క్రెడిట్ స్కోరు.. అసలు దీనిని ఎలా లెక్కిస్తారో తెలుసా

క్రెడిట్ స్కోర్ అనేది మన ఆర్థిక జీవితంలో చాలా అవసరం. లోన్ కావాలన్నా, తక్కువ వడ్డీ రేటుతో లోన్ పొందాలన్నా ఇది ముఖ్యం. ఆర్థిక సంస్థలు లోన్ ఇచ్చేటప్పుడు దీన్ని చూస్తాయి. ఇది మన ఆర్థిక క్రమశిక్షణను తెలియజేస్తుంది. అందుకే చాలామంది తమ స్కోర్‌ను పెంచుకోవడానికి ప్రయత్నిస్తారు. ఇది సాధారణంగా 300 నుంచి 900 మధ్య ఉంటుంది. 750 పైన ఉంటే మంచి స్కోర్ అంటారు. అంటే ఇదే మెరుగైన క్రెడిట్ స్కోరు అంటారు. ఈ స్కోర్‌ను ఎలా లెక్కిస్తారో ఇప్పుడు తెలుసుకుందాం. పేమెంట్ హిస్టరీ , క్రెడిట్ యుటిలైజేషన్ రేషియో , క్రెడిట్ హిస్టరీ, క్రెడిట్ మిక్స్, కొత్త అప్లికేషన్లు దీనిని నిర్ణయిస్తాయి. మీ ఆర్థిక భవిష్యత్తుకు ఇవి చాలా ముఖ్యం.

మొదటగా పేమెంట్ హిస్టరీ గురించి తెలుసుకుందాం. దీని ప్రభావం 30-35 శాతం ఉంటుంది. మీరు EMIలు, లోన్లు సకాలంలో కడుతున్నారా లేదా అనేది ఇక్కడ చూస్తారు. ఆలస్యంగా కడితే మీ స్కోర్ తగ్గుతుంది. కాబట్టి, "మెరుగైన క్రెడిట్ స్కోరు కోసం ఎప్పుడూ చెల్లింపులు ఆలస్యం కాకుండా చూసుకోవడం చాలా ముఖ్యం".

తర్వాత క్రెడిట్ యుటిలైజేషన్ రేషియో (CUR). దీని ప్రభావం 25-30 శాతం ఉంటుంది. మీకున్న మొత్తం రుణంలో మీరు ఎంత వాడుతున్నారో ఇది చెబుతుంది. ఇది 30 శాతానికి మించకూడదు. ఉదాహరణకు మీ క్రెడిట్ కార్డ్ లిమిట్ రూ. 1,00,000 అనుకుంటే, మీరు రూ. 50,000 వాడితే మీ CUR 50 శాతం అవుతుంది. ఇది ఎక్కువ.

క్రెడిట్ హిస్టరీ కూడా ముఖ్యమే. దీని ప్రభావం 15 శాతం ఉంటుంది. పాత అకౌంట్లను, క్రెడిట్ కార్డులను మెయింటైన్ చేయడం మంచిది. "వినియోగించడం లేదన్న కారణంతో మంచి పేమెంట్ హిస్టరీ ఉన్న క్రెడిట్ కార్డును రద్దు చేసుకుంటే, అది మీ క్రెడిట్ హిస్టరీపై ప్రతికూల ప్రభావం చూపుతుంది".

క్రెడిట్ మిక్స్ కూడా ముఖ్యమే. దీని ప్రభావం 10-15 శాతం ఉంటుంది. ఇందులో రెండు రకాల రుణాలు ఉంటాయి. హామీ లేని రుణాలు (క్రెడిట్ కార్డులు, వ్యక్తిగత రుణాలు), హామీతో కూడిన రుణాలు (గృహ రుణాలు, వాహన రుణాలు). ఈ రెండూ ఉండాలని నిపుణులు చెబుతున్నారు.

చివరగా కొత్త క్రెడిట్ అప్లికేషన్లు. దీని ప్రభావం 10 శాతం వరకు ఉంటుంది. చాలా లోన్ల కోసం అప్లై చేస్తే మీ స్కోర్ తగ్గుతుంది. అవసరం లేకపోయినా అప్పులు తీసుకోవడం ఎప్పుడూ సరికాదు. కాబట్టి, లోన్లు సకాలంలో కట్టండి. క్రెడిట్ కార్డును లిమిట్ దాటకుండా వాడండి. మీ క్రెడిట్ రిపోర్ట్‌ను ఎప్పటికప్పుడు చూసుకోండి. ఆర్థిక క్రమశిక్షణతో ఉంటే మంచి క్రెడిట్ స్కోర్ వస్తుంది.