రెండు ఊర్ల మధ్య గొడవపెట్టిన ప్రేమ.. అనుకోని ట్విస్ట్

యవ్వనం.. కోరికలు రెక్కలు విప్పుకునే ఎగిరే వయసు.. మనసులో ప్రేమ మొగ్గ తొడిగి.. ప్రియ సఖి లేదా సఖుడి కోసం ఎదురుచూసే వయసు. అలానే వారిద్దరూ ప్రేమించుకున్నారు. నెలా, రెండు నెలలు కాదు.. కొన్నేళ్లపాటు ప్రేమ వ్యవహారం నడిచింది. చివరకు ధైర్యం చేసి పెళ్లి చేసుకోవాలని నిర్ణయించుకున్నారు. ఇద్దరూ మేజర్లు కావటంతో.. ధైర్యంగా ప్రేమ వివాహం చేసుకున్నారు. ఆపై పోలీసులను ఆశ్రయించారు. తాము ప్రేమ వివాహం చేసుకున్నామని, తమ పెద్దలకు మీరే నచ్చజెప్పాలంటూ పోలీసులను ఆశ్రయించారు. దీంతో పోలీసులు ఇరువర్గాలను పోలీస్ స్టేషన్‌కు పిలిపించారు. పెద్దలతో కలిపి ప్రేమజంటను కైకలూరుకు పంపించారు. ఇంకేముంది లవ్ స్టోరీకి శుభం కార్డు పడిందనే అనుకుంటున్నారా.. కానీ అక్కడే అనుకోని ఘటన జరిగింది. రెండు గ్రామాల మధ్యన గొడవకు కారణమైంది.

ఏలూరు జిల్లా కైకలూరు మండలంలోని చటకాయ అనే గ్రామానికి చెందిన రోజాకుమార్ అనే యువకుడు.. నత్తగుళ్లపాడు గ్రామానికి చెందిన లక్ష్మీ ప్రసన్న అనే యువతి కొన్నేళ్లుగా ప్రేమించుకుంటున్నారు. ఈ క్రమంలోనే నెల్లూరు జిల్లా బుచ్చిరెడ్డిపాలెంలో శుక్రవారం ప్రేమ వివాహం చేసుకున్నారు. ఆ తర్వాత రక్షణ కోసం బుచ్చిరెడ్డిపాలెం పోలీసులను ఈ ప్రేమ జంట ఆశ్రయించింది. తాము ప్రేమ వివాహం చేసుకున్న సంగతిని వారికి వివరించింది. ఆపై రెండు కుటుంబాల పెద్దలను పోలీసులను పిలిపించారు. రెండువర్గాలకు నచ్చజెప్పి ప్రేమ జంటను వారితో కలిపి ఇంటికి పంపించారు. పెద్దలతో పాటుగా ప్రేమజంట.. రోజాకుమార్ ఊరైన చటకాయకు బయల్దేరారు. అయితే అప్పుడే ఊహించని ఘటన జరిగింది.

ఏలూరులోని శ్రీపుర్రు సమీపంలోకి రాగానే అబ్బాయికి చెందిన ఊరివాళ్లపై అమ్మాయి ఊరివాళ్లు దాడి చేశారు. రోజాకుమార్‌ సొంతూరైన చటకాయ గ్రామస్థులపై లక్ష్మీప్రసన్న ఊరైన నత్తగుళ్లపాడు వాసులు దాడి చేశారు. ఈ దాడిలో చటకాయకు చెందిన కొంతమందికి గాయాలయ్యాయి. దీంతో వారిని కైకలూరు ప్రభుత్వ ఆసుపత్రికి తరలించారు. అనంతరం బాధితులు పోలీసులకు ఫిర్యాదు చేశారు.

మరోవైపు బాధితుల ఫిర్యాదు ఆధారంగా కైకలూరు పోలీసులు కేసు నమోదు చేసుకుని దర్యాప్తు మొదలెట్టారు. మరోవైపు దాడి చేసిన నత్తగుళ్లపాడు వాసులపై చర్యలు తీసుకోవాలంటూ చటకాయ గ్రామస్థులు కైకలూరు ప్రభుత్వ ఆసుపత్రిలో ఆందోళన చేపట్టారు. అయితే దాడికి గల కారణాలు స్పష్టంగా తెలియడం లేదు.