తలలో పేలు పోగొట్టే సులభమైన చిట్కా

జుట్టు రాలడం, తెల్లబడడం ఇబ్బంది పెట్టే సమస్యలే. కానీ వీటి కన్నా ఎక్కువగా చిరాకు పుట్టించే సమస్య మాత్రం తల్లో పేలు. కంటి కనిపించనంత చిన్న పరిమాణంలో ఉండే ఈ పేలు తల్లోకి ఎక్కాయంటే అంత సులభంగా విడిచి పెట్టవు. వెంట్రుకలను క్రమంగా తినేస్తూ ఉంటాయి. ఎప్పుడూ అవి తిరుగుతూ ఉండడం వల్ల విపరీతంగా దురద పెడుతుంది. వీటి వల్ల జుట్టు రాలిపోతుంది. ఇంకా ఎన్నో సమస్యలు వస్తాయి.

అసలు ఏ పనిపైనా ఫోకస్ చేయడానికి ఉండదు. ఎప్పుడూ చేతులు తల్లోనే పెట్టుకోవాల్సి వస్తుంది. ఈ సమస్యను పోగొట్టడానికి రకరకాల షాంపూలు, కండీషనర్లు అందుబాటులోకి వచ్చాయి. కాకపోతే అవి కాస్త ఖరీదుగా ఉంటాయి. ప్రతిసారీ కొనాలంటే కాస్త ఇబ్బందిగానే అనిపిస్తుంది. ఎలాంటి ఖర్చు లేకుండా చాలా సులభంగా ఓ ఇంటి చిట్కాతోనూ తల్లో పేలను తొలగించుకోవచ్చు. పైగా రెండే రెండు పదార్థాలు వాడితే సరిపోతుంది. మరి ఈ నేచురల్ మెడిసిన్ ఎలా తయారు చేసుకోవాలో చూద్దాం.

తలలో పేలు

తలలో పేలు పడ్డాయంటే అంతకు మించిన చిరాకు ఇంకోటి ఉండదు. విపరీతంగా దురద పుడుతుంది. ఎంత సేపూ చేతులు జుట్టులోనే పెట్టుకోవాల్సి వస్తుంది. పెద్ద వాళ్లలో కన్నా పిల్లల్లోనే ఈ సమస్య ఎక్కువగా ఉంటుంది. పేలు జుట్టులో ఉండి గుడ్లు పెడతాయి. వాటి వల్ల సంతతి ఇంకా పెరుగుతుంది. పైగా ఇవి ఓ చోట నుంచి ఇంకో చోటకు వ్యాప్తి చెందుతాయి. కురుల ఆరోగ్యం పాడైపోతుంది.

తలలో పేలు ఉన్న వ్యక్తి పక్కన ఎవరు నిద్రపోయినా వాళ్లకూ ఈ పేలు ఎక్కుతాయి. ఒకే దువ్వెన వాడినా, ఒకే టవల్ తో జుట్టు తుడుచుకున్నా ఈ పేలు వచ్చే అవకాశం ఉంటుంది. జుట్టు శుభ్రంగా లేకపోయినా ఈ ఇబ్బంది వస్తుంది. అయితే..పేలను తొలగించేందుకు మార్కెట్లో ఎన్నో మందులు అందుబాటులో ఉన్నాయి. లోషన్స్, షాంపూలతో తగ్గించుకోవచ్చు. అయితే..ప్రతిసారీ వీటిని కొనే పని లేకుండా ఇంట్లోనే ఓ మందు తయారు చేసుకోవచ్చు.

రెండే రెండు పదార్థాలు

తలలో పేలు పోవడానికి పెద్దగా ఖర్చు పెట్టాల్సిన పని లేదు. ఎలాంటి హడావుడి లేకుండా చాలా సులభంగా ఓ మందు తయారు చేసుకోవచ్చు. అది కూడా రెండే రెండు పదార్థాలతో. అవేంటంటే..అల్లం, నిమ్మకాయ. ఈ రెండింటినీ ఎన్నో ఆరోగ్య చిట్కాల కోసం వినియోగిస్తారు. అల్లంలో యాంటీ ఇన్ ఫ్లమేటరీ గుణాలుంటాయి. నిమ్మకాయలోనూ బోలెడన్ని పోషకాలుంటాయి. ఈ రెండింటినీ కలిపి తీసుకున్నప్పుడు ఆ ప్రయోజనాలు ఇంకాస్త పెరుగుతాయి. నిమ్మకాయలో యాసిడ్ ప్రాపర్టీస్ ఎక్కువగా ఉంటాయి. ఇవి జుట్టు పెరుగుదలకు తోడ్పడతాయి. అదే సమయంలో పేలను నిర్మూలించడంలోనూ సాయపడతాయి. ఫంగస్ తో పోరాడతాయి. మరి ఈ రెండు పదార్థాలను ఎలా వాడితే తలలో పేలు తగ్గిపోతాయి.

