నేను ఆ పనిచేస్తే తప్పా.. బాలయ్య, పవన్ కళ్యాణ్ చేస్తే తప్పు కాదా

టీడీపీ, జనసేన నేతలకు మగ అహంకారమని మండిపడ్డారు మాజీ మంత్రి రోజా. తాను జబర్దస్ షో చేసే సమయంలో దారుణంగా ట్రోల్ చేశారని మండిపడ్డారు. తాను ఏదైనా ఫంక్షన్‌కు వెళ్లినా, షో చేసినా, పిల్లలతో వీడియో ఉన్నా, బర్త్ డే వీడియో ఉన్నా వాటికి కూడా మాట్లాడుతున్నారంటే.. వాళ్లు ఎంత ఫ్రస్టేషన్‌లో ఉన్నారో అర్ధమవుతుందన్నారు. ఓ ఇంటర్వ్యూలో మాజీ మంత్రి రోజా సంచలన వ్యాఖ్యలు చేశారు. తాను గతంలో శేఖర్ మాస్టర్‌తో డ్యాన్స్ చేసిన వీడియోను వదలకుండా ట్రోల్ చేశారన్నారు. మరి ఇప్పుడు బాలయ్య, పవన్ కళ్యాణ్‌లు ఏం సమాధానం చెబుతారని ప్రశ్నించారు.

బాలయ్య ప్రస్తుతం ఎమ్మెల్యే అని.. ఆయన ఎన్ని రోజులు అసెంబ్లీకి వెళ్లారు.. ఎన్ని అంశాలపై పోరాడారు.. ఎన్ని రోజులు నియోజకవర్గానికి వెళ్లారు.. ఎంతమందికి ఫోన్‌లో అందుబాటులో ఉండి వారి సమస్యల్ని పరిష్కరించారు.. ఏం డెవలప్ చేశారో చెప్పాలన్నారు ఆర్కే రోజా. 'నేను ఎమ్మెల్యేగా, మంత్రిగా నియోజకవర్గానికి ఏం చేశానో చెప్పగలను.. నా నియోజకవర్గానికి రావొచ్చు.. తెలుసుకోవచ్చు. వాళ్లిద్దరు కూడా వాళ్ల నియోజకవర్గాలకు వెళదాం.. పదేళ్లలో వాళ్లు ఏం చేశారో చూద్దాం.. పదేళ్లలో నేను ఏం చేశానో చూపిస్తాను.. బాలయ్య, పవన్ కళ్యాణ్‌లను సవాల్ చేస్తున్నాను. వాళ్లిద్దరు సీనియర్లు కదా.. బాగా సంపాదించుకున్నారు.. మరి షూటింగ్‌లు ఎందుకు చేస్తున్నారు. మీకు ప్రజలు ఓట్లు వేసింది షూటింగ్‌లు చేసుకోవడానికా' అంటూ ప్రశ్నించారు.

'నేను ఎమ్మెల్యేగా ఉండి జబర్దస్త్ షో చేస్తే.. నీకు ఓటు వేసింది షూటింగ్‌లు చేసుకోవడానికా అని నన్ను అడిగారు. నా కుటుంబం అన్నం తినొద్దా, వాళ్లకు అన్నం పెట్టొద్దా, నా పిల్లలు చదువుకుంటున్నారు.. వారి అవసరాలు తీర్చాలి కదా.. నా భర్తతో పాటూ నాకు ఆ బాధ్యత ఉంటుంది కదా. వీరు బాగా సెటిల్ అయ్యారు.. వీళ్లు ఎందుకు చేస్తున్నారు. మీకు ప్రజలు ఎందుకు ఓట్లు వేశారు.. మిమ్మల్ని షూటింగ్‌లు చేసుకోవడానికా అని బాలయ్య, పవన్ కళ్యాణ్‌లను ప్రశ్నిస్తున్నాను. ఒక హీరోయిన్‌గా ఒక షోలో డ్యాన్స్ చేయాల్సి వచ్చింది.. డ్యాన్స్ చేసేప్పుడు 150మంది యూనిట్ సభ్యులు ఉంటారు, నాతో పాటూ ఆర్టిస్ట్‌లు ఉంటారు. ఆ టైంలో డ్యాన్స్ బాగా చేశామా లేదా.. మనం అందంగా కనిపిస్తున్నామా లేదా అనేది ఆర్టిస్ట్ మైండ్‌లో ఉంటుంది. అంతే తప్ప వేరే బ్యాడ్ ఇంటెన్షన్ ఉండదు.. ఈ విషయం బాలయ్య, పవన్ కళ్యాణ్‌లకు తెలియదా' అన్నారు.

'వాళ్ల మనషులు నన్ను అన్నప్పుడు సినిమా ఇండస్ట్రీ నుంచి వచ్చిన హీరోలుగా బాలయ్య, పవన్ కళ్యాణ్ ఎందుకు ఖండించడం లేదు. మీ మనవరాళ్ల వయసు, కూతురు వయసు ఉన్నవాళ్లతో డ్యాన్స్‌లు చేయడం, నడుములు పట్టుకోవడం, వెకిలి చేష్టలు చేయడం అన్ని ఛానల్స్‌లో ట్రోల్ అవుతున్నాయి. వాళ్లు చేస్తే మంచిది.. మేము చేస్తే బూతు.. ఇది ప్రజలు అర్ధం చేసుకోవాలి. ఇలా యూట్యూబ్‌లో ఎవరైతే పెడుతున్నారో వాళ్ల పిల్లల తల్లిదండ్రులు వాళ్లను చెప్పుతో కొట్టి బుద్ధి చెప్పాలి. నేను సినిమాలు చేస్తూ ఆ తర్వాత రాజకీయాల్లోకి వచ్చాను. నేను ఏదైనా షోకు వెళితే నన్ను హీరోయిన్‌గా చూస్తారు.. రోజాగానే చూస్తారు. ఇంతమంది లేడీస్ చూడకపోతే.. నేను చేసినప్పుడు ఎందుకు షోలు నంబర్ వన్‌ ప్లేస్‌లో ఉంటాయి.. నేను బయటకు వచ్చాక ఎందుకు పడిపోతున్నాయి. ఇప్పుడు మళ్లీ నేను డ్రామా జూనియర్స్ చేస్తున్నాను.. అది ఎందుకు నంబర్ వన్‌గా ఉంది.. నేను వందశాతం నేను చేసే పనిలో నా ప్రాణం పెట్టి పనిచేస్తాను' అన్నారు రోజా.