పశ్చిమాసియాలో మరోసారి యుద్ధ మేఘాలు కమ్ముకున్నాయి

పశ్చిమాసియాలో మరోసారి యుద్ధ మేఘాలు కమ్ముకున్నాయి. శుక్రవారం తెల్లవారుజామున ఇరాన్‌పై ఇజ్రాయెల్ భీకర సైనిక చర్యకు పాల్పడింది. ఈ ఊహించని దాడిలో ఇరాన్ రాజధాని టెహ్రాన్‌తో పాటు పలు కీలక నగరాల్లో భారీ పేలుళ్లు సంభవించాయి. ఇరాన్ అణు కేంద్రాలు, సైనిక స్థావరాలే ప్రధాన లక్ష్యంగా ఈ దాడులు జరిగినట్లు అంతర్జాతీయ మీడియా వర్గాలు నివేదిస్తున్నాయి. ఈ పరిణామంతో ప్రాంతీయంగా తీవ్ర ఉద్రిక్తతలు నెలకొన్నాయి, ప్రపంచ దేశాలు ఆందోళన వ్యక్తం చేస్తున్నాయి.ఇజ్రాయెల్ ప్రధానమంత్రి బెంజమిన్ నెతన్యాహు కార్యాలయం ఈ దాడులను ధృవీకరించినప్పటికీ, పూర్తి వివరాలను వెల్లడించలేదు. టెహ్రాన్‌లోని పలు నివాస ప్రాంతాలు కూడా దాడుల ధాటికి దెబ్బతిన్నాయని, రివల్యూషనరీ గార్డ్స్ ప్రధాన కార్యాలయం సమీపంలో మంటలు చెలరేగాయని స్థానిక మీడియా కథనాలు ప్రసారం చేస్తున్నాయి.ఇరాన్ అణు కార్యక్రమం తమ దేశ భద్రతకు తీవ్ర ముప్పుగా పరిణమించిందని, అణ్వాయుధాల తయారీని నిరోధించడానికే ఈ కఠిన చర్యలు చేపట్టాల్సి వచ్చిందని ఇజ్రాయెల్ రక్షణ శాఖ  వర్గాలు పేర్కొన్నాయి. ఇరాన్ అణుబాంబు తయారీకి అత్యంత సమీపంలో ఉందని, ఇప్పటికే తొమ్మిది అణు బాంబులకు సరిపడా అత్యంత శుద్ధి చేసిన యురేనియం  నిల్వలను సమకూర్చుకుందని, ఇందులో మూడో వంతు గత మూడు నెలల్లోనే ఉత్పత్తి అయిందని ఐడీఎఫ్ ఒక ప్రకటనలో ఆరోపించింది. దౌత్యపరమైన మార్గాలు విఫలమైన నేపథ్యంలో, తమ పౌరుల భద్రత దృష్ట్యా ఈ చర్య అనివార్యమైందని ఇజ్రాయెల్ స్పష్టం చేసింది. అంతర్జాతీయ అణు ఇంధన సంస్థ  నివేదికలు కూడా ఇరాన్ అణు కార్యక్రమం శాంతియుత ప్రయోజనాలకు విరుద్ధంగా సైనిక లక్ష్యాల వైపు సాగుతోందని సూచిస్తున్నాయని ఇజ్రాయెల్ గుర్తుచేసింది.పౌరుల భద్రతకు ప్రాధాన్యత ఈ సైనిక చర్య కేవలం ఇరాన్ అణు కార్యక్రమంతో సంబంధం ఉన్న సైనిక స్థావరాలు, కీలక మౌలిక సదుపాయాలపైనే కేంద్రీకృతమైందని, ఇరాన్ ప్రజలు తమ లక్ష్యం కాదని ఇజ్రాయెల్ అధికారులు స్పష్టం చేశారు. పౌరులకు ఎలాంటి హాని కలగకుండా అన్ని రకాల జాగ్రత్తలు తీసుకుంటున్నామని, కేవలం ఇరాన్ పాలన యొక్క అణు ఆశయాలను దెబ్బతీయడమే తమ ఉద్దేశమని వెల్లడించారు.మరోవైపు, ఇజ్రాయెల్ ఆరోపణలను ఇరాన్ తీవ్రంగా ఖండించింది. తమ అణు కార్యక్రమం పూర్తిగా శాంతియుత ప్రయోజనాల కోసం, విద్యుత్ ఉత్పత్తి వంటి అవసరాల కోసమేనని ఇరాన్ విదేశాంగ శాఖ పునరుద్ఘాటించింది. ఇరాన్ చురుకుగా అణ్వాయుధాలను అభివృద్ధి చేయడం లేదని గతంలో అమెరికా నిఘా వర్గాలు కూడా అంచనా వేశాయని గుర్తుచేసింది. నటాంజ్, ఫోర్డోలలోని తమ ప్రధాన అణు శుద్ధి కర్మాగారాలు అత్యంత భద్రత నడుమ, వైమానిక దాడుల నుండి రక్షణ పొందేలా భూగర్భంలో, పర్వతాల్లో నిర్మించబడ్డాయని తెలిపింది. ఇజ్రాయెల్ దురాక్రమణకు తగిన ప్రతీకారం ఉంటుందని ఇరాన్ హెచ్చరించింది.ఈ దాడుల నేపథ్యంలో, ఒమన్‌లో అమెరికా మధ్యవర్తిత్వంతో ఇరాన్ ప్రతినిధులతో జరగాల్సిన పరోక్ష చర్చల భవిష్యత్తు ప్రశ్నార్థకంగా మారింది. ఇప్పటికే పలుమార్లు వాయిదా పడుతూ వస్తున్న ఈ చర్చలు, తాజా పరిణామాలతో మరింత సంక్లిష్టంగా మారే అవకాశం ఉంది. ఈ దాడులు పశ్చిమాసియాలో ఉద్రిక్తతలను మరింత పెంచుతాయని, విస్తృత స్థాయి యుద్ధానికి దారితీసే ప్రమాదం ఉందని అంతర్జాతీయ పరిశీలకులు తీవ్ర ఆందోళన వ్యక్తం చేస్తున్నారు. ఐక్యరాజ్యసమితి, పలు ప్రపంచ దేశాలు ఇరుపక్షాలు సంయమనం పాటించాలని విజ్ఞప్తి చేశాయి