సోషల్ మీడియాలో టెంబా బవూమా పేరు మార్మోగుతోందిగా

27 ఏళ్ల తర్వాత దక్షిణాఫ్రికాకు ఐసీసీ టైటిల్ అందించిన టెంబా బవూమా పేరు సోషల్ మీడియాలో మార్మోగిపోతోంది. దిగ్గజ ప్లేయర్లకు సైతం సాధ్యం కాని రికార్డును బవూమా సాధించాడని.. అతడు బవూమా కాదని.. లార్డ్ బవూమా అని ఫ్యాన్స్ సంతోషం వ్యక్తం చేస్తున్నారు. అతడిని ప్రశంసిస్తూ ఫ్యాన్స్ పెడుతున్న పోస్టులతో సోషల్ మీడియాలో హోరెత్తిపోతోంది.

గ్రేమ్ స్మిత్, ఏబీ డివిలియర్స్, హషీమ్ అమ్లా, జాక్వస్ కల్లిస్, షాన్ పొలాక్, మోర్నీ మోర్కెల్, డేల్ స్టేయిన్‌ లాంటి ఆటగాళ్లకు సాధ్యం కాని రికార్డును దక్షిణాఫ్రికా కెప్టెన్ టెంబా బవూమా సాధించాడు. 27 ఏళ్లుగా అందని ద్రాక్షగా మిగిలిన ఐసీసీ టైటిల్‌ను అందించాడు. ఓ దశలో అతడికి జట్టులో చోటు ఎందుకున్న వారే.. ఇప్పుడు అతడిని ప్రశంసిస్తున్నారు. తన ఆహార్యంతో ఎన్నో విమర్శల పాలైన బవూమా.. విమర్శకుల చేత ప్రశంసలు అందుకుంటున్నాడు. ప్రొటీస్ జట్టు ఫ్యాన్స్ కల నెరవేర్చి.. బవుమా కాస్తా.. లార్డ్ బవూమాగా మారిపోయాడు.

ఐసీసీ నాకౌట్స్‌ అంటే చాలు రెచ్చిపోయి ఆడే.. ఆస్ట్రేలియాకు చుక్కలు చూపించాడు ప్రొటీస్ కెప్టెన్. తన బ్యాటింగ్, వ్యూహాలతో ప్రత్యర్థిని ఇబ్బంది పెట్టాడు. ఈ క్రమంలోనే ఐసీసీ టైటిల్ కోసం కొనసాగిస్తున్న సుదీర్ఘ నిరీక్షణకు తెరదించాడు. అయితే ప్రస్తుతం సోషల్ మీడియాలో బవూమా పేరు మార్మోగిపోతోంది. అతడు ఒక్కసారిగా ఫేమస్ అయిపోయాడు. గతంలో అతడు విమర్శలకు గురైనప్పటి వీడియోలను జోడించి.. లార్డ్ బవూమా అంటూ ఫ్యాన్స్ పోస్టులు పెడుతున్నారు. ఊర మాస్ కమ్‌బ్యాక్ అంటూ ప్రశంసిస్తున్నారు.

ఇప్పటివరకు ఒక్క ఫైనల్‌లోనూ ఓడిపోని ఆస్ట్రేలియా ప్లేయర్లు మిచెల్ స్టార్క్, జోష్ హేజిల్‌వుడ్‌లకు తొలి ఓటమిని రుచిచూపించాడని పేర్కొంటున్నారు. బవూమా వరల్డ్ టెస్టు ఛాంపియన్ షిప్ గదను పట్టుకుని ఇచ్చిన ఫోజులను పోస్టు చేస్తున్నారు. అతడి ఫ్యామిలీతో పాటు లార్డ్స్‌ మైదానంలో తిరిగి ఫొటోలను షేర్ చేస్తున్నారు.

మ్యాచ్ సాగిందిలా..

ఈ మ్యాచ్‌లో తొలుత బ్యాటింగ్ చేసిన ఆస్ట్రేలియా.. 212 పరుగులకు ఆలౌట్ అయింది. ఆ తర్వాత బ్యాటింగ్ ప్రారంభించిన దక్షిణాఫ్రికా స్వల్ప స్కోరుకే కుప్పకూలింది. కేవలం 138 పరుగులకే ఆలౌట్ అయింది. దీంతో తొలి ఇన్నింగ్స్‌లో ఆస్ట్రేలియాకు అమూల్యమైన 74 పరుగుల ఆధిక్యం లభించింది. దీంతో ఈ మ్యాచ్‌లో ఆస్ట్రేలియాదే పైచేయిలా కనిపించింది.

 కానీ రెండో ఇన్నింగ్స్‌లో దక్షిణాఫ్రికా బౌలర్లు అద్భుతంగా రాణించారు. ఓ దశలో ఆస్ట్రేలియాకు స్కోరు 80 పరుగులు కూడా కాకముందే ఏడు వికెట్లు పడగొట్టారు. దీంతో దక్షిణాఫ్రికా పైచేయి సాధించినట్లు కనిపించింది. ఆ తర్వాత మిచెల్ స్టార్క్ సంచలన బ్యాటింగ్‌తో ఆస్ట్రేలియా అనుకున్నదానికంటే ఎక్కువ స్కోరే చేసింది. స్టార్క్ హాఫ్ సెంచరీతో జట్టు స్కోరు 207 పరుగులకు చేరింది. తొలి ఇన్నింగ్స్‌లో లభించిన ఆధిక్యంతో కలిసి.. దక్షిణాఫ్రికా ముందు 282 పరుగుల లక్ష్యాన్ని నిలిపింది. దీనిని సులువుగా ఛేదించిన దక్షిణాఫ్రికా జట్టు కప్పు గెలుచుకుంది. ఈ ఫలితంతో డబ్ల్యూటీసీలో కొత్త ఛాంపియన్‌గా దక్షిణాఫ్రికా నిలిచింది.