అత్యాధునిక టెక్నాలజీ.... అయినా బోయింగ్ భద్రతపై అనుమానాలు

 గుజరాత్‌లోని అహ్మదాబాద్‌లో ఎయిర్ ఇండియాకు చెందిన బోయింగ్ 787-8 డ్రీమ్‌లైన విమానాశ్రయం నుంచి టేకాఫ్ అయిన కొద్దిసేపటికే నియంత్రణ కోల్పోయి కుప్పకూలింది. ప్రమాదం జరిగిన సమయంలో విమానంలో 242 మంది ప్రయాణికులు ఉన్నారు. ప్రస్తుతం సహాయక చర్యలు ముమ్మరంగా కొనసాగుతున్నాయి. అయితే అత్యాధునిక సాంకేతికతో తయారైన ఈ విమానాలను.. ప్రపంచవ్యాప్తంగా ఎయిర్‌లైన్ సంస్థలు వినియోగిస్తున్నాయి. ఎక్కువ దూరం ప్రయాణించాల్సిన మార్గాల్లో వీటిని నడుపుతున్నాయి. అన్ని రకాలుగా ఈ బోయింగ్ 787-8 డ్రీమ్‌లైనర్ విమానం అత్యుత్తమంగా ఉంది. అయినా ఈ ప్రమాదం ఎలా జరిగింది అనే విషయంపై ప్రశ్నలు ఉత్పన్నమవుతున్నాయి. బోయింగ్ విమానాల భద్రతపై అనుమానాలు వ్యక్తమవుతున్నాయి.

ఇలాంటి అత్యంత తీవ్రమైన ప్రమాదానికి బోయింగ్ 787 డ్రీమ్‌లైనర్ విమానం గురికావడం ఇదే మొదటిసారి కావడం గమనార్హం. తాజాగా జరిగిన ఎయిర్ ఇండియా విమానం AI-171 ప్రమాదం.. బోయింగ్ 787 డ్రీమ్‌లైనర్‌కు సంబంధించిన మొట్టమొదటి దుర్ఘటనగా నిలిచింది. బోయింగ్ 787-8ను 2011లో లాంఛ్ చేశారు. ఇది బోయింగ్ డ్రీమ్‌లైనర్ సిరీస్‌లో మొదటి మోడల్. ఈ విమానాన్ని ప్రపంచంలోని అనేక విమానయాన సంస్థలు సుదూర ప్రాంతాలకు.. ఖండాంతర ప్రయాణాలకు ఉపయోగిస్తున్నాయి.

ఎయిర్‌లైన్ సంస్థల కాన్ఫిగురేషన్ బట్టి సాధారణంగా ఈ విమానం 242 నుండి 290 మంది ప్రయాణికులను తీసుకువెళుతుంది. ఈ విమానం 13,530 కిలోమీటర్ల దూరం వరకు ఆగకుండా ప్రయాణించగలదు. అందుకే అధిక రద్దీ ఉండే అంతర్జాతీయ రూట్లలో ఈ విమానాన్ని ఎక్కువగా ఉపయోగిస్తుంటారు. దీనిని 50% మిశ్రమ పదార్థాలతో నిర్మించారు. 787-8 విమానం తేలికైనది కావడంతో ఇంధనం ఆదా అవుతుంది.

ఈ విమానంలో సింథటిక్ విజయ్ సిస్టమ్- SVS, ఇంటిగ్రేటెడ్ మాడ్యులర్ ఏవియానిక్స్- IMA వంటి అత్యాధునిక ఫ్లైట్ కంట్రోల్ సిస్టమ్స్ ఉన్నాయి. SVS అనేది త్రీడీలో భూభాగాన్ని, అడ్డంకులను చూపిస్తుంది. ఇది లో విజన్ పరిస్థితుల్లో పైలట్‌కు సహాయపడుతుంది. IMA అనేక ఏవియానిక్స్ విధులను.. కొన్ని భాగాలలోకి చేర్చుతుంది. దీంతో విమాన నిర్వహణ సులభతరం అవుతుంది. ఫ్లై-బై-వైర్ కంట్రోల్స్, అత్యాధునిక ఏవియానిక్స్ భద్రతను మరింత పెంచుతాయి.

ధర ఎంతంటే..

పబ్లిక్ డొమైన్‌లో అందుబాటులో ఉన్న సమాచారం ప్రకారం.. బోయింగ్ 787-8 డ్రీమ్‌లైనర్ ధర సుమారు 248 మిలియన్ డాలర్లు ఉంటుంది. అయితే వాస్తవ ధర ఇంతకంటే తక్కువగా ఉంటుంది. డీల్ నెగోషియేషన్స్, పెద్ద మొత్తంలో ఆర్డర్లు, ఎయిర్‌లైన్‌కు అవసరమయ్యే నిర్దిష్ట మార్పుల కారణంగా ధర తగ్గే అవకాశం ఉంది. ఇక కొనుగోలుదారు, ఒప్పందం వంటి వాటిని పరిగణలోకి తీసుకుంటే 30-50శాతం వరకు డిస్కౌంట్లు ఉండవచ్చు. ఫలితంగా వాస్తవంగా ఒక్కో విమానం ధర 125 మిలియన్ డాలర్ల నుంచి $175 మిలియన్ డాలర్ల వరకు ఉండవచ్చు.

విమాన భద్రతపై అనుమానాలు

ఈ మోడల్ చాలా కాలంగా విమానయాన రంగంలో బోయింగ్ ఆవిష్కరణకు చిహ్నంగా ఉంది. అయితే ఈ ప్రమాదం.. విమాన భద్రతపై నీడలు కమ్ముకునేలా చేసింది. గతంలో బోయింగ్ 737 మ్యాక్స్‌ విమానాలు ఘోర ప్రమాదాలకు గురయ్యాయి. అందులో 346 మంది మృతిచెందారు. ఆ కేసులో తీవ్ర ఇబ్బందులు ఎదుర్కొంది బోయింగ్. ఈ విషయంపై అమెరికా న్యాయ విచారణ చేపట్టగా.. ఆయా విమానాల సర్టిఫికేషన్స్‌ విషయంలో అమెరికా నియంత్రణ సంస్థలను మోసం చేసినట్లు ఒప్పుకొంది. ఈ బోయింగ్ 787-8 డ్రీమ్‌లైనర్ విషయంలో ఏం జరుగుతుందో వేచి చూడాలి.