సిరాజ్‌, ప్రసిద్ధ్‌, శార్దూల్‌లను ఏకిపారేస్తున్న మాజీ క్రికెటర్లు

ఇంగ్లాండ్‌తో జరుగుతున్న తొలి టెస్టులో జస్‌ప్రీత్ బుమ్రా మినహా భారత బౌలర్లు విఫలం అవుతున్నారు. రెండో రోజు ఆటలో మహమ్మద్ సిరాజ్ , ప్రసిద్ధ్ కృష్ణ, శార్దుల్ ఠాకూర్ ప్రభావం చూపలేకపోయారు. రెండో రోజు ఆట మొత్తంగా ఇంగ్లాండ్ మూడు వికెట్లు కోల్పోయింది. ఈ వికెట్లన్నీ కూడా బుమ్రానే తీయడం గమనార్హం. దీంతో భారత మాజీ క్రికెటర్లు భారత జట్టులోని ఇతర బౌలర్ల తీరుపై అసంతృప్తి వ్యక్తం చేస్తున్నారు. బుమ్రాకు సహకరిస్తూ.. ఇంగ్లాండ్ బ్యాటర్లపై ఒత్తిడి తేవాలని సూచిస్తున్నారు.

 ఇదే అంశంపై టీమిండియా మాజీ హెడ్‌కోచ్, మాజీ ప్లేయర్‌ రవిశాస్త్రి మాట్లాడారు. మహమ్మద్ సిరాజ్‌, ప్రసిద్ధ్‌ కృష్ణ, శార్దూల్‌ ఠాకూర్‌లు ఒక్క వికెట్‌ కూడా తీయకపోవడంపై తీవ్ర అసంతృప్తి వ్యక్తం చేశారు. ఇంగ్లాండ్‌లోని పరిస్థితుల్లో వారు రాణించాల్సిన అవసరం ఉందని పేర్కొన్నారు.

“ఇంగ్లాండ్‌తో సిరీస్‌ ముందుకు సాగుతున్న కొద్దీ.. జస్‌ప్రీత్‌ బుమ్రా పనిభారంపై నేను ఆందోళన చెందుతున్నా. ఎందుకంటే అతడు ప్రతి స్పెల్‌లోనూ వికెట్లు తీసే బౌలర్‌. ఇతర బౌలర్ల నుంచి అతడికి సహకారం కచ్చితంగా కావాలి. అప్పుడే అతడిపై ఒత్తిడి, పనిభారం తగ్గుతుంది,” అని రవిశాస్త్రి వ్యాఖ్యానించారు.

ఇక ఇంగ్లండ్‌ మాజీ క్రికెటర్‌ నాసర్‌ హుస్సేన్‌ కూడా ఇదే అభిప్రాయాన్ని వ్యక్తం చేశాడు. ‘‘భారత జట్టులోని ఇతర బౌలర్లతో బుమ్రాను పోల్చి చూస్తే.. ఆ తేడా క్లియర్‌గా కనిపిస్తోంది. బుమ్రా అసాధారణమైన బౌలర్‌. రెండో రోజు ఆటలో క్యాచ్‌లు విడిచిపెట్టకపోతే.. అతడి ఖాతాలో మరిన్ని వికెట్లు పడేవి” అని నాసర్ అన్నాడు.

కాగా హెడింగ్లే టెస్టు రెండో రోజు ఆటలో జస్‌ప్రీత్ బుమ్రా.. 13 ఓవర్లు వేసి 48 పరుగులు ఇచ్చి మూడు వికెట్లు తీశాడు. మిగతా బౌలర్లంతా 36 ఓవర్లు వేసి 154 రన్స్ సమర్పించుకున్నారు. అందులో ఒక్క వికెట్ కూడా తీయలేకపోయారు. నిజానికి రెండో రోజు ఆటలో బుమ్రా ఖాతాలో మరిన్ని వికెట్లు పడేవే. జడేజా, యశస్వి జైశ్వాల్‌లు క్యాచ్‌లు నేలపాలు చేశారు. హ్యారీ బ్రూక్‌ను బుమ్రా ఔట్ చేసినా.. అది నోబాల్‌ కావడంతో అతడికి లైఫ్ దక్కింది.