డబ్ల్యూటీసీ ఫైనల్ గెలిచాక.. గ్రౌండ్‌లోనే ఏడ్చేసిన దక్షిణాఫ్రికా క్రికెటర్‌

27 ఏళ్లుగా అందని ద్రాక్షగా ఉన్న ఐసీసీ టైటిల్‌ను దక్షిణాఫ్రికా ఎట్టకేలకు కైవసం చేసుకుంది. అసాధ్యాన్ని సుసాధ్యం చేస్తూ.. చరిత్రను తిరగరాసింది. ఐసీసీ నాకౌట్ మ్యాచ్‌ అంటేనే చెలరేగిపోయే.. ఆస్ట్రేలియాకు కళ్లెం వేసి.. ప్రపంచ టెస్టు ఛాంపియన్ గదను అందుకుంది. ఈ విజయంతో దక్షిణాఫ్రికా ఆటగాళ్లే కాకుండా, ఆ దేశ అభిమానులు, ప్రజలు భావోద్వేగానికి గురయ్యారు. సుదీర్ఘ నిరీక్షణ తర్వాత దక్కిన టైటిల్ కావడంతో.. కన్నీళ్లు ఆపుకోలేకపోయారు.

“ఈ విజయం (WTC ఫైనల్‌) మాకు చాలా ప్రత్యేకమైనది. ఇక్కడ ఉన్న మాకే కాదు.. దేశ ప్రజలందరికి ఇవాళ మేం సాధించిన విజయం గర్వకారణం. గత 5 రోజులుగా దేశం మొత్తం చూపిన ఐకమత్యం అద్భుతం. ఒక జట్టుగా.. గర్వించదగ్గ దేశంగా ఈ ఫలితానికి మేం కృతజ్ఞులం. నేను బ్యాటింగ్ చేసి ఉంటే ఈ స్థాయిలో భావోద్వేగానికి గురికాకపోయే వాడినేమో. భావోద్వేగాలు కాస్త అదుపులో ఉండేవేమో. కానీ ఇప్పుడు కన్నీళ్లు ఆపుకోలేకపోతున్నా. మాకు అండగా నిలిచిన ప్రతీ ఒక్కరికి పేరు పేరునా ధన్యవాదాలు. కష్ట సమయాల్లో కూడా మేం బలంగా పోరాడాం. భవిష్యత్‌లో మేం సాధించే గొప్ప విజయాలకు ఇది పునాది లాంటిది” అని కేశవ్ మహారాజ్ .. దక్షిణాఫ్రికా మాజీ కెప్టెన్ గ్రేమ్ స్మిత్‌కు ఇంటర్వ్యూ ఇస్తూ భావోద్వేగానికి గురయ్యాడు.

కాగా ఈ విజయంతో సోషల్ మీడియాలో ప్రొటీస్ ఫ్యాన్స్ తమ సంతోషాన్ని వ్యక్తం చేస్తున్నారు. ఇన్నేళ్లు తాము అనుభవించిన బాధను, ఐసీసీ టోర్నీల్లో ఓటములకు సంబంధించిన దృశ్యాలను సోషల్ మీడియాలో షేర్ చేస్తున్నారు. ఎట్టకేలకు మేం సాధించాం.. అని కామెంట్లు పెడుతున్నారు. టెంబా బవూమాకు సంబంధించిన మీమ్స్.. సోషల్ మీడియాలో వైరల్‌గా మారాయి.