27 ఏళ్ల ఎదురుచూపులకు తెర,,,వరల్డ్ టెస్ట్ ఛాంపియన్గా దక్షిణాఫ్రికా
sports | Suryaa Desk | Published : Sun, Jun 15, 2025, 12:02 AM
దక్షిణాఫ్రికా జట్టు 27 ఏళ్ల నిరీక్షణకు తెరదించుతూ, ప్రపంచ టెస్టు ఛాంపియన్ షిప్ 2025 ఫైనల్లో ఆస్ట్రేలియాను ఓడించింది. ఉత్కంఠభరితంగా సాగిన మ్యాచ్లో 5 వికెట్ల తేడాతో గెలుపొంది, ఐసీసీ టైటిల్ కైవసం చేసుకుంది. ఆస్ట్రేలియా నిర్దేశించిన 282 పరుగుల లక్ష్యాన్ని దక్షిణాఫ్రికా ఓపెనర్ ఎయిడెన్ మార్క్రమ్ సెంచరీతో సునాయాసంగా ఛేదించింది. టెంబా బవూమా కూడా రాణించడంతో దక్షిణాఫ్రికా విజయం సాధించింది.
ఐసీసీ ఈవెంట్లో టైటిల్ కోసం 27 ఏళ్లుగా కొనసాగిస్తున్న నిరీక్షణకు దక్షిణాఫ్రికా ముగింపు పలికింది. ప్రపంచ టెస్టు ఛాంపియన్ షిప్ 2025 ఫైనల్లో ఆస్ట్రేలియాను ఓడించింది. ఉత్కంఠభరితంగా సాగిన ఈ మ్యాచ్లో దక్షిణాఫ్రికా 5 వికెట్ల తేడాతో విజయం సాధించింది. దీంతో 27 ఏళ్ల తర్వాత ఐసీసీ టైటిల్ సాధించింది. ఇకపై తాము ‘ఛోకర్స్’ కాదని ప్రపంచానికి చాటి చెప్పింది.
ఈ మ్యాచ్లో తొలుత బ్యాటింగ్ చేసిన ఆస్ట్రేలియా.. 212 పరుగులకు ఆలౌట్ అయింది. ఆ తర్వాత బ్యాటింగ్ ప్రారంభించిన దక్షిణాఫ్రికా స్వల్ప స్కోరుకే కుప్పకూలింది. కేవలం 138 పరుగులకే ఆలౌట్ అయింది. దీంతో తొలి ఇన్నింగ్స్లో ఆస్ట్రేలియాకు అమూల్యమైన 74 పరుగుల ఆధిక్యం లభించింది. దీంతో ఈ మ్యాచ్లో ఆస్ట్రేలియాదే పైచేయిలా కనిపించింది.
కానీ రెండో ఇన్నింగ్స్లో దక్షిణాఫ్రికా బౌలర్లు అద్భుతంగా రాణించారు. ఓ దశలో ఆస్ట్రేలియాకు స్కోరు 80 పరుగులు కూడా కాకముందే ఏడు వికెట్లు పడగొట్టారు. దీంతో దక్షిణాఫ్రికా పైచేయి సాధించినట్లు కనిపించింది. ఆ తర్వాత మిచెల్ స్టార్క్ సంచలన బ్యాటింగ్తో ఆస్ట్రేలియా అనుకున్నదానికంటే ఎక్కువ స్కోరే చేసింది. స్టార్క్ హాఫ్ సెంచరీతో జట్టు స్కోరు 207 పరుగులకు చేరింది. తొలి ఇన్నింగ్స్లో లభించిన ఆధిక్యంతో కలిసి.. దక్షిణాఫ్రికా ముందు 282 పరుగుల లక్ష్యాన్ని నిలిపింది.
తొలి ఇన్నింగ్స్లో 138 పరుగులకే ఆలౌట్ అయిన దక్షిణాఫ్రికా.. రెండో ఇన్నింగ్స్లో 250కి పైగా పరుగుల లక్ష్యాన్ని ఛేదిస్తుందని ఎవరూ అనుకోలేదు. కానీ దక్షిణాఫ్రికా అద్భుతం చేసింది. ముఖ్యంగా ఆ జట్టు ఓపెనర్ ఎయిడెన్ మార్క్రమ్ సెంచరీతో సత్తాచాటాడు. ఆస్ట్రేలియా పేస్ త్రయాన్ని సమర్థవంతంగా ఎదుర్కొంటూ మొండిగా బ్యాటింగ్ చేసిన ప్రొటీస్ ప్లేయర్.. సెంచరీ కొట్టాడు. అతడికి కెప్టెన్ టెంబా బవూమా కూడా సహకరించాడు. దీంతో ఆస్ట్రేలియా నిర్దేశించిన 282 పరుగుల లక్ష్యాన్ని దక్షిణాఫ్రికా ఐదు వికెట్లు కోల్పోయి ఛేదించింది. ఎయిడెన్ మార్క్రమ్ (136), టెంబా బవూమా (66) హీరోలుగా నిలిచారు. ఈ ఫలితంతో డబ్ల్యూటీసీలో కొత్త ఛాంపియన్గా దక్షిణాఫ్రికా నిలిచింది. తొలి ఫైనల్లో న్యూజిలాండ్, రెండోసారి ఫైనల్లో ఆస్ట్రేలియా విజేతగా నిలిచాయి.
|
|