ఎలా వాడాలంటే

ముందుగా ఓ అల్లం ముక్క తీసుకోవాలి. దీన్ని చిన్న ముక్కలుగా చేసుకోవాలి. లేదా సన్నగా తురిమినా మంచిదే. ఆ తరవాత ఓ గిన్నె తీసుకుని అందులో ఓ నిమ్మకాయ రసం అంతా పిండాలి. ఈ రసంలోనే తురిమిన అల్లం ముక్కలు వేయాలి. ఈ రెండింటినీ బాగా మిక్స్ చేయాలి. కనీసం ఓ పావుగంట పాటు అలాగే పక్కన పెట్టాలి. ఇలా చేయడం వల్ల రెండింటిలో ఉన్న ఔషధ గుణాలు మిశ్రమానికి బాగా పడతాయి. పావుగంట తరవాత మరోసారి ఈ మిశ్రమాన్ని బాగా కలపాలి. తరవాత జుట్టుకి ఈ మిశ్రమాన్ని పట్టించాలి. పూర్తిగా కుదుళ్ల వరకూ వెళ్లేలా మసాజ్ చేయడం మంచిది. ఇలా చేస్తేనే సరైన విధంగా జుట్టుకి పడుతుంది. త్వరగా మంచి ఫలితాలు వచ్చేందుకు ఆస్కారం ఉంటుంది.

తరవాత ఏం చేయాలి

ఈ మిశ్రమాన్ని జుట్టుకి పట్టించిన తరవాత కనీసం ఓ పావుగంట లేదా అరగంట పాటు అలాగే ఉంచాలి. ఇలా చేయడం వల్ల కుదుళ్ల వరకూ అది వెళ్తుంది. పైగా నిమ్మరసంలో ఉండే ఘాటు పేలకు తగలాలి అంటే ఆ మాత్రం ఉంచాలి. అదే విధంగా అల్లంలో ఉండే ఘాటు కూడా పడుతుంది. దీని వల్ల త్వరగా పేలు తొలగిపోతాయి. అయితే అరగంట పాటు అలా ఉంచిన తరవాత రెగ్యులర్ గా మీరు వాడే షాంపూతో తలస్నానం చేయాలి. ఎప్పుడో ఓసారి ఇలా చేసి పేలు పోవడం లేదంటే కాదు. పూర్తిగా తలలో పేలు అన్నీ తొలగిపోవాలంటే కనీసం వారంలో రెండు సార్లైనా ఈ మిశ్రమాన్ని జుట్టుకి అప్లై చేయాలి. అలా అయితేనే ఫలితంగా త్వరగా వస్తాయి.

కొన్ని జాగ్రత్తలు

తలలో పేలు ఉన్న వారు ప్రత్యేకంగా దువ్వెన వాడడం మంచిది. అదే విధంగా టవల్ కూడా సెపరేట్ గా పెట్టుకోవాలి. ఒకరు వాడినవే మరొకరు వాడితే చాలా త్వరగా పేలు స్ప్రెడ్ అయ్యే అవకాశం ఉంటుంది. మరో ముఖ్యమైన విషయం ఏంటంటే..పేలు ఎక్కువగా ఉన్నప్పుడు వీలైనంత వరకూ తలస్నానం ఎక్కువగా చేయడం మంచిది. తల శుభ్రంగా లేకపోయినా వీటి సంఖ్య ఎక్కువవుతుంది. అందుకే..కురులు నీట్ గా ఉండేలా చూసుకోవాలి. వేపాకులను పేస్ట్ లా చేసుకుని అప్పుడప్పుడూ అప్లై చేసుకున్నా తలలో పేలు తగ్గిపోయే అవకాశం ఉంటుంది.