అల్లూరి జిల్లాలో రేకుల షెడ్డులో స్కూలు

ఏడేళ్ల చింటూ.. ఉదయాన్నే నిద్ర లేచాడు.. అమ్మానాన్నతో పాటుగా కోడి కూయగానే నిద్ర లేచిన చింటూ.. చకచకా బడికి బయల్దేరాడు. చింటూ అంత ఉదయాన్నే నిద్ర లేవడానికి మరో కారణం కూడా ఉంది. చదువే భవిష్యత్తును మారుస్తుందని.. తమ కుటుంబం కష్టాలను తీర్చుతుందని కిందటి రోజు మాస్టారు చెప్పిన మాటలు.. చింటూ పసి మనసులో బలంగా నాటుకుపోయాయి. తాను బాగా చదివి ఉద్యోగం తెచ్చుకోవాలని.. కూలీకి వెళ్లే అమ్మనాన్నల కష్టాన్ని తీర్చాలని.. ఆ పిల్లాడు బలంగా నిర్ణయించుకున్నాడు. అందుకే ఉదయాన్నే నిద్రలేచిన చింటూ.. అమ్మను ఇబ్బంది పెట్టకుండా బడికి బయల్దేరాడు.

సాధారణంగా పండగో, పబ్బమో వస్తే.. స్కూళ్లకు సెలవులిస్తారు.. భారీ వానలు పడితేనో, వరదలు ముంచెత్తే ప్రమాదం ఉంటేనో ముందు జాగ్రత్తగా స్కూళ్లకు సెలవులు ఇస్తుంటారు. కానీ ఆ ఊరి పాఠశాలలో మాత్రం నాలుగు చినుకులు పడితే చాలు సెలవు గ్యారంటీ. చకా చకా బడికి చేరుకున్న చింటూ.. స్కూలుకు సెలవంటూ ఎదురుగా వచ్చిన స్నేహితుడు చెప్పిన మాటతో నిరుత్సాహపడిపోయాడు.

చింటూ రోజూ క్రమం తప్పకుండా స్కూలుకు రావటానికి చదువు ఓ కారణమైతే.. బడికొస్తే నాలుగు ముద్దల అన్నం పెడతారనేది మరో కారణం. అమ్మానాన్నా రోజంతా పనిచేస్తే కానీ.. మూడు పూటలా తిండి తినలేని పరిస్థితుల్లో.. బడిలో పెట్టే భోజనంతో అయినా కడుపు నిండుతుందనేది ఆ పసివాడి కోరిక. కానీ వాన.. అతని ఆశలపై నీళ్లు జల్లింది.. ఇది చింటూ ఒక్కడి పరిస్థితి మాత్రమే కాదు.. అభివృద్ధికి ఆమడ దూరంలో మారుమూల ప్రాంతాల్లో మౌలిక వసతులు లేక ఇబ్బందులు పడుతున్న సగటు గ్రామీణ భారత చిన్నారులది..

రేపటి భారతం తయారయ్యేది.. నేటి తరగతి గదిలోనే అనేది పెద్దలు చెప్పిన మాట.. కానీ మౌలిక వసతులు లేక.. చదువుకు దూరమై, ఎందరో చిన్నారుల బంగరు భవిష్యత్తు దెబ్బతింటోంది. ప్రభుత్వాలు చేపడుతున్న సంక్షేమ, అభివృద్ధి పథకాలు దరిచేరని గ్రామాలెన్నో ఇలాంటి పరిస్థితిని అనుభవిస్తున్నాయి. అలాంటి పరిస్థితే అల్లూరి సీతారామరాజు జిల్లాలోని ముంచంగిపట్టు మండలం లబుడుపుట్టు గ్రామవాసులది. ఈ ఊర్లో ఉన్న పాఠశాల భవనం ఎప్పుడో దశాబ్దాల క్రితం నిర్మించారు.

ఇన్నేళ్లలో ఆ పాఠశాల భవనం శిథిలావస్థకు చేరుకుంది. దీంతో ఊర్లో చదువుకునే పిల్లలకు ఓ పూరిపాకే.. పాఠశాలగా మారింది. 32 మంది చిన్నారులు ఆ రేకులషెడ్డు కిందే చదువు సాగిస్తున్నారు. దీంతో నాలుగు చినుకులు పడినా.. బడికి సెలవు ప్రకటించాల్సిన పరిస్థితి. చినుకు పడితే చాలు తమ పిల్లలు విద్యకు దూరమౌతున్నారని.. ప్రభుత్వం స్పందించి తమ పిల్లల కోసం బడి కట్టించి ఇవ్వాలని స్థానికులు కోరుతున్నారు.