జనరల్ (డీజీ) పదవి నుంచి తొలగించానని చెప్పారు. ఆ విషయం గురించి మాట్లాడేందుకు మునీర్.. తన భార్య బుష్రా బీబీని మధ్యవర్తుల ద్వారా సంప్రదించడానికి ప్రయత్నించాడని తెలిపారు. అయితే, బుష్రా బీబీ ఆ ప్రయత్నాన్ని తిరస్కరించిందని ఖాన్ చెప్పారు. దీనితో మునీర్ ఆమెపై కక్ష పెంచుకున్నాడని ఆరోపణలు చేశారు. అన్యాయంగా 14 నెలల శిక్ష విధించారని, జైలులో కూడా ఆమెను సరిగా చూడటం లేదని ఖాన్ ఆరోపించారు. ‘దాని వెనక ఆసిమ్‌ మునీర్‌ ప్రతీకార స్వభావం స్పష్టంగా కనిపిస్తోంది’ అని ఇమ్రాన్ ఖాన్ అన్నారు.

తన భార్యకు రాజకీయాలతో సంబంధం లేదని, అయినా ఆమెను లక్ష్యంగా చేసుకున్నారని ఖాన్ అన్నారు. పాకిస్థాన్ నియంతృత్వ పాలనలో కూడా ఇలా జరగలేదని ఆయన ఆవేదన చెందారు. నెల రోజులుగా తన భార్యను కలవడానికి కూడా అనుమతించడం లేదని ఆయన వాపోయారు. మే 9, 2023న జరిగిన హింస (ఇమ్రాన్‌ను అరెస్టు చేసిన రోజు) 'లండన్‌ ప్లాన్‌'లో భాగమని ఖాన్ ఆరోపించడం గమనార్హం. ‘మే 9న జరిగిన సైనిక స్థావరాలపై దాడులు ఎక్కడి నుంచి ప్రేరితమయ్యాయన్నది ప్రజలకు తెలియకపోవచ్చు, కాని వాటికి నాటకీయ నేపథ్యం ఉంది... ఇవి లండన్ ప్లాన్‌లో భాగమే.. తాను, తన పార్టీ నేతలు, కార్యకర్తలు అన్యాయంగా అరెస్టులకు గురయ్యారు’ అని అన్నారు.

పాక్ ఆర్మీ చీఫ్ జనరల్ ఆసిం మునీర్‌పై. ఖాన్ చేసిన వ్యాఖ్యలు కేవలం రాజకీయ విమర్శలు మాత్రమే కాదు, తాను అధికారంలో ఉన్నప్పుడు తీసుకున్న ఒక కీలక నిర్ణయం ఎలా వ్యక్తిగత ప్రతీకార చర్యలకు దారితీసిందో వివరిస్తూ, ఆర్మీని తీవ్రంగా ఆక్షేపించారు. ‘నిర్భందాలు, తప్పుడు కేసులు, ప్రజాస్వామ్యానికి వ్యతిరేకంగా జరిగిన దౌర్జన్యాలు’ అని ఖాన్ ఆరోపించారు. ‘మా మీద పెట్టిన కేసుల్లో సాక్ష్యాలేమీ లేవు. కానీ న్యాయవ్యవస్థ మౌనంగా చూస్తోంది. మే 9న జరిగిన ఘటనలపై సీసీటీవీ ఫుటేజ్‌ను కోరే ధైర్యం కూడా ఏ జడ్జికీ లేదు’" అని ఖాన్ గట్టి విమర్శలు చేశారు. దీనిపై స్వతంత్ర న్యాయ కమిషన్ ఏర్పాటు చేయాలని ఆయన డిమాండ్ చేస్తున్నారు.