భార్య విడాకులు ఇచ్చిందని వందలాది మందిని వణికించాడు

వాయమ్మో.. రోజురోజుకూ భార్యలపై కోపంతో భర్తలు ఏవేవో దారుణాలు చేస్తున్నారు. కొందరు కోపాన్ని అనుచుకోవడానికి యోగాలు చేస్తూ.. వస్తువులను తన్నుతూ ఉండగా.. మరికొందరేమో మనసులోనే శ్రీమతులను తిట్టుకుంటున్నారు. ఇప్పటి వరకు ఇలాంటివి నిజ జీవితంలో, సినిమాల్లో చాలానే చూశాం. కానీ భార్యపై కోపంతో ఓ వ్యక్తి.. వందలాది మందిని వణికించిన ఘటన నెట్టింట వైరల్ అవుతోంది. ముఖ్యంగా భార్య విడాకులు ఇచ్చిన బాధ, కోపాన్ని తట్టుకోలేక తాను ఎక్కిన ఓ రైలుకే నిప్పు పెట్టేశాడు. ఓ బాటిల్లో పెట్రోల్ తెచ్చుకుని మరీ.. ఒక్కసారిగా నడుస్తున్న రైల్లో దాన్ని పోశాడు. ఆపై అగ్గి పుల్ల గీసి మంట పెట్టేశాడు. హఠాత్తుగా జరిగిన ఈ ఘటనతో ప్రయాణికులంతా భయపడిపోగా.. అతడు మాత్రం సినిమా చూసినట్లుగా చూస్తూ ఉండిపోయాడు.

దక్షిణ కొరియా రాజధాని సియోల్‌లో ఈ ఘటన చోటుచేసుకుంది. మే 31వ తేదీన జరిగిన ఈ ఘటన దేశవ్యాప్తంగా కలకలం రేపింది. ముఖ్యంగా 67 ఏళ్ల వోన్‌కు ఇటీవలే తన భార్య నుంచి విడాకులు మంజూరు అయ్యాయి. దీన్ని అతడు ఏమాత్రం తట్టుకోలేకపోయాడు. ఆ బాధలోనే యోయనారు నుంచి మాపో వెళ్తున్న సబ్‌వే రైల్లో ప్రయాణించాడు. ఈక్రమంలోనే అతడు తన వెంట తెచ్చుకున్న పెట్రోల్‌ను తను ప్రయాణిస్తున్న రైల్లోనే కుమ్మరించాడు. ఆపై ఒక్కసారిగా నిప్పు పెట్టేశాడు. సముద్ర గర్బంలోని టన్నైల్‌లో రైలు ప్రయాణిస్తుండగా ఈ దారుణం చోటు చేసుకుంది. ఈక్రమంలోనే పెద్ద ఎత్తున మంటలు వ్యాపించాయి.

అప్రమత్తమైన ప్రయాణికులు వెంటనే భయంతో పరుగులు తీశారు. సిబ్బంది కూడా అప్రమత్తం అయింది. ఫలితంగా ఎలాంటి ప్రాణ నష్టం సంభవించలేదు. కానీ ఈ ఘటనలో 22 మంది ప్రయాణికులు పొగ పీల్చి అనారోగ్యానికి గురై ఆసుపత్రిలో చేరారు. మరో 129 మందికి సంఘటనా స్థలంలోనే వైద్యులు చికిత్స అందించారు. అగ్నిప్రమాదం కారణంగా సుమారు 330 మిలియన్ వోన్ (సుమారు 2,000 యూఎస్‌ డాలర్లు) ఆస్తి నష్టం వాటిల్లినట్లు అధికారులు అంచనా వేశారు. ఈక్రమంలోనే నిందితుడు అయిన వోన్‌ను పోలీసులు అదుపులోకి తీసుకున్నారు. ప్రస్తుతం విచారిస్తున్నారు. అలాగే హత్యాయత్నంలో సహా కదులుతున్న రైలుకు నిప్పు పెట్టడం, రైల్వే భద్రతా చట్టాలను ఉల్లంఘించడం వంటి అభియోగాలు మోహినట్లు అధికారులు తెలిపారు.

దర్యాప్తు అధికారులు తెలిపిన వివరాల ప్రకారం.. కోర్టులో విడాకుల కేసులో వచ్చిన తీర్పు పట్ల తీవ్ర అసంతృప్తి, కోపం కారణంగానే వోన్ ఈ ఘాతుకానికి పాల్పడినట్లు వివరించారు. విడాకులకు సంబంధించిన మానసిక వేదన అతడిని ఇంతటి దారుణమైన చర్యకు పురిగొల్పిందని చెప్పుకొచ్చారు. మరోవైపు భవిష్యత్తులో ఇలాంటి దాడులు జరగకుండా ఉండేందుకు అన్ని జాగ్రత్తలు తీసుకుంటున్నట్లు అధికారులు పేర్కొన్నారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఇది చూసిన ప్రతీ ఒక్కరూ.. ఒక్కో విధంగా కామెంట్లు చేస్తున్నారు. భార్య మీద ఫ్రస్ట్రేషన్ మామూలుగా ఉండదు మరి అంటూ చెప్పుకొస్తున్నారు.