అహ్మదాబాద్ విమానం కూలిన ఘటన దర్యాప్తులో బిగ్‌ అప్‌డేట్,,,కీలకమైన బ్లాక్ బాక్స్ దొరికింది

అహ్మదాబాద్ నుంచి లండన్ బయల్దేరిన బోయింగ్ 787 విమానం.. గాల్లోకి ఎగిరిన కొన్ని క్షణాల్లోనే నివాస సముదాయాలపై కుప్పకూలి భారీ ప్రమాదం సంభవించిన సంగతి తెలిసిందే. అయితే ఈ ప్రమాదానికి గల కారణాలపై అనేక వాదనలు వినిపిస్తున్నాయి. ఎయిర్‌లైన్స్ నిర్వహణ లోపం అని కొందరు.. విమానంలో తలెత్తిన టెక్నికల్ సమస్య అని మరికొందరు, మానవ తప్పిదమని ఇంకొందరు.. ఇలా రకరకాల కారణాలు అంచనా వేస్తున్నారు. ఈ నేపథ్యంలోనే అసలు కారణం ఏంటి అనేది ఎవరికీ అంతు చిక్కడం లేదు. ఈ విమాన ప్రమాదాన్ని నిపుణులు కూలంకషంగా పరిశీలిస్తున్నారు. అయితే విమానంలో అతి ముఖ్యమైన బ్లాక్ బాక్స్ నిన్నటి నుంచి దొరక్కపోవడం తీవ్ర ఆందోళనకు గురి చేయగా.. తాజాగా అది దొరికింది. సంఘటనా స్థలంలోనే బ్లాక్ బాక్స్ దొరికినట్లు పోలీసులు వెల్లడించారని మీడియా వర్గాలు వెల్లడిస్తున్నాయి.

ఇక ప్రమాదం జరగడానికి గల కారణాలను తెలుసుకునేందుకు ఈ బ్లాక్ బాక్స్ కీలకం కానుంది. దొరికిన ఈ బ్లాక్ బాక్స్ నుంచి సమాచారాన్ని సేకరించేందుకు అధికారులు రంగంలోకి దిగారు. ఆ బ్లాక్ బాక్స్‌లో రికార్డ్ అయిన సమాచారం ఆధారంగా అసలు విమానం ఎందుకు కూలిపోయింది అనే విషయాలు తెలియనున్నాయి. ప్రమాదానికి కచ్చితమైన కారణమేంటన్నది కనుక్కోవడంలో విమానంలోని బ్లాక్ బాక్స్ కీలక పాత్ర పోషిస్తుంది. విమానం టేకాఫ్ కావడంలో తలెత్తిన ఇబ్బంది, టేకాఫ్ అయిన తర్వాత వెంటనే ఎమర్జెన్సీ కాల్ ఇవ్వడం, విమానంలో అంతకుముందే టెక్నికల్ సమస్య ఉన్నట్లు ఓ ప్రయాణికుడు వీడియో పోస్ట్ చేయడంతో అసలు ప్రమాదానికి కారణం సాంకేతిక లోపమా లేక ఇంజిన్ పనిచేయకపోవడమా లేదా మానవ తప్పిదమా, ఇంకేమైనా కారణాలున్నాయా అనేది తెలుసుకోవడంలో ఈ బ్లాక్ బాక్స్ ఇచ్చే సమాచారమే కీలకం కానుంది.

విమానంలో జరిగే ప్రతీ విషయం ఈ బ్లాక్ బాక్స్‌లో రికార్డ్ అవుతుంది. అందుకే అలాంటి బ్లాక్ బాక్స్‌ను విశ్లేషించి అది ఇచ్చే సమాచారం ఆధారంగానే అసలు ఏం జరిగింది అనేది తెలుసుకునే అవకాశం ఉంటుంది. అయితే ప్రతీ కమర్షియల్ విమానంలో 2 బ్లాక్ బాక్స్‌లు ఉంటాయి. ఈ బ్లాక్ బాక్సులు ఆరెంజ్ కలర్‌లో ఉంటాయి. విమానానికి ఏదైనా ప్రమాదం జరిగి.. అగ్ని ప్రమాదం చెలరేగి విమానం మొత్తం కాలిబూడిదైనా సరే సులువుగా గుర్తించేందుకు వీలుగా ఆ బ్లాక్ బాక్స్‌ను ఆరెంజ్ కలర్‌లో తయారు చేస్తారు.

ఇక ఆ బ్లాక్ బాక్స్‌లో 2 కీలక పరికరాలు ఉంటాయి. ఒకటి ఫ్లైట్ డేటా రికార్డర్.. ఇంకొకటి కాక్‌పిట్ వాయిస్ రికార్డర్. ఈ ఫ్లైట్ డేటా రికార్డర్ అనేది.. విమానానికి సంబంధించిన వేగం, ఎత్తు, ఇంజిన్ పనితీరు, ఇంధనం, ల్యాండింగ్ గేర్ పనితీరు వంటి సమాచారాన్ని ఎప్పటికప్పుడు రికార్డ్ చేసి స్టోర్ చేస్తుంది. విమాన ఎలా ప్రయాణిస్తుంది అనేది అనుక్షణం కనిపెడుతూ రికార్డు చేస్తుంది. ఇక కాక్‌పిట్ వాయిస్ రికార్డర్ అనేది.. కాక్‌పిట్‌లో పైలట్లు, ఎయిర్‌లైన్ సిబ్బంది మధ్య జరిగే సంభాషణలు, పైలట్ల అనౌన్స్‌మెంట్లు, ఎయిర్ ట్రాఫిక్ కంట్రోల్‌‌తో జరిపే కమ్యూనికేషన్లు, విమానంలో ఇతర శబ్దాలను రికార్డ్ చేస్తుంది. మరోవైపు.. విమాన ప్రమాదానికి ముందు పైలట్లు ఎలాంటి సహాయం కోసం అడిగారు.. వారు ఏం మాట్లాడుకున్నారు అనే విషయాలు మొత్తం ఈ కాక్‌పిట్ వాయిస్ రికార్డర్‌లో స్పష్టంగా రికార్డ్ అవుతాయి. ఈ రికార్డర్లు 25 గంటల పాటు విమానానికి సంబంధించిన పూర్తి డేటాను స్టోర్ చేస్తాయని అధికారులు వెల్లడించారు.

ఇక ఈ బ్లాక్ బాక్సు విమానం వెనుక భాగంలో ఉంటుంది. ఇందుకు ఒక బలమైన కారణం కూడా ఉంది. ఏదైనా విమాన ప్రమాదం జరిగినపుడు.. దాని ముందు భాగం బాగా దెబ్బతింటుంది.. కానీ వెనుక భాగం మాత్రం తక్కువగానే ధ్వంసం అవుతుంది. ఈ కారణం వల్లే బ్లాక్ బాక్స్‌ను వెనుక భాగంలో అమర్చడం వల్ల భారీ ప్రమాదం జరిగినా దానికి ఏం కాకుండా చూస్తారు.