బెంగళూరులో ఐటీ ఆఫీసులో దారుణం.. ,,,, మహిళల వాష్‌రూమ్‌లో సీక్రెట్ కెమెరా

బెంగళూరులో మరో దారుణం వెలుగుచూసింది. సాఫ్ట్‌వేర్ కంపెనీలకు కేరాఫ్ అడ్రస్ అయిన బెంగళూరులో.. మరో దారుణ ఘటన చేసుకుంది. ఈ ఘటన మహిళల భద్రతపై మరోసారి ప్రశ్నలు లేవనెత్తుతోంది. తోటి మహిళా ఉద్యోగి పట్ల అసభ్యంగా ప్రవర్తించాడో ఉద్యోగి. అది కూడా కంపెనీ క్యాంపస్‌లోనే. కంపెనీ ఆవరణలోని మహిళల వాష్‌రూమ్‌లో సీక్రెట్ కెమెరాలు అమర్చి.. మహిళా ఉద్యోగి వీడియో రికార్డు చేశాడు. జూన్ 30వ తేదీన బెంగళూరు ఎలక్ట్రానిక్ సిటీలోని ఇన్ఫోసిస్ ఆఫీసులో ఈ ఘటన చోటుచేసుకుంది. ఈ ఘటనలో స్వప్నిల్ నగేష్ మాలి అనే 30 ఏళ్ల ఉద్యోగ పోలీసులు అరెస్ట్ చేశారు. ఈ ఘటనకు సంబంధించి పోలీసులు, బాధితురాలు చెప్తున్న వివరాల ప్రకారం..

35 ఏళ్ల మహిళ.. టెక్నికల్ టెస్ట్ లీడ్‌గా పనిచేస్తున్నారు. జూన్ 30వ తేదీ ఆ మహిళ వాష్ రూమ్‌లో ఉన్న సమయంలో తలుపు మీద ఆమెకు ఓ ప్రతిబింబం కనిపించింది. ఆ పక్కనుంచి ఓ వ్యక్తి మొబైల్ ఫోన్ వాడుతున్నట్లు గమనించింది. దీంతో ఏం జరుగుతుందో చూద్దామని వాష్ రూమ్ కమోడ్ ఎక్కి చూస్తే.. ఓ వ్యక్తి పక్కనే ఉన్న స్టాల్ నుంచి మొబైల్ ఫోన్ ద్వారా వీడియో తీయడం గమనించింది. దీంతో తాను వాష్ రూమ్ నుంచి బయటకు పరిగెత్తి సహోద్యోగులకు సమాచారం అందించినట్లు పోలీసులకు వివరించింది. దీంతో వారంతా కలిసి ఆ వ్యక్తిని అక్కడి నుంచి బయటకు వెళ్లకుండా అడ్డుకున్నారని పోలీసులకు తెలిపింది.

మరోవైపు నిందితుణ్ని స్వప్నిల్ నాగేష్ మాలిగా గుర్తించారు. అతను ఇన్ఫోసిస్‌లో సీనియర్ అసోసియేట్ కన్సల్టెంట్‌గా పనిచేస్తున్నారు. మూడు నెలల కిందటే అతను ఉద్యోగంలో చేరినట్లు గుర్తించారు. స్వప్నిల్ నాగేష్ మాలిది మహారాష్ట్రలోని సాంగ్లీగా పోలీసులు గుర్తించారు. బాధిత మహిళ చెప్పిన వెంటనే తోటి ఉద్యోగులు స్వప్నిల్ ఫోన్ తీసుకుని తనిఖీ చేశారు. ఈ సమయంలో ఆరోపణలు చేసిన మహిళ వీడియోను, అలాగే వేరే ఇన్ఫోసిస్ ఉద్యోగి వీడియోను, ఇంటర్నెట్ నుంచి డౌన్ లోడ్ చేసిన 50కి పైగా వీడియోలను కనుగొన్నట్లు పోలీసులు తెలిపారు.

సాక్ష్యాధారం కోసం మహిళ వీడియోను స్క్రీన్ షాట్ తీసుకుని.. అసలు వీడియోను తొలగించినట్లు పోలీసులు తెలిపారు. బాధిత మహిళ ఈ విషయాన్ని తొలుత కంపెనీ హెచ్‌ఆర్ విభాగానికి ఫిర్యాదు చేశారని.. ఆ తర్వాత భర్త సహాయంతో పోలీసులకు ఫిర్యాదు చేసినట్లు పోలీసులు వెల్లడించారు. అయితే ఈ ఘటనపై ఇన్ఫోసిస్ ఇంకా ఎలాంటి ప్రకటనా చేయలేదు.