పహల్గాం ఉగ్రవాదులతో పోరాడిన హార్స్ రైడర్ భార్యకు సర్కారు కొలువు

ఏప్రిల్ 22వ తేదీన జమ్మూ కాశ్మీర్‌లోని బైసరన్ లోయలో ఉగ్రవాదులు సృష్టించిన మారణహోమం గురించి అందరికీ తెలిసిందే. కేవలం పురుషులు, ముస్లింకాని వారినే లక్ష్యంగా చేసుకున్న ముష్కరులు 26 మంది అమాయక పర్యాటకుల ప్రాణాలు తీశారు. అయితే నాటి విధ్వంస కాండలో.. పర్యాటకుల ప్రాణాలు కాపాడేందుకు హార్స్ రైడర్ సయ్యద్ ఆదిల్ హుస్సేన్ షా అసాధారణ ధైర్యసాహసాలు ప్రదర్శించారు. కానీ ముష్కరుల కాల్పుల్లో మరణించారు. అయితే ఆయన వీరోచిత బలిదానానికి గుర్తింపుగా.. జమ్మూ కాశ్మీర్ ప్రభుత్వం అతని కుటుంబానికి అండగా నిలిచింది. ఆదిల్ షా భార్య గుల్నాజ్ అక్తర్‌కు ప్రభుత్వ ఉద్యోగం కల్పించింది. అయితే నేరుగా లెఫ్టినెంట్ గవర్నర్ మనోజ్ సిన్హానే ఆమె ఇంటికి వెళ్లి మరీ నియామక లేఖను అందజేశారు.

ఏప్రిల్ 22వ తేదీన పహల్గాంలో జరిగిన ఒక ఉగ్రదాడిలో ఆదిల్ హుస్సేన్ షా అమరుడయ్యారు. ఆ దుర్ఘటనలో నిస్సహాయులైన పర్యాటకులపై ఉగ్రవాదులు కాల్పులు జరుపుతుండగా.. ఆదిల్ షా తన ప్రాణాలకు తెగించి మరీ ఒక ఉగ్రవాది చేతిలోని రైఫిల్‌ను లాక్కోవడానికి ప్రయత్నించారు. ఎలాగైనా సరే తోటి వారిని కాపాడాలని ఆయన ప్రాణాలకు తెగించి సాహసం చేసినప్పటికీ.. ముష్కరులు అతడిని కాల్చి చంపారు. అయితే అక్కడుకున్న వారంతా భయంతో వెనకడుగు వేస్తుంటే.. ఆదిల్ షా మాత్రం ముష్కరులపైకి దూకడాన్ని దేశం మొత్తం గర్వంగా చూసింది. ఆయన ధైర్య సాహసాలను కథలుకథలుగా చెప్పుకుంది.

కానీ ఆదిల్ షా మరణంతో హపత్నార్ ప్రాంతంలోని అతని కుటుంబం తీవ్ర విషాదంలో మునిగిపోయింది. ఇంటికి పెద్ద దిక్కును కోల్పోవడంతో అతడి భార్య గుల్నాజ్ అక్తర్.. అనేక సమస్యలు ఎదుర్కోవాల్సి వచ్చింది. అటు ఆర్థికంగా, ఇటు మానసికింగా విపరీతంగా కుంగిపోయింది. ఇలాంటి కష్టకాలంలోనే వారికి అండగా నిలవాలని జమ్మూ కాశ్మీర్ ప్రభుత్వం నిర్ణయించుకుని.. ఆదిల్ షా భార్య గుల్నాజ్‌కు ప్రభుత్వ ఉద్యోగం ఇచ్చింది. ముఖ్యంగా అనంత్‌నాగ్‌లోని మత్స్య శాఖలో గుల్నాజ్‌కు శాశ్వత ఉద్యోగం ఇస్తున్నట్లు ప్రకటించింది.

నేరుగా లెఫ్టినెంట్ గవర్నర్ మనోజ్ సిన్హానే.. అమరుడైన ఆదిల్ షా ఇంటికి వెళ్లి గుల్నాజ్‌కు నియామక పత్రాన్ని అందజేశారు. ఆపై ఆదిల్ షా ధైర్య సాహసాల గురించి గుర్తు చేశారు. ఆయన చూపిన ధైర్య సాహసాలు, నిస్వార్థ సేవకు ప్రభుత్వం తరఫున ఇదొక చిన్న సాయం మాత్రమేనంటూ వివరించారు. అలాగే అతని త్యాగం, సాహసం ఎప్పటికీ మరచిపోలేనిది అని చెప్పారు. ఈ నియామకం ద్వారా గుల్నాజ్ అక్తర్‌కు ఆర్థిక భద్రత లభించడమే కాకుండా.. వారి కుటుంబ గౌరవంగా బతకడానికి ఉపయోగపడుతుందన్నారు.